من زمان وانا اتهرب ماابي افكر بهالموضوع ادخلووووووو انصحوني

السلام عليكم

خواتي فيه اشياء يضيق صدري جدا من زمان وانا اتهرب منه اسال الله الفرج من عنده انا مطلقة وعندي بنت وانا احب بنتي وهي بحياتي شي كبييريوم اتطلق عمرها سنة والحين الله يحفظها بالمتوسط وعمري 36 وفيه شي مضايقني اذا ان شاء الله ربي يسر وتزوجت غير ان الوحدة ماتدري وش يصير عليها اتعبني التفكير ببنتي مع ان الحمدلله امي تقول امك اللي غذتك وانتي صغيرة بتغذى بنتك بس دايم افكر اذا بعدين احس احيانا صعب تعيشين ببيت وبنتك ببيت وماادري عن تفاصيل حياتها اليومية ولا تسولف علي كل يوم شي صعب الله ييسر ويفرج شعور غريب مااقدر اتكلم واقول نعيش بالبيت انا وامي وبنتي كل اخواني وخواتي طالعين امي تفكر بوضعي وانا افكر بوضع بنتي
وامي يوم قلت لها انا مرتاحة الحمدلله معك ومع بنتي قالت ايه بس انا منب دايمة لك الله يرزقك
ماادري وشلون مااقدر افكر احس كل شي صاير بحياتي مغامرة
يعني ادوس على نفسي افكاري متصاربة افكر بنفسي وظروفي وافكر ببنتي وافكر بابوها وافكر بكل شي تعبت الله يفرجها لي من عنده الله يرزقني وظيفة وبيت خاص فيني علشان يصير بيتنا انا وبنتي وافكر بالناس لا تقولون ماعليك من الناس الناس ينظرون لك انك مسكينة وانك مطلقة

انصحوني وتكلمو معي عن قصص ناس وشلون بنتي بعدين عادي بتقول للبنات ان امها متزوجة ولا بتفشل هي الحين ماعلمتهم عن وضعنا مفهمة البنات ان لها ام وابو واخوان علموني ولااحد يجي ويقول اجرك ببنتك انا ادري هل جزاء الاحسان الا الاحسان لكن حتى انا تمر علي ظروف بحياتي ابطير من الهم والضيق
والناس اللي يخطبوني الله اعلم بوضعهم اللي متزوج ويخوف واللي ارمل وعنده عيال كبرك ويتشرط عليك حالة الله اعلم بها
احس اني ممزقة ومشتته مع اني موقنة برحمة ربي سبحانه
بس بداخلي ضيق وتمزق احس قلبي فارغ ودي اعيش ببيت زوج واصير مثل الحريم وابي الله يرزقني عيال لكن ذبحني التفكير ببنتي ولاادري الحياة غامضة بالنسبة لي
بنتي اقولها وش وش انصحها فيه علموني كلام اقوله لبنتي
حتى اذا جيت بنصحها وافهمها ان وضعها غير وانها لازم تحس بمسئولية نفسها ارحمها ماابي اثقل عليها
وان البنت تعيش ببيت رجل غريب حتى ولو زوج امها صعبة الله لايجدع بنتي ضعفة عند احد والله يعزها ويكرمها ولايحوجها لااحد
اتمنى من الله ان بنتي ماتطلع من بيتنا الا على بيت زوجها وامي تقول جعلها ماتطلع من عندنا الا على بيت رجلها
والا اذا كبرت تروح لبيت ابوها عزها بعد الله
الله لايحوج بنتي لااحد
الله يعافيني و لا يبلاني ولا يبلا مسلمة من اصعب امور حياتي اللي واجهتها اني اختار بين حياتي وبنتي قطعة قلبي