من ضايع لها شيء وودها تلقاه

السلام عليكم ورحمه الله وبركاته
بسم الله والصلاه والسلام على رسول الله
خواتي انا ابقولكم تجربتي اللي دايم افكر فيها واتعجب منها
انا عندي ولد الله يحفظه عمره سنه ونص تقريبا
مايسمع الله يشفيه ان شاءالله هو واخوه
ولدي هذا يابنات الحلال يلبس سماعه ودايم يرميها والدكتور محرصنا عليها يقول اذا تبونه يتكلم لازم يلبسها من يصحى الين ينام يعني مهمه مهمه مهمه وبنفس الوقت غاليه اذا ضاعت لازم على طول نجيب بدالها
المهم ولدي ما يبغاها فصار يرميها واتعذب ما القاها والمشكله انه يفككها قطعه قطعه يمكن اغلبكم ما عمره شاف سماعات صم فيها جزء شفاف قالب يدخل وسط الاذن قد رأس الاصبع مهم جداولايستفيد من السماعه الا اذا كان موجود
دايم يضيع واتضايق واسوي حاله طوارئ في البيت وندور عليه فى الزبايل والمكنسه الين الله دلني على دعاءعظيم تصدقون والله العظيم من عرفت هالدعاء وانا كل ماضاع اقوله ما اكمل خمس دقايق الا انا لاقيته لدرجه اني احيانا ادور في نفس المكان ولا القى شي واذا دعيت بهالدعاء رجعت لنفس المكان ولقيته
ومره كان ولدي بالحوش يلعب ورمى القالب الصغير وحوشي كبير دورت مافي امل القاه وافرش سجادتي اصلي المغرب وانا ساجده دعيت فيه والله العظيم يوم سجدت مره ثانيه حسيت تحت يدي تحت السجاده شي صغيريوم سلمت ورفعت سجادتي الا هذا القالب حق ولدي على ان الدنيا ظلام لكن رحمه الله اكبرمن كل شي
اكيد انكم ودكم تعرفون وش هالدعاء واكيد اني طولت عليكم
(00اللهم رب الضاله رد الضاله 00)
صرت كل ما ضاع لي شي وانا ادور عليه اردد هالدعاء والحمدلله ما اطول والقاه
انصحكم فيه ولاتنسوني من الدعاءلي ولعيالي
وعذرا على الاطاله