من قصائد الرثاء

ياونتي منها ظلوعي حـطاما **** على عشيرٍ بالهوى مات مغبون


شالوه من دار الحياه للعداما **** ومن الحصى وتراب قاموا يكبون


من عقب مالفوه بقماش خاما **** قاموا على بيض النصايب ينصون


مات الحبيب ولا لحق له مراما **** بــالله ياللي تدفنونه على الهون


حطوا نفق له عن سوادالظلاما **** ودي أزوره مـثل ناسٍ يزورون


وأعايده نهار عيد الــصياما **** وأقابــله وارضي عيونٍ يحنون


عساه لا سلمت رد الــسلاما **** وأهـل الهوى والحب لازم يردون


إحساسهم يــصدق بليا كلاما **** وغـرامهم يبقى ولو هم يموتون


أبا أتطوع عند قــبره أعواما **** وش عادلو قالوا الملا:صارمجنون


شبيه خلي فوق كــف النشاما ****حــرٍ من اللي بالمقانيص يهدون


جنسه قليل وغير خلي حــراما **** ويـا علهم عقب الحبيب يولون


من أولٍ اكتم حزين الـــهياما **** واليوم بـاح السد يا للي تعذلون


ويلاه كيف الدود يمحى العظاما **** يأكل جسدمضنون عيني وترضون


ارمو بجسمي مع وفي الغراما **** هــذا العزاء ياللي بموته تعزون


ياراحلٍ لدار الـرضى والكراما **** قل له : عشاشيقك من البعد يبكون


قل له :عيون صويحبك ماتناما **** يــسهر وخلق الله بجنبه ينامون


إما حياةٍ في هنا وإلــــتئاما **** وإلا ممات اثـنين بالعهد يوفون


هيض عذابي نايحات الــحماما **** ظــني بهم خلٍ بفقده ينوحون


حياتنا غطى عليها الغمـــاما **** ( ..... ) عشنا مع اللي يعيشون


لا وا حسافة غاب بدر الـتماما **** تحت التراب حبيب الروح مدفون ..!!



رجاءً : يمنع منعاً باتاً ذرف الدموع ..!!