من راحت لحرمة تعالج وصار لها مثلي تكفون ريحوني الله يريحكم

السلام عليكم ورحمة الله وبركاته

اخواتي الغاليات يعلم الله ان مالي الا انتن بعد الله سبحانه وتعالى
ابقولكم سالفتي بإختصار وابي منكن رأي او نصيحة او دعوة في ظهر الغيب
انا متزوجة ولي ست سنوات ومااراد الله لي الحمل
رحت لأكثر من مستشفى والحمدلله سليمة الا من تكيس بسيط ع المبايض يمكن يكون بسبب الكلوميد لاني اخذته فتره ثم وقفت
المهم سمعت عن حرمه تعالج طبعاً طب شعبي وتوكلت ع الله ورحت لها
وابقولكم كل اللي صار ورجاء خاص لا أحد يسأل ان اسمها لاني لاأريد ان اغتابها وهي اكيد مجتهدة فجزاها الله كل خير وغفر لها ان قد اخطأت في على كل حال بشر تصيب وتخطأ
رحت لها وكشفت علي وقالت عندك ضعف في هرمون الذكورة وفيك قرينة في الجزء الايمن من الرحم
ماتتخيلون قد ايش صدمتني لما قالت معك قرينة احس الدنيا دارت فيني
قلت لها بس ماقد صار عندي اجهاض ولاموت جنين في بطني وهذي هي اعراض القرينة
قالت قرينتك قوية وهي تدمر الحيوانات المنوية قبل وصولهن للرحم لذا ماتستنى لين يوصلن للرحم ويحصل التبويض بعدين تموت الاجنة مثل باقي الحريم
انت اساساً ماتستفيدين من الحيوانات المنوية
قالت لي ابعطيك علاج وخلال ثلاث اشهر او اقل بتروح اهم شي مايدري احد بالموضوع وخاصة زوجك، قلت لها زوجي اللي جابني عندك واكيد بيسأل ايش قلتي؟
قالت قولي له اي علة الا القرينة ماانصحك ابداً انه يدري لانه اذا درى بينفر منك والقرينة تتقوى فمايقدر يقرب منك ابد لذا خلي الامر سر
قلت لها حتى امي مااعلمها
قالت حتى امك لانك اذا علمتي احد بتستقوي القرينة وتستمر معك
قالت تبغين العلاج؟
قلت اكيد اجل ليش جيت عندك
قالت العلاج غالي لكنه مضمون وكثير تخلصوا من القرينة لما اخذوا طبعاً بعد الله سبحانه
قالت علاج الضعف بـ 1000
وعلاج القرينة بـ 4000
قلت يعني المجموع بـ 5000؟
قالت ايه، قلت لها طيب كيف اجيب الفلوس وانت تقولي لايدري احد؟
قالت تصرفي المهم لاتتأخرين علشان نتدارك القرينة
وماراح تسلمني العلاج الا بعد ماادفع
قلت لها ابشوف وارجع لك ان شاء الله
رجعت مع زوجي وسأل عن كلام المعالجة قلت له تقول عندك ضعف بهرمون الذكورة وتكيس ع المبايض
طبعاً حطيت بدل القرينة تكيس لان المستشفى قايلين معي تكيس خفيف
قال خوذي منها العلاج
قلت له علاجها بـ 1000 لكل عله 500 ريال
الرجال انهبل وقال وش دعوه هالمبلغ؟!!
قلت بخاطري كيف لوتدري بالباقي!!

جلست اتسلف واجمع من هنا ومن هنا لين حصلت ع 4000 ريال وخبيتهن عن زوجي وقلت له المعالجة دقت علي وتقول علاجك جاهز وداني عندها وعطاني 1000 وسلمتها 5000 ريال وعطتني علاج الضعف وعلاج القرينة
استمريت ع العلاج ثلاث شهور ومالاحظت اي فرق ورحت لها قلت ابتأكد من القرينة كشفت علي وقالت الضعف خف الحمدلله
لكن القرينة قوية لذا بعطيك علاج تاخذينه من العلاج الاول وراح يتساعدن وان شاء الله ماتجيك الدورة بعد هالمره
قلت لها عطيني العلاج
قالت قيمته 4000 ريال
قلت لها معقولة؟
السعر غالي وانا موب موظفة،، قالت دبري نفسك وانتبهي لايدري احد بالقرينة تخربين شغلنا كله
رحت لزوجي وقلت له الضعف خف الحمدلله بس التكيس كايد ويبيله علاج ثاني وسعره 1000 ريال جلس يهاوش ويقول وش هالاسعار
قلت له يمكن سبب حملي عندها بعد الله
اقتنع وعطاني 1000 ونفس المره الاولى تسلفت 3000 ريال ورحت وسلمتها المبلغ وعطتني لهوم علبته قد علبة خلطة القهوة المعروفة مرتين
بديت اخذ العلاج الجديد مع العلاج الاول وتأخرت الدورة ثلاث شهور واستانست واستبشرت خير لكن نزلت بعد كذا
والغريبة انها اول مره تتأخر كذا
اذكر اطول مدة اتأخرت فيها 40 يوم
اخذت العلاجات اربع شهور زيادة على الثلاث شهور الاولى يعني اخذته سبعة اشهر وبعدها وقفته لاني خايفة اروح لها تعطيني علاج بسعر غالي وانا مامعي
وبصراحة يابنات انا بحثت عن القرينة بقوقل وقرأت عنها كثير وماحصلت اي شي فيني من اعراضها اللي يقولن البنات
ماتتوقعون نفسيتي الحين
من يوم قالت لي الحرمة عندك قرينة وانا بحالة مايعلم بها الا الله
هجرت زوجي بالفراش وتعبت نفسيتي وكرهت الدنيا وتركت الطلعات والاجتماعات
يابنات انا جالسة اموت موت بطئ
زوجي يشوف تغيري عليه ويظن السبب تأخر الحمل بس
مايدري اني شايلة هم كبيييييير
قسماً بالله يابنات الحين جالسة اكتب لكم وانا ابكي
من كثر بحثي عن القرينة جاني خوف وقلق وقلة نوم وقمت اتخيل انه فعلاً فيني شي
والله يابنات مافيني اعراض قرينة
عجزت اتحمل الهم اللي فيني واحس ودي افضفض قلت مالي الا الله ثم بنات حواء
ودي اتأكد هل صحيح فيني قرينة او لا؟
وهل احد صار له مثل قصتي وطلع سليم من القرينة؟
قمت اقول ياليتني مارحت للحرمة
اهملت نفسي وبيتي وزوجي
صحتي تدهورت ونفسيتي تعبت
اصعب شي انك تشيل همك لوحدك وماتقدر تتحمل
كنت شايلة هم تأخر الحمل والحين صرت بهم القرينة
بنات ايش رايكن
هل كلام الحرمة صحيح ومستحيل تكذب ع احد؟
وهل صحيح المفروض مايدري احد بالقرينة وان الزوج اذا درى ينفر من زوجته؟؟
ايش اسوي وكيف اتأكد من وجود القرينة؟
ودي اعيش مثل اول وانبسط بحياتي واسعد زوجي لو مارزقني الله بحمل
لكن هاجس القرينة مايفارقني ابد
المعذرة يابنات طولت عليكن
بس مثل ماقلت لكن اول مره اتكلم عن هالموضوع وحبيت افضفض لعلي ارتااااااااح.