مهراجا كوشت حراق حلجووو ... صالونة لحم هنديه

السلام عليكم

يا هلا ويا مرحبا بكم

سويت لكم مهراجا كوشت حراق حلجوو .. مهراجا ماعرف معناته كوشت يعني لحم بالهندي وحراق حلجو اتعرفون معناته اكيد .. طبعا النص الاول مستورد والنص الثاني اخترعته هههههههه ... كنت من زمان مره سويت صالونة لحم هندي وريلي وايد عجبه وييت اسويه مره ثانيه نسيت الطريقه ... فقمت خبصت بس طلع لذيذ ...
المهم ما صورت لكم الطريقه لانه سهل .. ما يحتاي

المقادير

كيلو لحم غنم مكعبات

اربع بصلات مقطعه الى جوانح

اربع فصوص ثوم مهروسين


هاي بالنسبه للحم ... تحمرين البصل بالاول .. تحمرين معاه الثوم .. وتحمرين اللحم مع البصل والثوم واتخلينه كم من دقيقه بس تاخذ الريحه والنكهه عقب اتصبين الماي بنفس مستوى اللحم يعني الماي واللحم متساويين واتخلينه يغلي بالاول وبعدين اتسكرين الغطا على نار هاديه.. اذا عندج جدر الضغط يكون احسن واتخلينه يستوي اللحم .. واذا ما عندج الله يعين ريلج كل اشويه بيشتريلكم غاز .. بيقعد ساعه ونص لين ما تستوي اللحمه


مقادير الصلصه

ثلاث طماطات مقشرات مقطعات في الخلاطه معاهم 3 ملاعق روب او زبادي على قولة بعض البنات الحلوات وملعقه كل من كمون مطحون كزبره مطحونه كركم بزار وفلفل احمر كشميري وتخلطهم زين

بعد ما تستوي اللحمه .. نضيف خليط الطماطم على اللحمه ونعلي عليها لتغلي ونخليها خمس دقايق نقوم فيها نسخن نص كوب ماي ونحط فيه ثلاث ملاعق حليب جوز الهند ونصبه على اللحم ونوطي النار ونخليه يتسبك .. ولاحظو انا بالاول ما حطيت ملح عشان تستوي اللحمه بسرعه فهني حطي الملح

يوم اتشوفينه اتسبك تفرمين ملء الكف كزبره طازجه و اقل منه نعناع وتخلطينه مع اللحم واتسكرين عليه واتخلينه ياخذ الريحه والطعم

هني صورته راح تكون لون الصلصه برتقاليه بس التصوير رديء
وهني بالفلاش اوضح وبعلي ياكل منه مع خبز التنور الايراني ..

http://www.****.net/01/2012-06/13425058341.jpg

http://www.****.net/01/2012-06/13425058342.jpg
ماعرفت اكل منه لانه كان حااااااااااااااااااااااااااار .. صج حراق حلجو ها بالنسبه لي انا ما استحمل الحار وايد فيه ناس يكثرون فلفل