انا متأخره بالحمل ذي سابع سنه زوجي عنده ضعف بالعدد والحركة اذا تعالج العدد يكون ممتاز بس الحركة مكانك سر مع ان ماشاءالله كل شي تمام عنده وماعنده دوالي يعني ماعرفنا سبب الحركة ليش ضعيفه
وانا عندي ضعف بالتبويض وضعف بالأنابيب بس رحت لدكتور ممتاز مشهور طبعا وقالي الانابيب سليمه عندك لان كان فيها انسداد وبعد اشعة الصبغه انفتحت بس بقيلك ضعف التبويض ومع المنشطات ح تكون تمام وسوينا تلقيح صناعي وفشل والحمدلله ع كل حال غير الخلطات بالاعشاب والعسل استخدمناها بس ربي مااراد للان وبعدها ماعاد رحنا أي مكان سلمنا امرنا لله يرزقنا من واسع فضله الله اكرم الاكرمين يابنات لاتيأسو من رحمة الله وكل تأخيره وفيها خيره لايؤخر الله امر الا لخير اوصيكم ونفسي باللجوء لله سبحانه وتعالى من قيام ليل ودعاء وصلاة الضحى ودعاء زكريا ويونس عليهم السلام والاستغفار وانا متأكدة وواثقه ومؤمنه ومتيقنه ان الله راح يرزقنا قريبا واجي ابشركم ان شاءالله

استغفر الله وأتوب اليه

لا إله إلا أنت سبحانك أني كنتُ من الظالمين

اخواتي الغاليات مافيه شيء مستحيل عند ربي

اقول لكم قصتي وانا اعطيت نفسي وعد ابلغكم بما حصل لي

انا مجنونه اطفال ..اعشقهم بجنون

قدر الله وتاخرت ثلاثة سنوات عن الحمل

لكن والله اصعب ايام وليالي مرت علي
انا كانت الدوره مو منتظمه عندي من قبل الزواج تتاجر سنه او سته اشهر
لما تزوجت راجعت عند الدكتورة احسان بخش والله يسامحها على الى سوته في حطمتني وخلتني اعيش بهم
اول يوم زرتها بالعياده قالت لها دكتوره انا ما ابي الحمل انا ابي انظم الدوره لانها متعبتني نفسي وجسدي قالت اوك سوي التحاليل ونشوف
طلع عندي هرمون الحليب مرتفع واعطتني دواء وابر نوع من الابر كلفني 2000 ريال وكانت ظروفي صعبه الماديه رحت وبعت من ذهبي بي اهم شيء اتعالج وكل ما اجيها العياده تعطيني ابر تفجير وما تنفجر البويضه وانا كنت جاهله بالابر وخطورتها قالت خلاص كبرت البويضه زياده عن المعدل الطبيعي ولازم تاخذي حبوب صرفت لي الحبوب ولما رجعت البيت حصلتها حبوب منع الحمل جلست ابكي انا ابحث عن الحمل وهذي تعطيني حبوب منع حمل
قالت انتي ضروري تسوي عملية وتنحتي جزء العلوي من المبيض لان البيوضات ماتطلع
وموعدك السبت للعمليه والا ماراح تحملي طول عمرك
طلعت الدنيا ضايقه فيني ماكملت السنه متزوجه وهذي تقول لي كذا
تعبت مره من الم المبايض بسبب الابر الي اعطتني
رحت لدكتوره ثانيه الله ينور طريقها ويريح بالها
سوت لي تصوير وجلست تخاصم من الاكياس الي سببتها لي الابر قالت ضروري تنزل الدوره عشان تروح الاكياس
وانتي بدري عليك عروس روح اتهني بحياتك واذا ماحملتي تعالي نسوي فحوصات
رجعت لها وطلع عندي تكيس مزمن والهرمونات كلها متلخبطه صرفت لي الجلوكفاج وهذا العلاج ممتاز جدا للتكيس
جلست عندها شهرين وتركتها لان الظروف ماتسمح اني استمر
وبعدها قلت بروح لطبيبه شعبيه تمرخني رحت وياليت مارحت قالوا لي تعطي علاج للتكيس اعطتني اعشاب سببت لي نزيف لمدة 21 يوم اتصلت عليها قالت روح لدكتوره توقفه قلت حسبي الله ونعم الوكيل
بعدها صارت تنزل علي الدورة كل ثمانيه ايام تخيلوا هذي الفتره تعبت جدا استمريت على هذا الحال ثلاث اشهر
كرهت الدنيا كلها ما ابي شيء بس ابي العافيه وارجع طبيعيه
وفترة الثلاثه الشهور ما خليت دكتور ولا دكتوره ما رحت لهم ابي ارجع الدوره مثل قبل تعبت من حبوب التنظيم ولو اتركها ترجع كل ثمانيه ايام
رحت لدكتوره ماجده الله يسعدها قالت لي سوي تحليل هذا لخبطه في هرمون التكيس LH
وفعلا طلع 26 والمفروض يكون عندي 6
استمريت على العلاج وحبوب الجلوكفاج والحميه اخذتها من المنتدى هنا ونزل الى 15 وبعدها 8 والحمدلله والشكر
قلت لها ابي منشطات عشان الحمل قالت لازم زوجك يسوي تحليل سوينا التحليل ولما شافته قالت انتي تبي تحملي من الهواء هنا الصمه الكبرى لي صاعقه نزل كلامها على مستحيل تحملي وهذي تحليلكم
راح زوجي لدكتور وصرف له علاج لكن التحسن كان بطي جدا
رحت لطبيبه شعبيه تمرخني وقالت لي ماراح امسك بطنك انتي علاجك عند الشيخ وبالرقيه والقران تشوفي الخير يابنتي انتي فيك حسد قوي
سمعتني كلام كثير ونصائح طلعت من عندها ابكي احترت اصدق الدكاتره او اصدقها
رحت للشيخ وجلس يرقيني انا وزوجي زوج ما تاثر لكن انا تعبت بالمره استمريت عنده اسبوع وقال خلاص لا ترجعي وراح تدعي لي استمري على شريط الرقيه
تاخرت الدورة شهر وقلت هذا مو حمل ابد
الشهر الثاني جاتني واول مره تجيني بدون حبوب وبعد تاخر شهر لاني متعوده تتاخر 6شهور
حمدت ربي انها نزلت بدون حبوب قلت بروح اسوي عند الدكتوره الصبغه
لما رجعت لدكتورتي الثاني الله يسعدها قالت بدري على الصبغه خلينا نسوي كورس تنشيط لك ولزوجك
قلت توكلي على الله وسوي لي
ما كان فيه شيء جديد بالعلاج منشط غذا ملكات النحل لي ولزوجي وحبوب للزوجه عند زوجي
وكنت مستمره على الجلوكفاج من شهور ما اتركه وكنا نشرب البرقدوش
اول متابعه للبويضه قالت جدا صغيره الوضع مايطامن كنت ابكي وزوجي يهديني اذا ربي كاتب شيء بيصير لو ماتعالجنا كملي متابعه ونشوف مو خسرانين شيء
كملت ولما وصلت البويضه 19 اعطتني ابره تفجير والحمدلله اول مره تنفجر عندي من 3 سنوات
قالت ان شاء الله ربي يكتب لك الخلف الصالح خذي الدفاستون واذا مانزلت الدورة تعالي حامل
رحت وكملت شهر ونصف مانزلت الدورة
مارجعت ولاحبيت اتحطم قلت اكيد تلخبط هرمونات كالعاده
لما بداء الوحام والتعب شكيت وحللت وطلعت حــــــــــــــامل
والله يا اخواتي كل التعب والهم راح في ثواني لما شفت التحليل
انا طولت عليكم لكن حبيت اشرح لكم انه كل شيء بعد الصبر والدعاء والصدقه وقيام الليل يتحقق
واهم شيء البكاء في السجووووود مع الاستمراركل ليله والصيام وكلمه لاحول ولا قوة الابالله
والله يرزق كل محرووووووووم يارب ويفرح قلوبكم بالذريه

الامومه شي عظيم واللي تحمل وتجيب تحمد ربها انو عطاها هالنعمه العظيمه
بالنسبه لشعوري 9سنوات من الانتظار والتعب النفسي والمادي والجسدي شعور مؤلم جدا جدا جدا اللهم لك الحمد
الحين باديه بمنشطات وضايق صدري اخاف من الفشل كالعاده اللي تشوف رسالتي هذي تدعيلي تكفين ادعيلي