من مرّت بنفس مشكلتي ( مشكلة زوجية ) !

مساء الخير،

بكتب لكم مشكلتي ، واتمنى ألاقي عندكم الحل.

صارلي متزوجة 6 شهورتقريباً ، زواج تقليدي هو ولد عمي..
الزواج صار بعد ما خلصت جامعة على طول، المهم ما ادري ليش انا نفسياً ما قدرت آتقبل زوجي
بحكم انه ولد عمي ما تخيلته ف يوم من الايام يكون زوجي ولا كان في بالي اصلا الموضوع صار فجأة حتى استغربت انه اختارني بنفسه.
بس مشت الامور استسلمت لنصيبي مع العلم ما كان فيه عيب عشان ارفضه.
لكن للان مش قادرة استوعب انه في شخص ثاني يشاركني حياتي ويبي يعرف عني كل شي ، خصوصاً اني كتومة جدا و عشت وحيدة يعني ماعندي خوات قريب من عمري او حتى صديقات مقربات.
دايما فالبيت لي مملكتي وعالمي الخاص.

بالنسبة لزوجي ماقدرت احبه او احس بالعاطفة القوية تجاهه كأنه شخص عادي ، ماعندي دافع اني اهتم فيه او اسأل عنه.
ماقدر اقوله كلام حلو .. لان ما آحس بشي ،، اجامله بس اذا طلب و ألح علي.
هو عكسي يحب يهتم يسأل كثير يتصل كثير ( غالباً ما ارد عليه ودي اختلي بنفسي اغلب الاوقات) ، رومنسي ، ما يرفض لي طلب و الخ.

انا شخصيتي احسها صعبة، يعني انا عقلانية كثير في اشياء كثير استسخفها او استسخف اني اسويها لزوجي.
اللي مزيّد معاناتي انه هو يلح كثييير ويحب الاهتمام .. يعني يهمه يسمع كلام حب وانا ماقدر حقيقي ماقدر ماتطلع مني و تحت ضغط الالحاح تطلع مني بالغصب.
عادي عندي ما اهتم فيه او اخاف عليه او حتى اسأل ، يعني بمزاجي متى مافضيت و روقت ممكن اكلمه غير كذا لا ،، و هو من النوع اللي محاصرني يبيني ع طول الفون فإيدي ارد عليه واكلمه.

هو زعل مرة مني، السبب : قالي انتي مو رومنسية وما تسألين عني وماتردين على اتصالاتي، و حاول يفهم السبب ماقدرت اقول شي.

للعلم احس اني لو كنت مع شخص ثاني غيره شخصيتي و تصرفاتي بتكون آفضل بحبه وبتعلق فيه. هذا الشعور اللي احس فيه. افضل لو كان غريب واكتشفته بس لانه ولد عمي الشغف لاستكشاف الطرف الثاني انفقد.

اتمنى تساعدوني ليش احس ب هالشعور ؟
واللي مرت بنفس المشكلة كيف قدرت تتجاوزها !!