من قبل ثلاث سنين واشهر بدات معاناتي والحمدلله

حبيباتي في عالم حواء
السلام عليكم ورحمة الله وبركاته

بسم الله ابدا
بنات انا تعبت تعبت تعبت من زوجي والله تعبت وتصرفاته غريبة
من قبل ثلاث سنين وكم شهر بالضبط بدات معاناتي مع زوجي بدا يخون كلام مع بنات وسهر الي الفجر المهم عديت هالمرحله ولكن بعد ما انهرت زوجي طبعا كان رجل ملتزم حلق لحيته وقام مايصلي هذا كان ماضي وما علينا منه لكن هالماضي دمرني
حاليا زوجي لازال يسهر برة بحجه انه في البحر ومايصلي وماخذ ديون باسمي انا ساكته لاني احس اني مقصره معاه لاني انا كنت اشجعه علي الخروج برا البيت لانه دمرني واشعر بتوتر اذا جلس في البيت وامي شكت بالوضع وقعدتني عندها واخوي كلم اخوه بخصوص الديون اللي باسمي علشان يدفعونها وكلم اخوه عن زوجي وشوفوله حل
انا كنت اكلم زوجي بدون علم اهلي مع اني المفروض ما اكلمه لاني زعلانه بس كان يقولي انه مريض وفيه سرطان من سنه وقاعد يتعالج وهذا السرطان جاي من سحر فهو قاعد يتعالج وقالي لاتقولين لاهلي لان ما ابيه يقلقون علي انا صدقته بس لما قلت لامي قالت لي جذاب لاتصدقيه لانه اهو فعلا كذا مره يسوي مواقف ويطلع فيها جذاب فما صدقته
ويدق وما ارد علي اتصالاته
واللي يقهرني ودمرني انه وهو يتعالج في دولة شقيقه عند شيخ انه كان يضحك علي وقالي انه متزوج وحده احلي مني واسنع مني واصغر مني واهي حامل الحين وامه اخطبت له من قبل سنه وكلحين يدق علي ويقولي تعالي ابيج تتعرفين عليها انا اهني انهرت بس تماسكت نفسي وقلت له الله يهنيك ويسعدك بس لاتنسي ورقة طلاقي تجيني لعندي المهم مانمت الليل وثاني يوم يقولي اكذب عليج كنت بس ابي اشوف تحبيني والا لا وحلف بالله طبعا انا هم ماصدقته لان مثل ما قلت لكم زوجي كذاااب
واتصلت بامه وسالتها قالت لي اي قبل سنة خطبت له غصبني وانتي كنتي تقولي له تزوج وانا فعلا كنت اقول له تزوج لاني من الضغط كنت اقول له وكنت مقصره معاه بالفراش بس قلت لها السبب منه مو مني هواللي وصلني لهالمرحلة انا طلبت منه العلاج عند استشارية نفسية بس اهورفض بس وداني مرة وبعدها لا وانا كلمت شيخ عن عدم تقبلي لزوجي قالي يابنتي اكيد بترفضيه من افعاله وانا اخر مره كلمته واهو علي اساس انه يتعالج عند شيخ يتعالج من السحر اللي مسبب له سرطان بس انا للاسف ماصدقته وعلمت اخوي علشان يقول لاخوه بكل سوالفه واعتذر لي وقالي انا اسف علي كل الم سببته لج بحياتك وذكرته انه انت سبب تقصيري ومرضي وانه اهاني بسالفه خطبته وقهرتني امه بسالفة خطبتها لزوجي المفروض تسالني او تنصحني قبل لا تخطب له بس الحمدلله ماصارت الخطبه لانها اشترطت طلاقي وزوجي اكيد مايقدر يطلقني
طبعا اهو برر كل اغلاطه من خطبه وتحليق لحيه وركض ورا البنات انه مو بكيفه بسبب السحر وان شاء الله اذا تعالج بيتغير كل شي انا طبعا ما صدقت انه مسحور قلت يقول عن نفسه مسحور علشان يبين ان الغلط مو منه من السحر
بنات انا الحين زعلانه عند اهلي بس اخاف صج يطلع متزوج انا ما اقدر اعيش مع وحده ثانية فانا بينت له ان تزوجت تجيني ورقة طلاقي والحمدلله في دولتي ان حطيت محامي اقدر اطلق بسرعة واقدر اخذ نفقه وسكن وسيارة وكل شي واقدر ادخله السجن بعد بحكم ديونه والمحكمة دايما مع المراه والحمدلله
مع انه حلف بس ما صرت اصدقه من كثر ما يكذب علي مع ان امه احلفت لي انه ماتزوج بس خطبوا وما صار نصيب
واللي يدمرني اكثر امه اللي نوت تخطب له وبدون اخذ راي يمكن اتعدل او اتسنع من جد اقهرتني مع اني انا وياها علاقتنا جدا ممتازه
واخاف ان ما رديت علي زوجي يعند ويتزوج علي
شوروا علي الله يوفقكم دنيا واخره