من مثل حالتي مع اهل زوجها تدخل تواسيني :(

اخواتي بقول لكم قصة حياتي باختصار انا تزوجت وعمري 18 توني متخرجة من الثانوي والحين عمري 22 وتخرجت من الجامعة وعندي ولد .. المهم انا لما خطبني زوجي وسألنا عنه عيال عمه وخواله قالوا لنا الولد مايعيبه شي وماعليه بس اهله جدا قويين ونصيحة اذا تبون بنتكم ابتعدوا .. وامي كانت مو راضية عن زواجي تقول اذا الرجال اهله قويين ابتعدي لو فيه مزايا الدنيا والله بيغربلونك .المهم انا تزوجت وقلت اهم شي الولد وامه مو كل يوم بشوفها خصوصا ان لي شقة فوقهم . تزوجت بشهر 8 وبعدها دخل رضان واكتشفت انهم يتداورون بالفطور حريم العيال كل يوم على وحدة امنت بالله واخذت معهم فطور قلت مثلي مثلهم وكانوا اهله ماياخذون معنا فطور وعنده خوات اكبر مني وماتزوجوا كانوا يجون ياكلون ويطلعون .. ولما ناقشت زوجي قال اخوي الكبير حالف انهم ماياخذون .. يحلف على حسابنا حنا ! المهم كنت افطر حول 20 شخص حريم ورجال وكان يجيني كل اربع ايام وكنت اتعب كنت صغيرة وكانت ام زوجي كل ماتجي تعلق على شي ليش زبالتك برا ليه ماتزلينها بالشارع . ليه تشترون من المطاعم . ليه تغسل ملابسك عند المغسلة ليه انا مزوجتك وزوجي كل ماجاهم الا هو متنكد وتهاوشنا . حملت بولدي وكنت ادرس تحضيري مااطلع الا خمس واتعب كثير وكنت كل يومين انزل قهوة لهم والله مااذكر احد قال شكرا يعطييك العافية . سكت وكنت اخذ غداء جمعة ايه وجمعة لا وكان يكون عندي اختبارات السبت وكتابي مفتوح وانا اقطع بصل وولدي يبكي عمره شهور وتمرمطت مادري وين احطه اعتذرت مني ام زوجي قالت انا مااصحى الصباح دوري له حضانة . حطيته بحضانه قلت فغلا محد ملزوم يمسك ولدي.. نزل مستواي من الهموم . قررت احط ولدي عند امي اسبوع واخذه بالويكند. كنت اشتاق له وانقهر انها تحتي وماقالت جيبيه عندي . المهم ملكوا خو ات زوجي ومادريت الا من الناس . حضرت زواجاتهم وباركت ورقصت كله عشان مابي الناس تتكلم وتقول بيننا مشاكل . طبعا وضعي اهون من الباقين شوي انا زوجي شوي متعاون مو زي الباقين . تخيلوا اول زواجي اذا صار عزيمة نصير عندهم لانهم البيت الكبير وحنا شقق كانوا حريم العيال ينزلن كل شي من الشقق من الصحن الكبير للملعقة وكانت الشغالة ام زوجي تقفل عليها الغرفة عشان ماتساعدهن . كنت منجنة من الوضع . ليه ياربي الجارة تعطي جارتها شغالتها عشان تساعدها كيف حريم عيالي . المهم اذا طلعنا للبر حنا نكرف ونشتغل والبنات عند اخوانهن حتى الاكل ياكلون معهم . تقول شغالات ولا ثناء ولا شكر . مرة قالت لي ام زوجي ترا اذا ولدي طاير فيك ترا كلها سنتين 3 ومصيره يمل ويرجع لامه وخواته . خوات زوجي كلهن اكبر مني تزوجن ولا وحدة عبرت اهل زوجها ولا يروحون لهم ولا شي . وهي لو يمر اسبوعين ماجينا قلبت الدنيا فوق راسي . قبل كم اسبوع طلعنا للبر وكنت انا ووحدة من حريم العيال معهم . هي سوت الغداء وانا قعدت لحالي بالخيمة . كلهم عند اخوانهم وامهم معهم وانا لحالي . عالاقل لو مااستحوا مني يخافون من اللله على هالفعل . رجعت بيتي وبكيت وسكت . قبل اسبوع سويت حفلة تخرجي وعزمتهم كلهم ومحد جاء فشلوني عند اهلي وقرايبي ولا قدروني . وانا كنت احضر اجتماعتهم وانا ماانعزم اقول انا من اهل البيت مو لازم عزيمة واقدرهم عشان الناس ماتتكلم . المهم البارح قلت لزوجي بنزل اتشره عليهم ليه ماجوني وقدروني . قال ان نزلتي تدلين بيت اهلك . اهلي ماراح اقدر على مواجهتهم وبيقلبون علي فكيني وبيطلعون العيوب فيك .اخواتي انا اللي قلته ولا شي اقسم باالله . انا مستحيل اصير زي الباقيات حقوقهن مهمشة ولايقدرن يقولن ولا كلمة ومالهن سند .افكر اروح لاهلي والله يعوضني بزوج كويس واهل زوج طيبين واعيش حياتي . خمس سنين جحيم من حياتي . طبعا ام زوجي اخوانه قاطعين فيها وولايجيها لاعيال خوات ولا اخوان ولا احد . ارجوكم شوروا علي . وكل وحدة تحط نفسها بمكاني ارجوكم