بسم الله الرحمن الرحيم
السلام عليكم و رحمة الله و بركاته:27:
موضوعي اليوم من تجربتي و يارب يفيد الكل خصوصا الي على وش زواج او ببدايته مثلي و للكل عموما مزوجات او غيره
كلنا لنا عيوب و اخطاء و اطباع شينه الانسان مهما كان زين مهو كامل
احد العيوب الطيبة الزايدة لانها تنقص من الحزم المطلوب
نصيحة لكم لاتعطون كثيرا فتندمون كثيرا و هذه حكمة اظنها من الخليفة علي رضي الله عنه وكرم الله وجهه
بكل شي مو بس بواجبات الزواج
حتى بالبيت و بالوظيفه ومع الناس سواء حمولة اصحاب اقارب زميلات
لاتعودون احد ان شخصيتكم جدا معطاءة و مره شفت ببرنامج اوبرا انه فيه مرض اسمه داء ارضاء الاخرين و هذا ناتج من نقص بالشخصية طبعا راجع لسوء التربية او لامر اخر
لانك اذا وقفتي او قللتي الطيبه فجاة بيستنكرون هالشي منك بس بالتدريج رجعي مقدار الطيبه لنصابه
مثلا خلونا ناخذ الزواج لاتكرفين روحك زيادة عن اللزوم صحتك الزم ما عليك لاتعودينه البيت يلق كل يوم
لاتعودينه تشترين من الرخيص اذا ماديته زينه ترا بتملين من المجاملات و بيجي يوم تبين تكشخين حالك حال السلايف بيوديك المراكز المخفضه حتى ارخص المولات و الاسواق بيشوفها تخب عليك خصوصا الادوات الكهربائية اشتري الزين عشان يعمر معاك مو شرط اغلا ماركة
لاتزرعين براسه ان اي شي تسوينه عشانه و انه مركز الكون و انه محور حياتك و انك بدونه ما تسوين شي
لا انتي تسوين و زياده عشتي بدونه عمر طويل منتي ناقصه كرامة او عقل كل شخص يقدر يعيش بروحه سعيد اذا قرر السعاده و يقدر يعيش بتعاسه اذا قرر التعاسه لو هو مع كل احبابه
لاينفهم كلامي غلط اني احرض واحده على خراب بيتها او تطلب الطلاق لانها تاذت من زوجها خلاص جيل الابهات خلص كلما والاجيال تخرب و الله يعينا احنا الحريم لازم نصبر نرقع شنو ولا شنو خلوها على الله تعالى وهي تطيب
الي اقصده خلي لك شخصية لاتلزقين فيه و تخنقينه خليه يطلع و يروح و يسهر بحدود مع ان الجيل هذا مدري شفيهم على السهر الكثير شكلها ظاهره لين شافو الامر عادي مالنا الا الدعاء لهم و ان ربنا يسخرنا لبعض و يصبرنا على بعض
مع حمولتك لاتعطين وجه زياده و تظنينهم اهلك هم حمولتك مو اهلك اختلفت المفردات اكيد لازم تختلف المعاني
لاتهذرين باول الزواج كثير خلي بريك على لسانك حتى لوانتي من النوع القرقه او الي يحب يعبر كثير عن تفاصيل يومه
ليه ؟ من يتكلم كثيرا يخطأ كثيرا غير انهم لابد يعرفون كثير من تفاصيل حياتك من هذرتك و بعض او الكثير من الامهات يحسون بالغيره فتغار ليه طلعك و ليه شرا لك و ليه و ليه
لاتعلمين بعيوب شخصيتك قدامهم او قدام أي احد الا الثقه الي تبين النصيحه منه بكره يكبرون هالعيوب بعيون زوجك عاد تعالي اكليها عدل اذا صارت زعلات و خلافات بيعطيك مواويل فيها
باسعار ملابسك لاتعلمين قولي ما اذكر بالتحديد بس السعر مناسب لان الكثير من الامهات تحاتي راتب ولدها وراك اجار و مستوصفات و اقساط سياره و مدارس ووو
لاتعطين اهله فرصة للتدخل بخصوصياتك دايما قولي الحمد لله حتى لو الزعله كبيره بين زوجك و بينك لاتعطينهم فرصه للتدخل و لتكبير المواضيع استعيني بالله تعالى و ثقي فيه و ترا كل البيوت يصير فيها بلاوي و سخافات و الله الي يطيبها و الله مو احنا ياما حاولنا نرقع اخربت اكثر
تعلمي من اخطائك امسكي ورقه و قلم واكتبي و حللي سويت كذا صار كذا اجل لا تمشين بنفس الدرب عشان لا تخطين نفس الخطا مره ثانية
مثلا درب مشيتيه و وصلتي لووحة مكتوب عليها مسكر او الطريق مغلق تجين و تردين و تمشين على نفس الطريق
شنو النتيجه اكيد نفس الغلط ماراح تطلع لك لوحة جديده
ان الله تعالى لايغير ما بقوم حتى يغيرو ما بانفسهم
حتى عيالك لاتعودينهم انتي الي تطبخين و تقدمين و تشيلين عقبهم
حتى الي عمره سنه كلميه قولي له تعال حمودي جب الملعقه و امسكيه بايده و اخذيها منه و حطيها ويا المواعين
حتى الي عمرهم سنتين و ثلاث كل واحد يشيل صحنه طبعا راعي ثقل الصحن علميهم على الخفايف من المواعين و بالتدريج يشيلون صحونهم حتى لو فيه خدامه لانك قاعده تربين زوج المستقبل لواحده من بنات الناس و بيصير ابو و بيربي عياله على ما ربيتيه
ترا و الله بكره بتاكلينها انتي حتى لو فيه شغاله بتحسين عمرك راح كنك خدامه انتي الي تربينهم على الاعتماد على الذات و انه تكون لهم شخصية مستقله
و الله فيه عيال مع انهم من اسر بسيطه بس اتكاليين
و فيه عيال عز بس يعتمدون على حالهم
ليه لانهم قالوها لوما المربي ما عرفت تربي
تعلمي مفاهيم كل شي عدل و بميزان مضبوط
انتي لو صرتي ام مو معنى هذا انك تكونين مكينه تلمين ورا هذا و ترتبين ورا هذا
اكيد فيه جدول لك للتنظيف و للترتيب الي اقصده العفسات اليومية
علميهم يصفطون بطانيتهم و يطلعون ملابسهم الوسخه و يخلونها بسلة الغسيل زبالة الغرفه ونتم بكرامه كل يوم يفضونها يفتحون الشبابيك يوميا شوي و يسكرونها بعد نص ساعه
اذا ارسمو او اكلو يلمون قراطيس الشبس الكاكاو و العصاير بعدهم
حتى زوجك عوديه مثلا قولي له حبيبي اذا فسخت ملابسك حطهم بالسله روحي انت ،لاتعطين اوامر الرجال الكلمه الحلوة تسبيه
كل شي تبينه بعون الله يصير بس بالتدريج و بالطرق الغير مباشره
اكتشفت ان الطرق الغير مباشرة تصيب اكثر و اسرع من الطرق المباشره
بس فيه امور اكيد لها طريق مباشر
هذا الي عندي الحين و أي اضافات ماراح اقصر فيها ان شاء الله
مع لقاء جديد بعون الله و رحمته و رضاه مع موضوع من مواضيعي
كتبت هاكلام يا ربي لوجهك تعالى فتقبله قبولا حسنا و بارك فيه
بنات أي اضافات تنور الموضوع لاتبخلون فيها علينا
نوروا الموضوع بتجاربكم و حكمكم :39:
يلزم عليك تسجيل الدخول أولًا لكتابة تعليق.
ღˆ¨°ღ♥الهنوفღˆ¨°ღ♥
•
وربي كلامك درر الله يعطيك كل العافيه استفدت منه كثير
دره0555
•
مع اني ماقريت كلامك كله
لاني من النوووع الملوووول لقراءة المواضيع الطويله
بس الي قريته عين العقل وكلام ماعليه غباااااار
يعطيكي ١٠٠٠ عاااافيه
لاني من النوووع الملوووول لقراءة المواضيع الطويله
بس الي قريته عين العقل وكلام ماعليه غباااااار
يعطيكي ١٠٠٠ عاااافيه
الصفحة الأخيرة