قبل العاصفه
وثيقة تخرج ..
بكالوريس تربية وآداب .. ثقافة إسلامية ..
:
:
إستلام الوثيقة كان بحد ذاته إنجاز عالمي بالنسبة لي ما تطلعت لي إلا بعد شد واخذ ورد حتى أني تتطيرت بها ثم إستعذت من الشيطان ثلاث ..
وقتها بدأت أفكر بصنع مستقبل خاص في بتأيد من الله وتوفيق أولا منه وتسديد ..
:
:
وصناعة المستقبل تبدأ بتحديد الهدف والمسار والمنهج ..الحقيقة كنت أسعى أن يكون لي بصمة في التعليم وربما أريد أن أسير على نهج أستاذتي ودكتورتي وأمي الروحيه /رقيه المحارب ..
أول الخطوات تقديم طلب وظيفه في مدرسه أهليه أثبت تواجدي فيها ..
وبالفعل قدمت أوراقي وإجتزت الإختبار والمفاضله بنجاح وتم توقيع العقد مع المدرسه براتب وقدره 2400 في الشهر ..
مع إستلام نشاط المصلى ..
توقيع العقود كان في الإجازه الصيفيه ماعطيت نفسي أي فرصة لتنفس وفي منتصف الإجازه عودة المعلمات وتوزيع المناهج ..
الحقيقه أن الوضع اللي عشته في أول أيامي كان مضحك جدا
أنا المعلمه الوحيده الجديده في المدرسه أغلب المتواجدين من سنه وسنتين ومنه ثلاث سنوات أو تزيد أيام ماكانت المدرسه في المبنى القديم مثل يرددون دآئما ..
:
:
إجتمعت مديرة المدرسه بالطاقم التعليمي تعارف وكلمه عن الأنظمة وبعدها بدأت بالتخصصات تخصص تخصص حتى تقسم المناهج فكان الدين آخر التخصصات تقسيما ..
ولما جاء وقت معلمات الدين كل معلمه تنادي ترى أنا حاجزه المرحله الفلانيه معليش أنا بطلع مع بناتي والله أنا بجلس على مناهجي ..
تناتفوا المناهج وما بقى إلا منهج أول ثانوي ودفعته التي تشبه طلبة مدرسة المشاغبين ..
وقتها قالت المديره وأول ثانوي مين ياخذه مباشره إلتفتوا على ذا الضعيفه -هكذا أنا- وقالوا فلانه وأنا مازلت لازمة الصمت
قالت المديره :بس معلمه مبتدئة نعطيها اول ثانوي وبنات زي بناتنا مو صعبه شوي..
كل وحده من المعلمات تغير وجهها وأخذت تبرر لنفسها
وقتها نطقت!!!
-عفوا لكن أنا راضيه بمرحلة أول ثانوي أصلا درست هالمرحلة وقت التربيه العملي
-إيوه بس يابنتي ترى بناتنا غير عن بنات الحكومه
-عارفه وأنا قادره بإذن الله وبعدين مانستغني عن توجيهاتك يا أستاذه :..........
-ربي يسلمك خلاص أول ثانوي معك نصابك 15 مع نشاط المصلى لجميع المراحل
-تم
تراني قلت تم وأنا ما أدري إنه بانكرف كرف القدره ونون ومايعلمون ومالا يعلمون ..
:
:
غرفة المعلمات كانت عباره عن غرفتين غرفه لسعوديات وغرفه للأجنبيات ولا تسألوا لماذا سياسة دوله
جيت بشنطتي وأغراضي أدور لي درج مكتب يعني مافيه طبعا
قالت لي إحدى المعلمات القديمات
-ترى كلا يجدع أغراضه على ذا الطاوله وهالكرسي لأسماء وهذا لسحر وهذا أماني وهذا ريم وهذا مهب لحد خذيه
-شكرا
سحبت الكرسي وجلست فيه
جات لي مشرفة النشاط معلمه كلها طاقه ونشاط وخفة دم ومزح جلست جنبي وقالت شوفي ترى حنا راعين مزح وسعة صدر ولا بينا حزازيات والزعول ترانا نبعد عنه
-أنا أحب المزح وسعة الصدر ولنيب زعول طبعا مادام الدعوه مزح بمزح لكن فيه خصوصيات لكل واحده هذي اللي اتمنى محد يتعداها
-حلو حنا ماعندنا تعدي على الخصوصيات حنا خذي ذب ومزح على بعض وضحك وفطور وجمعه وقهاوي وفلة حجاج ..
وبالفعل كانت مجموعه من أروع مايكون تعاون وتفاني وإذا شافوا أحد مضغوط خففوا عليه ناهيك عن المؤمرات اللي كانوا يدبرونها للإداره بدون علم الإداره حتى ناخذ وقت من الترفيه وسعة الصدر
:
:
عودة الطالبات ..
ليلة عودة الطالبات كانت ليلة حاسمه بالفعل في طرق التدريس تعلمت أن الطالب يبني تصوره عن المعلم من أول حضور
وأنا كلا يشكي من طالباتي وكلا تاركهم ومرتاع منهم
جاء في بالي ذيك الليله إني اسحب على المدرسه ولاعاد أداوم/ وجاء في بالي إني أغيب أول يوم وأبتعد عن أول لقاء/ لكن بكره وراي وراي ..
أخر شئ قررت أصيح -معليش بس طريقه لتهدئة النفس -
قفلت على نفسي وتذكرت كل الاشياء اللي تجيب الهم وصحت صحت على أمي وصحت على عمي وصحت على صديقتي وصحت على كل اللي أعرفهم ذيك الليلهولما إنتهت نوبة البكاء رحت وتوضأت لصلاة وصليت لربي ودعيت ربي إنه يسخر لي هالبنات ويدلني على الطريقه الصحيحه إللي أقدر أتعامل معهم فيها ..
جلست على سجادتي لين أذن الفجر صليت وبديت إستعدادي لدوام ..
على فكره تراني مداومه بعيون منفخه وأنف متضخم من البكاء ..
أهتميت بكل شئ لبسي شعري شنطتي جزمتي -أكرمكم الله-ساعتي خاتمي الحلق الصغير كل شئ وادق التفاصيل.....
:
:
:
الساعه 6:15 أنا في السياره ..
-عاد مهب إذا طقوك البنات تصيحين إللي يطقك طقيه
-وش دعوى يبه عاد توصل لطق
-إيييه توصل لطق أهم شئ خوذي معتس عجرا وإلا شئ
-لا مايحتاج أخذ شئ إنت ناسي إنه معي الحزام الأصفر
-وش بينفعك الحزام الأصفر خلي جوالتس معتس وأنا كل شوي بدق
-ماودك تداوم معي تجسرني أول يوم
-عادي يوافقون أشوف ذا البنيات كنهم بناتي
-يبه كنهم بناتك هاه أصلا بتصير فتنة في الأرض
-ليه ؟
-البنات بيعافون كل شباب المستقبل ذا الضعوف ومحد مالي عينهم عقبك
-كل فتاة بأبيها معجبه
-لا والله الحق حق وإنت إسم عليك تكبر وتزين كنك جورج كلوني ترى هذا التشبيه مهب مني بنات خالاتي أطلقوه يوم شافوك ذا اليوم
-ماخذتي منهم أخاف ينحتوني
-إذا قريت وردك مهب ماسك شئ مع إن نوره عويناتها صغار وإللي عيونه الصغار يكون أشد تركيز في النحت لكن نفعصها وناخذ أثرها كلششش ولا أنت
-المهم بس إذكري ربك والله الله بالتعامل الزين ومثل ماتبغين المدرسات يعاملون خواتك إنت عاملي بنات الناس
ياه كنت محتاجه لهـ/الجمله محتاجه لها مره ..
مسكت يده وحبيها دعواتك الطيبه ياغالي
-الله يوفقك استودعك الله الذي لا تضيع ودائعه
نزلت من السياره والمدرسه مزدحمه بشكل رهيب أشكال وأنواع أحجام xxL
الحين أنا وين أشرح لهـ/البنات ماشاء الله عمالقه هذا وانا لابسه شئ محترم تحت إسمه كعب أجل لو جيتهم مسح وش بصير ..
دخلت الإداره والمديره بوجهي
-هاه اليوم يومك ياعروس ترى اليوم بالذات يا تكسبينهم يا تخسرينهم وإنت قدها
-الله يعين والله إني ليلي كله أدعي ربي ولا نمت
-أفا ليه بس صدقيني رغم إنك جديده لكن بتحققين معهم شئ هذا شئ أنا أشوفه فيك <--- تدهن سيري
-طيب كيف أدخل عليهم يعني أعرفهم بنفسي أسمح لهم يسولفون
-تبغين أعطيك جدول وطريقة عن أول دخول لك
-ياليت والله
-شوفي تعاملي معهم حسب طبعك والبنت ذكيه تعرف اللي يعجبك واللي ما يعجبك لا تحطين في بالك إنك راح تخضعينهم لك لا حطي في بالك إنك راح تكسبينهم
-وأنا هذا إللي أبغاه ما ابغى اقضي السنه مطاق معهم
-أجل بتكسبينهم صدقيني روحي خذي لك فنجان قهوه فوق وروقي وإذا ضرب الجرس إنزلي
-طيب شكرا يا أستاذه
-ولو إنت من اليوم بنتي
-أجل يا حظي
-ليه ؟
-لأنك أمي وأنا بنتك ومعناتها مابترضي بالغلط علي
-هههههههههههههه إللي بيغلط عليك أمه ماجابته
طلعت فوق وبديت أرتب أشيائي المعلمات كل وحده نظرها متجه لي مدري ليه أو هو مجرد شعور فقط
-مستعده اليوم
-نقول إن شاءالله
-شوفي أهم شئ تفرضين شخصيتك عليهم إدقميهم أول حصه يمشون معك صح
-طيب ليه أدقمهم يمكن ما يصدر منهم شئ
-شوفي سوي لك كبش فداء
-كيف؟
-يعني بنت تتحرك حركه بسيطه إغسلي شراعها وإرفعي صوتك وخلي البنات يشوفون وجهك الثاني وبعدها تشوفين إذا مامشوا معك صح
-طيب البنت ذي وش ذنبها وبعدين الموقف الأول لازم أسجله إيجابي مو سلبي
-ياه أسماء شوفي الخريجات الجدد ترى عادي تجين يوم الغرفه تشوفين معلمه منهاره من الصياح عادي جدا بسبب طالبه وإلا لا ياخلود
-أفا عليك ترى بناتك العام صيحوني لين قلت بس هنا أنهرت قهروني لا شغل ولا عمل ويبغون درجات وكل وحده لسانها طولها
-الله يعين تراني على جريف
أخذت لي فنجان قهوه وأفكار الدنيا تعصف في راسي جتني معلمة هادئه وصامته تفرض إحترامها على الجميع حطت يدها على كتفي
-تبغين ترتاحين
-إيه والله
-خذي عندك قاعده الإحترام يفرض ذاته دآئما
عندك أنا مثلا لي أربع سنوات هنا وماعمري رفعت صوتي على بنت ولا عمر أي طالبه غلطت علي فيه حد كلهم عارفينه وإنت إحرصي إنك ماتتجاوزينه لأنه الطالبه إذا شافتك تجاوزتيه
هي بتتعدى أكثر إما من باب المونه أو الوقاحه
-صح وكل الناس كذا أصلا وش فرق الطالبه عن الناس هي شريحه من ذا المجتمع
-أندري !! يالله ننزل ترى ضرب الجرس عند أي فصل أنت
-مدري بشوف أنا عند أول /ثاني
-حلو جنبي أنا عند أول / ثالث
-منى.
-لبيه
- شكراً ..
-تعالي بس
نزلت وأنا أحمل ثقه ثانيه ثقه أقوى من قبل أستمديتها من ربي سبحانه وتعالى أولا وثم من أبوي من مديرتي من الإنسانه إللي تنزل معي الدرج وهي ماسكه يدي وكأنها تشد من عزمي
مشيت معها بالساحه والأنظار حولي من ذي المعلمه الجديده ..!!
حسيت إني من كوكب ثاني مو بس كذا شكيت بنفسي بشعري بمكياجي بلبسي وبجزمتي سألت منى
-بالله كيف شكلي
-معلمه قديره واثقه ماعليك البنات تعودوا على العجز الحين جتهم دماء شابه على فكره هالمدرسه مدرساتها كبار ومايتركونها بالسهوله يعني كنها قريبه من الحكومي
فعادي يبحلقون فيك الطالبات
شوفي حنا نوقف قدام الطابور ورائدة الصف توقف ورى الصف أي بنت تتكلم عطيها نظره إذا فهمت حلو إذا ما فهمت أمشي لين توصلين لها وقفي جنبها بتسكت
-تمام
بداية الطابور كان صوت عبدالله بصفر وهو يقرأ خواتم صورة البقره ياه يا بصفر صوتك يترجم معاني القرآن خفض الصوت ورفعه والسكون والهمس كلها توضح معاني القرآن
مخارج حروفك الصافيه الله أعطاك عذوبة صوت تجبرنا إننا نتذوق القرآن معك كلام الله دخل قلبي بهاك الصوت العذب راحه وطمئنيه وسكينه مدري ليه حسيت بنفس الوقت بدمعه وكأن الدمعه بتفر مني
لكني مسكتها ماكانت دمعة ضيقه لأنها ماخنقتني لا كانت دمعة راحه حتى مع مصادرتها ماحسيت بلوعه لا الراحه سكنت الروح ودفء سكن أعماقي البارده المرتجفه..
بعد هالكلام الحيً الطيب الذكر جات كلمة المديره ترحيب وتوجيهات وبعدها وجهت الأمر بالتحرك كل معلمه تتحرك مع فصلها
بدت الفصول تتحرك فصل فصل اول متوسط وثاني متوسط ثالث متوسط أول ثانوي إلى هنا تحركت مع فصلي .
يتبع ....
:
أول حضور !!
دخلنا المبانى ومنها طلعنا فوق لـ/الفصل والبنات كل وحده تسلم على الثانيه
وإنت معي في الفصل وإنت مو معي وحاولي تنقلين ومن هالكلام لين وصلوا الفصل ودخلوا اصوات تسحيب الكراسي والطاولات
كلامهم وحركتهم كان من الصعب دخولي للفصل وهو بهالحاله!!
مسكت القلم إللي معي وصرت أضرب في الباب ضربات متواصله ضرب ضرب ضرب لحد ماصمت أذانهم جلسوا وسكتوا وإستكانوا ونظرهم كله علي لما شفت الإنصات تم والصمت عم والسكون حل
دخلت وسكرت الباب وراي
-السلام عليكم
-وعليكم السلام ورحمة الله وبركاته
-أستاذه وش بدرسينا؟
-كل عام وإنتم بخير أولا
-وإنت بخير
-أستاذه وش أسمك ؟
-طبعا قبل ما أقول لكم أنا مين وقبل ما أعرف إنتم مين فيه نقطة صغيره أبغى نتفق عليها ومن بعدها نبدأ الإنطلاق
لما جيت هنا أنا جيت كمعلمه تربويه أبني هدف واحقق قيمه يعني القضيه مش كتاب أشتغل عليه وأشرحه والسلام لا القضيه تعليم من كل الجوانب هنا أنا بصف لكم من الكلام التربوي والمثالي الشئ الكثير
أشياء نطبقها وأشياء والله بعيده عني لكن ممكن أنتم تطبقوها أحسن مني ..
التعامل بينا يكون في حدود التربيه والعلم في حال تجاوزنا هذي الحدود صدقوني وقتها أنا بنت ناس مو معلمه راح أوقفك بالطريقه اللي تستحقينها وهذا الشئ إللي ما أبغاه خلونا نبني قاعدة إحترام أسمع لكم وتسمعوني
بدون مانتجاوز هالقاعده .. بكون معكم قلبا وقالبا في المنشط والمكره بشرط الأحقيه إنكم تكونون على حق ..
إذا بنبنا هالقاعده بينا أنا كمعلمه برتاح في التعامل معكم وإنتم كطالبات بترتاحون في التعامل معي نمزح لكن عندنا حدود وقت الدرس جد خلونا نستفيد وقت إنت منتي قادره تستوعبين صدقيني المعلمه ذكيه تعرف وقت إستيعابك من عدمه وقتها أنا بنفسي بعطيك فسحة راحه حتى تتنشط خلايا الدماغ عندك ..نتفق على هالنقطه؟
-إيه وبقوه بس وش أسمك ؟
-أنا أسمي ..........
-وش بدرسينا ؟
-دين
-استاذه وش تخصصك
-طب بشري /جراجة قلب والله السؤال إللي مطفي صدق أقول لك بدرسك دين
-يوه ماسمعت
-طب يا ستي أنا بكالوريس تربيه وآداب ثقافه إسلاميه / عقيده ومذاهب معاصره
طبعا إنتم توكم جاين من إجازه وكل وحده عندها من الخرط والنصب مالله به عليم علشان كذا خذوا راحتكم لكن بدون ماترتفع الأصوات
-استاذه ماسألتينا عن أسمائنا
-وماراح أسأل كل وحده راح تثبت تواجدها وإسمها في الحصه وفي التعامل لو خذت اسمك الحين بين أربعه فصول أكذب إذا قلت لك بحفظه مستحيل طبعا
يالله عن إذنكم
-إذنك معك يا أبلا
-وعيني معي مو بس أذني علشان كذا أذكر خذوا راحتكم لكن بحدود
طلعت وقفت عند الباب وعيني عليهم جاتني المعلمه اللي شدة من عزمي وعزيمتي منى
-ماشاء نفس ماتوقعت فرضتي نفسك عليهم كيف أول دخول
-تمام أنا أحس الحين بالثبات
-طيب كيف تعاملتي معهم
-بيني وبينك نفس ما أنا ماقدرت أغير شئ ولا أمثل عليهم لا شده ولا لين وسط
-وهذا الشئ يقدرونه صدقيني شوفيهم تراهم متقبلين دخولك وإلا لو هم ماتقبلوه كان قلبوا صراخ بس علشان تجي الإداريه وتوصل للمديره عدم ضبطك لهم
-بالله
-والله الطالبات ذكيات وبإمكانهم يحددون اللي يبغونها تستمر معهم وإللي مايبغونها
-الله يستر
:
:
ويضرب الجرس كأطول حصه عرفها التاريخ ..
بعد كذا تم اليوم الدراسي على أكمل وجه توقعت فيه عناد فيه شد ورد ولكن اليوم كان من أروع مايكون قدرت أحط لي خطوات
وخطوط لبداية الطريق معهم
وأقدر أقول بشكل أعمق قدرت أحدد مسار التعامل القادم ..
:
:
رجعت لغرفة معلمات وأنا بوجه غير عن وجه الصباح فيه فرح فيه تفائل وفيه قدر كبير من الراحه
-تدرين إن وجهتس يبشر بالخير
-الحمدلله يعني أول دخول مره ممتاز
-لا ماعليك توهم مابعد طلعوا طاقتهم اصبري عليهم الأسبوع الجاي تشوفين وجههم الحقيقي
-حشا /وجه حقيقي مره وحده
-الأسبوع الجاي يستوعبون إنهم بدوا دراسه وقرف / ويطلع هبالهم
-الله يكفينا شر من فيه شر
-هههههههههههههههههههههههههههههههههههههههههه/ موفقه إن شاء الله
إلتفت إلى شنطتي وطلعت جوالي 40مكالمه لم يرد عليها أبوي / اختي الكبيره /إختي الوسطيه /خالتي / أخوي / صديقتي
:
:
بديت بالغالي رقم واحد أول مارن رنه وحده
-هاه وينك كسرت جوالك
-ههههههههههههههههه/كان عندي حصص
-لا طيب وشلون اليوم بشري ؟
-اممممممممم/ أنت وش تحس بصوتي
-والله صوتك يقول إنك مبسوطه
-ايه مره مره مره الحمدلله
-الحمدلله خلصتي ؟
-إيه بس أجمع أغراضي وأطلع
-ياله أنا عند الباب
-يوه كان قلت لي يالله جايه جايه
سحبت عباتي وأخذتي شنطتي وأنا أركض مع الدرج جت بوجهي كم معلمه
-هاه بشري
....وأنا أرد لا الحمدلله مره زين معليش أبوي برى
وأسحب نفسي بسرعه وأطلع ..
يوم طلعت كانت الساعه وحده وربع تقريبا ركبت السياره وسلمت
-يبه كان ماجيت إلا لما دقيت عليك
-وأنا وش عندي هاه وش صار معك
وبديت أسرد له يومي بالتفصيل الممل وأنا ألمح منه إبتسامه كلما ذكرت موقف وأعجبه
ولما أنتهيت إنتبهت تحت يدي جرائد
-يبه مابعد قريت جرايد
-إلا شريتها وجبتها أقرأها في السياره
-من متى و أنت عند باب المدرسه؟
-ابد صحيت وأفطرت ورحت شريت جرايد وجيت هنا يمكن من عشر ونص
-وليه تجلس كل هالوقت عند الباب ؟تعب عليك وإرهاق
-ياأمي لو صار شئ وتضايقتي ودقيتي علي ليني عند الباب وأنا والله ماهنا لي جلست البيت ما أرتحت إلا لما جيت !!
:
:
وقتها سكت عن إصدار حروف لكن كانت في شهقات تطلع ومجاري ماء عين تصب وقلب يتبتل بالدعوات
-إنت تصيحين .....؟
الصمت من جهتي هو الجواب أصلا مافيه مجال إني أتكلم أو أنطق بأي حرف ...
-ياأمي أنا مرتاح وهو بس هاليوم لأني تذكرت شكلك وأنت رايحه ماغير أنت أنت يوم ندخلك المدرسه مدري ليه ذكرتك بأول أبتدئي
وبعدها أبتسم
-إذا كنت بتجي كل يوم وتجلس عند الباب كذا هالوظيفه ذي ما ابغاها أجلس في البيت وراحتك أهم ماعلي
-لا هو بس هاليوم وأدامك جاية مبسوطه فالأمور الحمدلله على خير
-أكيد
-أكيدين .. أهم شئ إنك أرتحتي فيها
:
:
جنتي وأهلي لا خلا ولا عدم
-هاه وشلون اليوم معك
-أولا السلام عليك
-طيب وعليك السلام وش صار ؟
-طبعا محد طقني ولا أحد هاوشني ولا شئ
-اييييييييه هذا اللي كنا خايفين منه يكوفنونك وعاد وش يفكك إنت بروحك ريشه
-لا من هذي تطمن ما قدروا علي
-طيب مرتاحه معهم
-ايه الحمدلله مره يعني احس الوضع مره ممتاز كأول يوم
-حلو يالله مع السلامه
-إنزل تغد معنا
-لا عندي شغل تغديت قبل وبروح الحين للشغل
-الله يعينك في أمان الله
نزلت أنا وأخوي هو راح لشغله وأنا توجهت للأكل كان فيني شهية غير طبيعي للأكل ..
جلست وبديت أفل الحكايه كلها على أهلي
:
:
-تدرون إن أختكم اليوم صاحت
-من صيحك يا حظي ؟!!
- والله إللي صيحوني ناس غالين علي مره ناس ما أتحمل منهم ولهم وعليهم ولا كلمه
-الله الله الله
-يبه ليه صاحت .........اليوم
-إسأليها هي ليه صاحت ركبت معي السياره وتسولف وشوي وصاحت
-....... ليه صحتي ؟
:
مدري وش جاني بس ماحبيت اقول ليه صحت حبيته يكون شئ لي أحتفظ فيه شئ خاص فقلت لهم
-لأني ما تحملت وبس صحت ولا تسألوني ليه ترى بقوم عن الأكل
-خلاص خلاص عوووووووووووومه <--- وصف نطلقه على اي شخص نفسه قريبه وزعول
:
:
الأيام اللي بعد كذا كانت ممتعه جدا نفس ماتصورت من طالباتي قدرت في فتره قصيره جداً أكسبهم قدرت أبني معهم قاعده تعامل ممتازه
وفوق كذا قدرت أتوصل لنفسياتهم الاشياء اللي تثيرهم والاشياء اللي تسعدهم ..
أتفقت معهم إتفاقية الأمانه / إننا نعيد الإختبار عشر مرات ونتقبل ظروف بعض لكن مهما حصل مانغش
وافقوا على هالإتفاقيه وكنت اعيد لهم الإختبار في المادة الوحده اربع مرات إلى خمس مرات
طالما تنازلت عن الغش ..
كنت اشوفهم قبل حصتي مايطلعون من الفصل بينما حصص المعلمات يطلعون
سألتهم مره بصدق
-بنات ممكن سؤال
-تفضلي
-يعني لما أجي لكم في بداية الحصه الاقيكم في الفصل وهذي بصراحه ميزه فيكم
-شوفي يا استاذه الصدق صدق لو شافونا الإداريات برى ماراح يقولون لنا شئ
لكن بيحاسبونك إنت ويقولن تعالي قبل تصفر البنات فوضويات وهذا شئ مانرضاه عليك
- شئ جميل طيب لا ترضونه على الجميع
-لا عاد الجميع لا يا استاذه صعبه شوي
-طيب طيب نشوف
:
:
بعدها قلت لهم:
-حددوا إختباركم متى تبغونه وعطوني ألوووووووو
-اي يوم يناسبك يا أبلى يناسبنا
-بالله أجل أنا يناسبني الخميس
-نجي معليش
-يا بكاشه إنت بالذات يا كثر غيابك ..ترى لك فقده في الفصل لا تعودينا على فقدك
-يوه يا ابلى والله
يتبع ....