من قفص العصافير . . . مزهرية مبتكرة . . !!

مرحبا يا بنات ....


أنا ما راح أتكلم عن نفسي وايد .. ، جوفة عيونكم قفص مكسر وعاجز
ومسكين .. ، راميني بالشارع ولا أحد سائل عني دايما تلاقوني تحت
ريول الناس ..




وأكيد ودكم تعرفون شنو إللي وصلني حق هذا الحال المؤسف ..
أنا كان يسكن داخلي أحلى بلبل بالعالم يا حلاة صوته وتغريده
ويا حلاة رشاقته لما يتنطط داخلي كان مالي علي الدنيا ..
وعلى الأقل الناس كلهم كانوا محترميني بوجوده .. !!
بس للأسف هالبلبل الحلو طار..
وظليت أنا بروحي شي زايد بالبيت ماله فايده .. ، وشنو سووا
أهل البيت إللي كنت عندهم .. الله يسامحهم .. رموني بالشارع
تحت الشمس إللي ما في بقلبهم رحمة .. !!
يعني أنا شنو ذنبي إذا البلبل طار؟ ليش لازم يهملوني؟!


بالصدفة جافتني هنايا بقايا قفص مكسر .. ، خذتني ونظفتني ،
وفكرت شلون تخليلي أهمية بالبيت وبالحياة ..
وقررت تحولني حق مزهرية روعة ..!!
وأكيد راح تتساءلون شلون تسوي هالمزهرية ، وأنا مثلكم بالبداية
ما استوعبت وقلت أكيد قاعدة تتمسخر علي ليش إني صرت مجرد حديدة
ما لها أهمية .. ، بس لما بلشت شغل بديت أستوعب ..

بالبداية قصت الحديدة الأفقية إللي توصل بين الحدايد العمودية .. ، وخلت
بس الحديدة إللي بالنص .. ، وشالت بعد المسكة أة العروة إللي يشيلون
فيها القفص . .



وبعدين جمعت الحدايد إللي على الجوانب على الحديدة إللي بالنص ولحمتهم
بالكاوية ..
وما أقدر أوصف لكم الألم إللي حسيت فيه مع القص والقطع والكاوية . .
نفس ألم الأسنان لما يشيلونها أو يحشونها . . ، حتى إني شكيت فيها
طبيبة أسنان . . !!





وخذت أثنين من علاق الملابس فتحت العقد إللي فيهم . . ، ودخلت أطرافهم
في بعض يعني برمتهم على الأطراف . .
ودخلت الطرفين بالحديدة إللي بالنص إللي خلتها فيني ، دخلتهم على شكل
حلقة . . ، بيني وبينكم . . زين إنها خلت فيني شي صاحي . . !!



وما صدقت نفسي شلون صرت . .



وبعدين ثبتت بالشمع اللاصق حبل صوف أو ليف على علاق الملابس
إللي ثبتت فيه المزهرية . .



وصبغتها باللون الذهبي . . ، وطبعا خنقتني ريحة الصبغ . . !!
الله يسامحج يا هنايا لعوزتيني . . !!





وسوت هنايا بعض الاكسسوارات المميزة مثل شرايط من الورق
هذا إللي يحطونه مع الهدايا . . ، أكيد عرفتوه . . ، وكور صغيرة
وورق دانتيل .. وسنابل صناعية . .
صبغتهم باللون الذهبي . .






وورق الدانتيل ثنته على شكل مثلث وعفسته شوي من تحت
وثبتته بالدباسة وصار على شكل منديل حلو وايد . .






وأخيرا حطت فيني الورد الجاهز الحلو . . ، ما بغت تيي هاللحظة نطرت
ها وايد . .!
وبالنهاية طلعت مزهرية مبتكرة روعة . .على شكل سرير بيبي . .
يا سلام عليج يا هنايا . . ، نصيرة بقايا الأشياء المظلومة . .



أحبج أحبج موت يا هنايا . . ، لأنج نقذتي ما يمكن إنقاذه من قفص
مسكين كل ذنبه إنه كان في يوم من الأيام يسكن داخله بلبل حلو . .