Lost55 @lost55

عضوة نشيطة

من فوق 29 ......................وماتبي تتزوج اي زوج والسلام

السلام عليكم

رجعت لكم بموضوع جديد بس مو بعيد عن فكرة موضوعي الاول
>>>>>>>>>> يا حبي للمقدمات

المهم
اعرف اننا ازعجناكم بخصوص الي اعمارهم بالثلاثين وما فوق ولا تزوجو

لكن هذا العمر حساس خاصه للي ما تزوجت او مطلقه او ارمله من غير اطفال ومستحيل تتكلم بشفافيه وانفتاح إلا عن طريق المواقع والاسم المستعار

ولي رجاء الي اعمارهم تحت الثلاثين او ال29 بالكثير لا يردون على الموضوع

لاننا ملينا واحنا نقول فقط للي اعمارهم 30 ونلقى اصغر واضح الهدف فا عيب للي اعمارهم اقل يردون والموضوع غير موجه لهم احس فيه قلة إحترام

يعني بالعربي الي اصغر من 30 لا تردون ولا تخربون الموضوع مثل تخريبكم للمواضيع الثانيه

الحين بدخل بالموضوع لاحضو كل هذا وانا للحين ما دخلت بالموضوع

اولا كل وحده فينا بالعمر هذا تجيها لحظات وتمل من فكرة الزواج او الانتظار واحيانا تحس صعب تلاقي الشخص الي كانت طول عمرها تحلم فيه وبالاخير تقول خلاص ليه اتزوج اصير بحياتي كذا مرتاحه محد يامر وينهي وانام على كيفي واصحى على كيفي
>>>>>> تقدس النوم

انا الصراحه في البدايه كان عندي حلم لفارس احلامي وكل ما كبرت او تقدم لي احد احس ان حلمي بدا يتلاشى

جربت الخطابات وصارت سالفتي كاأني ريه وسكينه بالخطابات

بالاخير اقتنعت اني اغير حياتي واعيشها لنفسي فقط مو علشان احد قاعده انتظره

صرت اشتغل واحاول افكر اني اسوي لنفسي مشروع صغير وصرت اروح نادي رياضي وزيارات بسيطه

وماصرت ارفض اي مناسبه اشغلت نفسي كثير

واحاول ادور اي دورات تساعدني لتطوير تفسي واتعلم لغات واتعرف على ناس قريبه من شخصيتي ومثل وضعي

والحمدالله انا اهلي من النوع المثقفين يعني مو من النوع الي يحتكرون حرية البنت لا تطلعين لا تروحين :)

بالعكس محافضين لكن واثقين باني وصلت سن اعرف فيه الصح من الغلط

حتى لدرجة احاول اني اروح اماكن ما سافرت لها واتعلم ثقافات جديده طبعا مع الاهل

يعني بالعربي وباختصار شديد صرت اهتم بنفسي اكثر من فكرة الزواج :)

والله يا بنات اني حسيت اني ارتحت من هم وبالعكس احس اني قاعده انجز اشياء كثيره اقلها وقتي ملكي
وصرت بكل فخر اقول للناس الي تسئلني ماتزوجتي؟ ارد عليهم وانا بكل ثقه لا ماجاء نصيب ومتى ماجاء يجي انا الحمدالله مرتاحه ومافيه شي ناقصني ولا يضيق صدري ولا اتحسس من الشي هذا لاني قاعده

والزواج نصيب اذا جاء حياه الله واا ماجاء اجل الي انا قاعده اسويه خيره لي وافضل من الزواج

بنات الي قريبه من طريقه تفكيري ترد على موضوعي
:)
لان من اهم الراحه النفسيه انك تمشين مع ناس مثل وضعك ما تحسين بان فيك شي غلط

يعني اذا انتي بالثلاثين وتمشين مع حريم نفس عمرك ومتزوجات وسوالفهم عن رجالهم وعيالهم اكيد بتجيك ضيقه وتحسين بنقص
لكن اذا صديقاتك نفس وضعك وعمرك يعطيك دافع للحياه وتشجيع انك مو بس انتي كثير مثلك ومرتاحين

والصراحه ماصار عندي استعداد اتعب نفسي علشان رجال هو الله يسلمه يقعد يستانس ويعيش حياته ومتى ما فكر بالزواج حط الشروط الي يبيها وعلى طول خطب وتزوج بكل سهوله لا والمشكله انه يتشرط بعد

والي يقهر بالموضوع يحط شروط في الزوجه كانه يبي يدخل فيها مسابقة ملكات الجمال مو زوجه له والمشكله ان اكثرهم يكون فيهم عيوب الدنيا

انا ماعندي اي مشاكل اكون بالشروط الي يبيها اسوي عمليات تجميل بس على حسابه يدفع

والي يقهر اكثر تجيك وحده تقولك وافقي اهم شي رجال ومو ناقصه شي وترا حتى لو هو شين اهم شي رجال ويستر عليك واهم شي الاخلاق

وحتى لو مامعاه فلوس اهم شي الاخلاق
واذا يعني عصبي وشديد وبيحرمك من الطلعات اهم شي الاخلاق

تنازلي عاد واذا كان بخيل تحاولين تغيرينه اهم شي الاخلاق

وياله هاتك يا تنازلات علشان الاخلاق وفي الاخير يطلع بعيد كل البعد عن الاخلاق
وش استفدنا ولا شي محسوب علينا رجال بس

مثل مالرجال يقعد يتشرط يبي فيها ويبي فيها حتى لو عمره صك ال40 ترا يحق لنا نتشرط حتى لو عمرنا صك 60 بعد

احنا بشررررر حالنا حال الرجال والمفروض ما نقدم اي تنازل

ونصير مثل السيده خديجه رضي الله عنها اختارت افضل البشر الرسول محمد صلى الله عليه وسلم

مع انها اكبر منه ومتزوجه قبله وعندها اطفال مع هذا فضلت لنفسها تاخذ افضل البشر

لا نناظر نفسنا نظره دونيه... بالعكس يحق لنا احنا نتشرط ونقول لا...لا العمر ولا المجتمع المفروض يحطمنا

بناات عيشوو حياتكم واستمتعو بكل لحظه فيها مثل ما الشباب يسوون احنا المفروض اكثر منهم نعيش حيات استقلاليه بالنفس

وفي الاخير احب اشكر نفسي على الموضوع الي مدري وش يبي بس خواطر في بالي وحبيت اشارككم فيها

الي بترد تقول وش طريقة تفكيرها ونظام حياتها ووقتها شلون تشغله وكيف اهلها معاها متفتحين والا صاكين عليها علشان ما تزوجت

رجاء بنات نبي وساعة صدر نظاراتكم السوده خلوها عند الباب افصخوها وادخلو الموضوع
:)

273

21K

يلزم عليك تسجيل الدخول أولًا لكتابة تعليق.

تسجيل دخول

أميرةa • 16 سنة

لو كتبتي

من فوق 29 ......................وماتبي تتزوج اي زوج والسلام...........لها شروط ومتمسكه فيها

كان افضل

لان مافي وحده ماتبي الستر

لكن وحده ماعندها استعداد تتزوج عفن بس عشان ترضي المجتمع..........

ووحده تبي اي رجال..........ولو تعيش مهانه ولا يحبها و بحسرة الريال ...تقول يكفي اني متزوجه.....

واعتقد هالشي له ارتباط اولا بالاهل يكونون معيشين البنت بنار وذل

وثانيا حسب شخصية البنت

الكلام يطول

لي عوده بس تقريبا انا نفس تفكيرك

Lost55 • 16 سنة

حاولت اغير العنوان ماقدرت ياليت احد المشرفات يساعدون في تغيير العنوان لو سمحتو الى

من فوق 29 ......................وماتبي تتزوج اي زوج والسلام

<<<<<<<<<< تسمع الكلام مشرووع زوجه ناجحه

ايه هين :)

أميرةa • 16 سنة

8
8

ههههههههههههههههههههههه عسل

منوره الأموره • 16 سنة

لوست وينك لك وحشه والله
تذكرين يام الملف تخيلي لسه مفتوح
فعلا عطيتي المجال للبنات يفضفضوا
انا معاكي بالي قلتيه غلط البنت تحط ايدها على خدها وتنقطع عن الناس بسبب انها ماتزوجت وانها تعطل حياتها بانتظار الزوج
انصح البنات انها تقضي حياتها بشي نافع
وفي نفس الوقت تدعي ربها انه يرزقها الزوج الصالح
ربي اني لما انزلت الي م خير فقير
اكثروا الاستغفار والدعاء
ولكن ايضا عيشوا حياتكم
وارضوا بقضاء الله
والحمدلله الذي انعم علينا بنعم كثره

@MoOnY@ • 16 سنة

والله لو كنا عايشين ((لحالنا)) كان مايخالف الوحدة تاخذ راحتها بحياتها تنام وقت ماتبي وتصحى وقت ماتبي لكن المشكلة عايشين بمجتمع مايرحم نظرة الناس للبنت اللي ماتزوجت والله كأنها سكاكين جعل عيونهم البط .. ونظرات الشفقة هي اللي تخلي البنت تفضل ان يكون لها لقب متزوجة على لقب عااااااااااااااااااااانس هذا غير الاهل اللي يذكرونها بها الكلمة ولااا عاد إذا كانوا من النوع اللي يضيق على البنت في البيت يوووووووه اشياء كثيرة بس خليها على ربج يفرجها ماعلينا الا بكثرة الاستغفار والدعاء .... ((ربي اني لما انزلت الي من خير فقير )) لاتستهينون يابنات بالدعاء ولاتيأسون ومافيها شي إذا الوحدة لجأت لربها الكريم ليش نتكبر وكثرة الاستغفار تحقق الاماني وتسهل امووور معقدة http://forum.hawaaworld.com/showthread.php?t=1313285