عمي ساكن في منطقه اصبحت الان شبه مهجوره اذا جو بيحطون عشاهم تجيهم بسم الله من اهل الارض حرمه وولدها ياكلون معهم ويغسلون قدامهم ويمشون مسلمين مايذونهم والله انها حقيقه وكل ماجاعت جت تاكل ومشاءالله عليهم قلوبهم قويه

يالله تعجبني هذه القصص روووعه

كملي احنا متابعينك

من القصص الخرافيه الي سمعنا فيها

انه كان فيه رجال عنده ثلاث بنات ماتت امهم وتزوج وحده وقالت شرطي انكوترميهم وبنته الصغير متعلقه فيه لدرجة انها ماتنام الا وهي ماسكه بلحيته وفي ليله من اليالي اخذ بناته للبر ويمشون ويقطعون جبال ومسافات وكان مع البنات( جرو) ويسالهن ابوهن كل ما عدو جبل قال تعرفن ذالمكان قالن ايوه ذا الي ضيعت امنا ابرتها فيه ومشى فيهم مسافه ودخلو وادي وسالهن تعرفن ذالمكان قالن ايوه هذا الي انقطعت عبات امنا فيه ومشا بهم مسافه ودخلو شعيب وسالهن تعرفن ذالمكان قالن لا مانعرفه قال خلاص خلونا نبات هنا والصبح نكمل طريقنا ونامو ونامت بنته الصغيره وهي ماسكه لحيته وقام وقطع ذنب الكلب وحطه فيدها وراح وخلاهن
وجاء الصبح قامن يدورن ابوهن ومالقينه وراحن يمشن مسافه وماعرفن طريق الرجعه وضاعن وحسن بالجوع ولا ذيك الشجرة التفاح المثمره وقالن الثنتين الكبار لختهن الصغيره حنا بنطلع نقطف تفاح وياويلك لو تاكلينه قالت وحده ولو تاكلين تفاحي كسرت اصبعك وقالت الثانيه لو اكلتي من حقي فقعت عينك المهم تسلقن ويرمن عليها التفاح وكلت من عند كل وحده حبه ونزلن وعدنها وطلعت ناقصه وحده كسرت اصبعها والثانيه فقعت عينها وراحن وخلنها وقعدت فمكانها وجاعت وتسلقت الشجره واكلت من التفاح لين شبعت جات بتنزل ماقدرت
وبعدين جلست على الغصن تنتظر احد ينزلها وهي تنتظر جالها السعلو ونزلها وكانت هزيله واخذها لبيته عشان بيربيها وياكلها كبرت البنت عنده وتخدم عليه وصارت جميله وشعرها طويل ودايم تمشطه وهي جالسه على طرف البير وفيوم منرالايام جات لها البومه وتسالها ليش انتي دايم حزينه قالت لان عمي يربيني عشان بياكلني
قالت عندي لك خطه اذا جا عمك قولي له طاح مشطي فالبير تعال واذا جا يشوفه دفيه فالبير وسوت مثل ماقالت لها البومه ودفت السعلو فالبير وشردت ولاذاكرالشاب الوسيم الي يمشي وشافها واعجبته وكان غني واخذها وتزوجها وجابت ولد وفي يوم من الايام طلعت تمشى بسوق القريه وشافت خواتها ونادتهن وسلمت عليهن وعزمتهن فبيتها ويوم جاء وقت الزياره قامت بخرت بيتها وطيبته وخبت ولدها عنهن وجن خواتها وشمن ريحة البيت واعجبتهن وسالنها من وين جبتي ذالريحه الزينه قالت ذبحت ولدي وعطرت بدمه الجدران والاثاث ورعن وذبحن بناتهن ورشن الدمامين على الجدران ويوم جو ازواجهن وشافو بناتهم ميتات ذبحون الحريم وعاشت البنت الصغيره في ثبات ونبات مع زوجها
وخلاصنا هاذي القصه حكتها جدتي لمي وامي حكتها لنا وانا اقصصها لابنائي الاعزاء وماعندي غيره كل ماقالو قولي لنا قصه قلتها لهم

تسلمين على ذالموضوع المميز

ذكرتيني بقصص جدتي الله يرحمها كنا صغارونسمع وحنا مبققين عيوننا من الحماس ومصدقين
كان هذا مسلسل السهره حقنا واروح بعدها انام وانا يوم خايفه يوم ميته ضحك يوم ضايق خلقي وكله على حسب جو القصه
واكثرقصه حزنتني الولدسرورالي ذبحته مره ابوه وطبخته جلست ايام ضايق خلقي احسبه حقيقي