من وحي امسك قردك لا يجيك اللي أقدر منه 😂💔

أنا يا بنات تزوجت واحد أكبر مني بعشر سنوات
أول مرة دخل علينا كان جايب هديتي معه طقم ألماس يجنن
هذا وهي جية التعارف بس
وبعد ما تمت الخطبة روشني بالهدايا زي ما يقولون الأمريكان وملكنا ومن بعد الملكة سبحان الله جاني شي خلاني انفر منه
مدري وش يا بنات مع انه أجودي وطيب وكريم وحبيب وولد واحد من الأعيان ومنصب ومتعلم وزي العسل معي يا دهينة لا تنكتين ومحترم أهلي مرة وأهلي يذكرونه بالخير إلى يومك
وتزوجت غصب وطار فيني طيران .. يعاملني زي طفلته بطيبة وإحساس ويدلعني قدام الناس
ولففني العالم وكان هو رغم منصبه الكبير يا بنات يخدمني
يجهز ملابسي
يجهز أكلي
لو وش أطلبه ما يقول لا
بس أنا وقتها ما كنت أشوف هذا كله وكنت داخلي ما أبيه
صح كنت أضغط على نفسي وأجامل وأحاول .. والله إني كنت أحاول
إلى درجة إني مرضت ونزل وزني عشرة كيلو وتنومت في المستشفى والسبب غير معروف بس حالة غريبة جديدة ع الأطباء بغيت اروح فيها
وهو كان وده يوديني اَي مكان بالعالم يعالجني .. بس أنا يا بنات كنت كارهة وما احب اشوفه
وطلبت الطلاق وطلقني بعد رجاءات وطلقني وهو مكسور
وجلس حزين فترة طويلة زي ما سمعت واكتئب وأهلي زعلوا علي وفيه منهم اللي قاطعني حتى
بس ما كان يهمني كنت ابيه يطلع من حياتي وبس نفرت منه نفور مو طبيعي
وبعده تزوجت واحد زفت نقيض الاول في كل شي
بخيل ما شفت منه وردة
يده طويلة
لو يشوفني تعبانة يطلع ويخليني مهما أكون مريضة
بخيل يوديني أردى الأماكن هذا إن رحت اصلا
ولا يحترمني ولا يحترم اهلي
وتطلقت منه كمان
اهلي يقولون ذنب الاول
وانا احيان الوم نفسي
بس والله غصب عني
والله حاولت لين مرضت
ادعوا لي يا بنات الله يغفر لي ويسامحني
وامسكي زينك لا يجيك الخايس