السلام عليكم ورحمة الله وبركاته
صور من حياتنا اليومية ..
سلسلة : من حسن اسلام المرء تركه مالا يعنيه
في حديث الرسول عليه الصلاة والسلام قيم كبيره ومتنوعه وتهذيب للنفس البشرية
حتى لا ترمي انفها في كل امر وكل خبر
واقول تهذيب لاني اعرف اللي يعود نفسه على العكس وكأن الامر فخر وليس عيب
- فلانه انخطبت .. صدق .. ما قالت لنا .. وش دراك ؟ .. شفت سيارات جنب بيتهم .. طيب من العائله ؟
مدري بس شكلهم اغنياء مره ومهرها كبير ..
ويمر اليوم .. والاسبوع .. والشهر .. والشهرين .. والثلاثة .. ويوصل للبنت عقب ما دار الكلام ورجع انها مخطوبه ..
ابشركم للحين هي ما درت !! لان السيارات كانت عزيمة عند ابوها وكانت تكرف لان ماعندهم شغالة .. وسهرت الليل تغسل في المواعين
وتنظف في البيت .. لا خطبة ولا هم يحزنون ! لا والناس شرهانين هههه .. اول من شره اللي كذب الكذبه وصدقها !
شر البليه ما يضحك ..
وتتضايق البنت .. وتنقهر .. وتعيش جو مريض من الألم واحساس انها عايشه في مجتمع مريض ..
تبكي .. تشكي .. تبعد وتعيش الم البنت العزباء اللي ما تعودت على الكسر
مع خجل مالها ذنب فيه لمجرد انها كانت بطلة لإشاعة
ثم تنخطب صدق .. من رجل كفؤ لكن في بداية حياته .. وتسكت .. للان عايشه مأساة الموقف الاول .. غير انها سمعت كثير من تجارب صاحباتها
انو فيه امكانية كبيرة ينسحبون اهل الخاطب وتعيش مواقف مخزية من الاقارب ..
تفكر اذا الاقارب وهو اصلا ما انخطبت عاشت منهم مواقف سيئة وشائعات .. اجل لو تعلمهم ثم ما يصير نصيب وش بيسوون هذي المره ؟..
وتخبي خطبتها الين تشوف اوضاعها واوضاع الخطيب واهله واهلها
وقبل الملكة بكم اسبوع لما امورهم صارت واضحه وتقريبا متفقين .. يبدون يعلمون الاقارب ..
هنا يبدا الزعل .. مخبين ! .. ناس مريضة الكل يعرس ! .. ليه مخبين عننا وش مسوين لكم ..! ..
ماراح نحضر العرس < مقاطعة منتجات مهوب عرس > ههههه يقالهم يأدبونهم
وقلبوا عرس الضعيفة لزعل ومن يرضون ومن يخلون
طيب الحين فوق من العروس ؟ ومن اهلها ؟ ومن العريس ؟ ومن اهله ؟ وش بتستفيدون من المعرفة من وقت الخطبة ؟
ما اشوف اي استفادة الا بس عشان من ينشر الخبر اول واحد ههه ويصير له السبق الانتشاري النسائي
وعشان يفصفصون الضعيفة والمعرس واذا هو اعلى منها حقروها واستكثروه عليها واذا هي اعلى منه بدت مكالمات الاستنكار والخطب الوهمية
طب : من حسن اسلام المرء تركه مالا يعنيه
خبر ماراح يزيد في حياتك شي او ينقص منها شي او يخصك او يخص عائلتك وش اللي مطير بوهتك تلاحقينه ؟
لا تدورون الاعذار
اهم شي تجيكم البطاقة قبل باسبوعين او ثلاثة تشترون لكم فستان
لاني عارفه ان بعض الناس يلاقي الف حجة ليبرر اللقافة
الان مجتمع ياكل الكل واكيد كل وحده مرت بموقف تكلموا فيها بطريقة غلط
توقفي وفكري كيف هذا المجتمع بيكون لو انفسخت خطبتها او ما تيسر لها الزواج
بتجي ثانية تقول : يمكن ينفسخ حتى الملاك ؟
صدقيني الفسخ قبل الملاك نسبته اكبر بكثير من اللي بعده
لان الناس يعدون الفترة قبل الملاك هي جس النبض والسؤال وفعل كل الاسباب اللي ممكن تلغي الزواج
لكن الفسخ بعد الملاك يكون لظروف اقوى واشد وغالبا اشوفه من البنت نفسها وتكون اصلا مستعده نفسيا تواجه المجتمع لانه قرارها
صندوق بريد @sndok_bryd
عضوة مميزة
يلزم عليك تسجيل الدخول أولًا لكتابة تعليق.
خليك أول من تشارك برأيها 💁🏻♀️