مهما أسعدت عيالي احس بتقصير تجاههم

السلام عليكم ورحمة الله وبركاته
بنات انا عندي 3 الله يحفظهم كلهم بالابتدائي بنت خامس و ولدين ثالث و أولى المهم انا احاول اسعدهم قد مااقدر وابغاهم يعيشو طفولتهم قد مايقدرون ماابغاهم محرومين من شي نظامي لهم مثلا مره من كل شهر على نزول الرواتب اوديهم مول وألعبهم هناك الين مايطفشو واعشيهم وأعطي كل واحد 10 ريال مصروف له بسوق يشترون اللي يبغونه حلويات غزل بنات سلاش اي شي وبرضو احيانا اضطر ادفع زياده لاي شي عجبهم وباقي الايام اوديهم عالحدايق. والبقاله يمكن مرتين بالأسبوع اوديهم مره اعطيهم ريالين مره 3 واحيانا 5 اذا عجبتهم حاجه او لعبه باليوتيوب ويبغونها اروح اشتريها لهم ابغاهم مبسوطين ودايما اسوي لهم حفلات نجاح وميلاد في بيتي او في المطعم غالبا عائليه وبنتي الكبيره لاني اعرف امهات صحباتها قريب سويت لها حفلة ميلاد وعزمتهم وجو صحباتها وانبسَطَت معاهم
فمهما سويت احس بالتقصير تجاههم واذا بغو شي وماقدرت أجيبه لهم احس بتأنيب الضمير وأحاول أجيبه لهم فما اعرف هل هذا الشعور طبيعي تحس فية اي ام؟! ولا انا مزودتها؟! ولا من الخطا احس بهالاحساس؟! لانو احيانا الوم نفسي انو المفروض مااحس بالتقصير طالما مسوية اللي عليا وزياده المهم مدري تنصحوني ولا اعتبروها فضفضه
وصح للعلم انا عشت طفوله فيها نوع من الحرمان من الاشياء اللي نحبها امي الله يحفظها كانت بالقطارة تعطينا هي طبعا ذكرت هذا الشي عشان لاأحد يجي في باله اني متعوده عالرفاهيه وانعكست علي لا ماكنت عندي 💔 ولا انا اللي جالسه اعوضهم الحرمان اللي انحرمته لاني أيامها كنت الوم امي وانتقدها انها ليش كذا حارمتنا من الاشياء اللي نحبها واشوف البنات اللي معاي بالمدرسة كيف مبسوطين وأمهاتهم مدلعينهم ومو مقصرين معاهم بشي بالنهايه ابغى اعرف شعوري تجاه عيالي في محله ولا لا وأسفه عالاطاله 🌹