من قلب مجروح الى قلوبكم الصادقه

السلام عليكم ورحمة الله وبركاته

انا مش جايه اليوم اكتب هالموضوع علشان ابي اكسر خاطر احد أو ابي دعوة أو ابي امدح بنفسي انا جيت انثر مشاعر واحاسيس خنقتني لحد ما فاضت وتعبتني لحد ما خارت كل نقطة قوة فيني كنت اقدر اكتبها واحتفظ فيها بس حبيت انشرها لان ادري في غيري كثير يحسون بنفس احساسي يمكن لو كل وحده فينا سمعت كلمة تجبر الخاطر من الثانية يخف ولو قليل مقدار الألم ..

يمكن كلكم تسألون وش تقول هاذي وش الموضوع اللي جايه تتكلم فيه بس انا من ضيقي مااقدر ارتب الحروف ولا ادري كيف اجمعها والمصيبه مااقدر اقول لاي شخص حولي لانه الكل يعرف عن هالبنت انها قويه وعاقله ورزينه مستحيل ابين ضعفي لحد .

الموضوع ومافيه هو ولد الحلال .. يابنات انا مالي حظ ابدا في هالموضوع لا تقولون نصيب والله كريم هذا كلام اعرفه ومؤمنه فيه الحمد لله وعندي يقين تام انه الله اذا بيوفقني راح يرزقني بانسان جدا ممتاز يجبر بخاطري لانه نيتي صادقه وان ماانكتب لي هالشي فأنا احمده واشكره واشعر بالامتنان ربي رزقني وعطاني اشياء كثيره احمد ربي عليها وانا على يقين انه ربي العادل اللي وزع الارزاق على كل هالناس ما ظلمني .

بس يابنات انا تعبانه ويائسه من هالدنيا مرات احس اني ابي اموت وارتاح من زن العالم حولي وحتى قبري ما ابي يكتبون عليه اسمي ماابي شيء يذكرني بهالدنيا .محتاجه انسان بجنبي يحسسني بوجودي انا وحيدة كل البنات اللي حولي راحو بطريقهم وانا ظليت وحيدة . انخطبت كثير كثير كثير بس كل مره ما اتوفق . كل مره اقول يمكن هالمره غير وانجرح صرت احس انه فيني نقص . فشلت في اني افرح اهلي وانا المفروض أول فرحتهم مرات اوسوس واقول انا وش فيني غير البنات ليش ما اتوفق بس خلاص تعبت وينه هالانسان اللي ممكن ينسيني كل ايام الوحده . علقت كل السعاده عليه.

تدرون البارح كان عندي موعد بالعياده وجلست وسندت راسي على الكرسي وكنت لحالي سرحت بعيد وتذكرت انه مو لازم اكون بيوم من الايام عروسه ولا من الضروري اكون ماما ولا لازم اجهز وانا مبسوطه تعتقدون ضروري تكوني بحضن انسان تحبينه ويحبك يكون سندك وعزوتك بالدنيا يحميك ويكون لك ستر مو ضروري صح وماانتبهت لنفسي الا دموعي تنزل بحراره على خدودي لدرجه كان في واحد جالس مقابلني احس اني عورت قلبه .
وقيسو عليها ليالي طويله بدون نوم وايام الاكل فيها ما ينبلع حتى . واللي يقهرني انه اذا جاني واحد فيه كل المواصفات اللي ابيها يطلع لازم لازم فيه شيء اما ماارتاح له او احسه مو مهتم بالخطبه أو أو ......
وش الحل ماادري حاولت وجاهدت نفسي كثير اني افكر واصيغ حياتي بدون زوج مو قادره تمر ايام اكون صابره اروح واجي واضحك حتى لو كان القلب مكسور وتجي ايام الدموع ما تفارقني الخنقه بحلقي واحس بألم بصدري حتى النفس آخذه بألم .
ولا تكلموني عن اهلي قلوبهم متقطعه عليّ وهذا اللي كاسرني مو قادره اسوي لهم أي شيء . انا الحين تقريبا خلاص استسلمت انه ربي يمكن كتب لي السعاده في الآخرة بس خايفه من اشياء كثيره ..
خايفه اضعف واخطأ في يوم من الايام وانا اللي حافظت على نفسي سنين
خايفه من نظرات الناس وتساؤلاتهم ليش ؟ لدرجه صرت مااحب الجمعات والزواجات.
خايفه اعيش وحيده طول عمري .
خايفه اكسر خاطر اللي حولي ما ابي يقولون مسكينة .
ماادري ....وضع متعب احس اني ضايعه وتايه ابي حد يحمل معي مسئوليه نفسي .

في حد يحس باحساسي والا انا مريضه نفسياً او مجنونة علموني ........