من عندها مشكلة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

السلام عليكم ورحمة الله



شلونكم يابنات؟؟



انا اذا قريت في منتدى المشاكل والله يضيق صدري >>>>> يقالك حاسة فيكم !

لا من جد والله يضيق خلقي وتهون علي مصيبتي ..( الحمدلله على كل حال )



في شي في خاطري ودّي أقوله لأي وحدة عندها مشكله أو مهمومه أو مريضة أو يائسة >>>>>>> قولي وخلصينا..!



مثلاً اللي عندها مشاكل مع زوجها ( وهذي الأغلبية ) :

اذا صار زوجك مثلاً مشكلجي معك ويتصيّد عليك ودايم يحصل مشكلة على أتفه الأسباب

يااختي اصبري واحتسبي هذا أول شي.... وترى ما كلّن مرتاح في هالدنيا

ثاني شي اذا حمقتي وجتك ضيقة من زوجك وكان في ودّك تقتلينه ذيك اللحظه

تذكري محاسنه قبل عيوبه (حاولي تتذكرين كل شي حلو فيه .. أي موقف حلو صار لك معه .. يااختي يكفي ان عندك أطفال يهبلون هدية منه )

حاولي ما تكابرين عند زوجك لأنه زوجك أولاً وأخيراً مو أي أحد ومالك غناة عنه ( حاولي تراضينه في كل شي وتتودّدين له ) ... (حتى لو كان غلطان عليك )

اكظمي غيظك واشتكي للخالق عز وجل ( وادعيه يسهل أمورك وييسر لك الصعب ويسخر لك الحديد والعبيد )

رددي ( لاحول ولاقوة الا بالله ) فإنها ( دواااااء ) لتسعة وتسعين داااااااء أيسرها ( الهـم )>>>>>>> وإحنا ماغير نتحلطم في كل وقت..!

كثّري من الاستغفااااار ................. ( وحاولي قدر الإمكان تطنشيــــــــن ).... ترى ربّي سبحانه مايضيع لك شي ....





ونفس الشي اذا كان عندك مشاكل مع عيالك أو أخوانك , أوأقاربك , أو أي أحد ...

( تنازلي عن حقك ... يعني خلّي الحق لك مو عليك يوم القيامه ... يوم لاينفع مال ولابنون ... وتصيرين في أمس الحاجة للحسنة الواحدة )




ـــــــــــــــــــــــــــــــــــــــــــــــــــــــ


والمهمومة :


دايم اقرأي ادعية الهم وكشف الكرب لاتنسين ربك أبد ويكفي الالتزام بالاستغفار ( تراه كفيل بإزالة الهم )


استغفري ربك واجد بنية أي شي في بالك ( قالت لي أمي أنه حلال إنك تستغفرين بنية شي في بالك )

يعني مثلاً تستغفرين بنية صلاح زوجك

تستغفرين بنية التوفيق في الدراسة والعمل

تستغفرين بنية الرزق المبارك

تستغفرين بنية الزواج

وكل شي خاطرك فيه ناجي ربك اللي قادر على كل شيء ( سبحانه ) ولاتستهينين في قدرة الله

ادعي ربك وابكي واذا مابكيتي حاولي تبكين ( صيري زي الطفل اللي يبكي على حلاوة خذتها منه أمه )>>>>>>> وش رايكم في المثل؟

ربّي سبحانه يحب العبد اللحوح في الدعاااااااء

وانتبهي تتهاونين في آداب الدعاااااء..




ــــــــــــــــــــــــــــــــــــــــــــــــ


يا اختي المريضة :


أولاً أسأل الله ان يشفينا وياك وكل مسلم..

ثانياً : تذكري إن محد مرتاح في دنيته أبد واللي يقول أنه مرتاح طول عمره كذاب.. >>>>>>>> تبي تتطاق

لابد من منغصات في الحياة لأن هذي الدنيا( والآخرة خير وأبقى )

لاتتجزعين ولاتهتمين ولايكون المرض أكبر همك ولاتحسسين نفسك إنك ناقصة عن غيرك ( ترى النكسة تجي عليك )

( والله لو تروحين للمستشفيات وتشوفين أقسام العناية والملاحظة كان تصيرين ملكة ومرضك مايجي شي عند اللي يتألمون 24 ساعة )

يارب لك الحمد ولك الشكر ... يالله ان تشفي كل مريض مسلم ...............آميــــــــــــــن

وكل لحظة احتسبيها واصبري عليها عشان تؤجرين عليها وماتروح عليك ..

دايم إقرأي سورة البقرة ... أخذها بركة وتركها حسرة ولاتستطيعها البطله

ادعي ربك في ساعات الاستجابة وتحرّي لها ..

ولاتيأسين من رحمة ربي وادري ان هذا ابتلاء ومأجورة عليه ...






















بنات وش رايكم في كلامي تراني أول مرة أكتب مقالة زي كذا >>>>>>>> أحس إني بصير صحفية خخخخخ ماتنعطى وجه



يارب تستفيدون ..





لاتنسوني من دعواتكم الصالحة بالشفاء لي والمسلمين أجمعيــــــــــــــــــــــن يارب ياكريم ..آميـــــــــــــــــــــن :D :D :D :D