مهم جداً بعد إجرائي لأشعة الصبغة وموعدي مع الإستشاري الدكتور محمد بقنة

حباً بكم اخواتي الحبيبات :26:
اللي خلاني اطرح ها الموضوع بين أيديكم هو أنه ومن خلال بحثي في النت عن تجارب الأخوات في أطفال الأنابيب مع الدكتور محمد البقنة ومالقيت الإجابة الشافية من المواضيع المطروحة بالنت.
أولاً: أنا صارلي 3 سنوات متزوجة بدون أي حمل معالجاتي كانت بين تنشيط ومعالجة أكياس وتنظيم دورة وحالياً ياربي لك الحمد شاكين إن الرحم فيه شي وقالولي ماراح يعرفونه الإ عن طريق المنظار طبعاً مراجعاتي في مستشفى حكومي والحبيب الريان ومستوصف طبي عندنا ومؤخراً الحبيب العليا.
طبعاً بمجرد ماقالولي إنه شاكين فيه شي بالرحم وأنا بس خايفة موت ودائماً أفكر بها الشي الحمدلله روحتي لمحمد البقنة طمنتني شوي.

أنا طبعاً توكلت على الله وقلت بروح للدكتور/ محمد بقنة وبشوف إيش رايهـ في التقرير الأخير اللي سويته في الحبيب الريان (وهي كانت أشعة صبغة وكانت نتيجة الاأشعة الأنابيب مسدودة وتوصية بعمل منظار رحمي جراحي بتخدير كامل) وحجزت موعد عنده وكان أمس الموعد وأنا حبيت أطرح الموضوع لكم أخواتي حتى تستفيدوا من موضوعي:

1) أخواتي الدكتور جداً محترماً وخلوق ويخلي المريض يتكلم براحته ولايقاطعه وأستغرب اللي سبو فيه من العضوات من ناحية أخلاقه طبعاً من غير مايذكرون الأسباب!.
2) أول مادخلت أخد التاريخ المرضي لي ولزوجي وسألني عن دورتي إذا هي منتظمه أو لا، وسأل زوجي عن الفحص تبعه.
3) سالني بالتفصيل عن علاجاتي خلال الثلاث سنوات بس ما اقتنع يقولي تذكري في شي نسيتيه!.
4) وريته أخر تقرير أشعة لأخر متابعة تبويض وكانت سليمة، كمان شاف أشعة الصبغة، طبعاً أشعة الصبغة حكاية ثانية كانت النتيجة مو مطابقة لكلام الدكتورة اللي سوتها لي لأنها قالتلي فتحت الأنابيب وكتبتلي بالتقرير إن الأنابيب مسدودة وينصح بمنظار الجراحي للكشف! طبعاً الدكتورة هذي إستشارية أشعة في سليمان الحبيب الريان.
والدكتور سحب على التقرير وأخذ السيدي وشاف صور الأشعة وقالي شوفي هدا رحمك وهذي أنابيبك الأنبوب الأيمن سليم والأنبوب الأيسر مامر معه السائل وأنا مستغرب ليش كذا ليش مامر لأنه من خلال كلامي معاه وسؤالي عن العلاجات قال إنتي مامعك أي أعراض من أعراض اللحمية أو الزائدة اللحمية أو الإلتهابات أو حتى الأورام الليفية لكن بسويلك سونار عشان نتأكد ونشوف رحمك علماً أني جيته باليوم الخامس للدورة يعني الحمدلله خلصت الدورة.
سويت الاشعة قالي شوفي انتي مانزلت الدورة كاملة عندك لسه باقي دم وسؤال هل تحسين بآلام بالظهر والبطن قلت إيه وقت الدورة وقالي أكيد ينزل عليك دم قطع صح! قلتله إيه سكت الدكتور وحسيت إنه مايبي يتكلم إلا لما يشوف نتيجة الأشعة القادمة سونار وصبغية.
قالي انا أرجح أن أشعة الصبغة اتعملت وكان فيه دم رحمك عشان كذا مابانت أو مانفتح الأنبوب الأيسر بسبب وجود كتل الدم اللي مانزلت! لذلك قررلي أخذ دوفاستون لمدة عشرة أيام إعتبارً من اليوم مرتين في اليوم وقالي حينزل لك دم قليل وعطاني دوا ثاني بس نسيت إسمه لأني اكتبلكم تجربتي وأنا بالعمل والعلاج بالبيت قال هذا عشان يعدل بطانة الرحم ويقويها عندك لأنة البطانة تعبانة أو مترققه مدري إيش هي الكلمة بالضبط لأني من كثر مافكر نسيت وربي بسبب بقاء الدم بعد الدورة!
وغير كذا سألني قال إنتي تستخدمي منشط طبيعي أنا قلتله لا وأنا فعلن أستخدم قال لانه في كيس صغير على المبيض باين عندي تخيلووو طبعاً قالي إنتي إنتبهي لأكلك لأن المنشطات إذا ماخذتيها بوقتها الصحيح راح تأثر سلباً عليك عاد أنا فوراً وقفت العلاج الشعبي اللي أخذهوقالي هالكيس بينزل إن شاء الله مع الدورة القادمة بس لازم الدم كله ينزل.
قال لاني اشوف أن رحمك حسب الأشعة اللي سويتيها مافيها شي ورحمك سليم هو يقصد من ناحية الأورام أو الأكياس أو الزوائد اللحمية!
وقررلي أسوي أشعة بثاني يوم من الدورة الجاية وقال إذا نزل الدم كله بعيدلك أشعة الصبغة.
هذي تجربتي يابنات مع الدكتور محمد البقنة والله يكتب اللي فيه خير
نصيحتي ياصبايا:
اللي متردده تروح للدكتور محمد بقنة أنا أقولها من الحين تتوكل على ربي ولاتتردد بحجز موعد عنده طبعاً كل شي بإرادة الله تعالى.
إنتبهو لاتراجعون عند مستوصفات صغيرة أنا أولاً ماضيعني الأ المستوصفات الصغيرة لأن مشكلتي كانت بسيطة وهي التبويض لكن كل مارحت لمستوصف جديد عادولي الكورس من جديد وأنا أشوف هذا شي فيه إضاعة للوقت وللمال! والمستشفى الحكومي فعلن فادني وعالجلي الأكياس بس مواعيدهم تطول وطفشت وربي وتركتهم مع إن الدكتورة اللي كنت أراجع عندها ممتازة.
بالنسبة للأشياء الكبيرة مثل العمليات لاتاخذون رأي طبيب واحد خوذوا راي كذا طبيب أنا اخذت نتيجة أشعة الصبغة ورحت لطبيبة في مستوصف خاص عشان بس تصرف لي مضاد بعد أشعة الصبغة وصدمتني قالتلي أن الانابيب كلها مسكرة ولازم تسوين علمية جراحية للرحم وإنتي أصلن ماينفعلك الإ أطفال أنابيب صدمتني وربي! وصار عندي هبوط في الضغط وقتها.
رجعت اليوم الثاني للمستشفى الحكومي وكلمت طبيبة قالت بعد قرائتها التقرير بس بدون النظر للصور وقالتلي نسويلك منظار إستكشاف فقط إذا فيه شي خفيف مايحتاج جراحة كي فقط, إذا فيه شي يحتاج جراحة سوينالك بلحظتها الجراحة وهذا بناءً على التقرير اللي قرته، عاد موعدي أمس مع الدكتور محمد بقنة مطمئن للغاية ربي يسعده ويجزاه خير وغير كذا سحب على التقرير وصار يشوف الصور وهو لاحظ إن فيه تناقض بين التقرير وصور الأشعة وأعيد الدكتورة كاتبتلي بتقرير الأشعة إن الأنابيب مسدودة وتحتاج إلى منظار رحمي جراحي والدكتور يقول حسب الأشعة الأنبوب الأيمن مفتوح والأيسر مامر معه السائل وهو مستغرب من هالشي وعلى فكرة الدكتور ماجابلي طاري أطفال أنابيب مثل الدكتورة.
ونصيحة ثانية لاتتهاونون يابنات بالادوية الشعبية الكيس اللي عندي سببه اللأعشاب اللي أخذته وإنتبهو الأدوية الشعبية ماتوخذ الإ من قبل مختصين بالأعشاب وكثرتها مضره نفس الكلوميد والأبر.
بالنسبة للمقبلات على أشعة الصبغة لازم تتأكدون إن الدم كله نزل قبل تسوون الأشعة ولازم تقولون للدكتورة اللي بتسوي الأشعة هذا الكلام لان الدكتور محمد بقنة يقول بيعيد لي أشعة الصبغة لأن الدم مانزل علي كله فتعطي الأشعة قراءه خاطئة أو ماتمشي مع الأنابيب بسبب تجمع الدم.
حبيباتي أنا دائما تتأخر علي الدورة بس بمجرد أفكر فيها فأعتقد النفسية والتفكير له دور كبير في عدم إنتظام الدورة.
أخيرن أنا إستخرت ربي وبمشي مع الدكتور محمد بقنة وعسى ربي يكتبلي الشفاء على إيده ويرزقني ويرزق كل إخواني وأخواتي المحرومات بالذرية الصالحة السليمة المعافاة الكاملة الخلقة.
أنا حابة أنشر موضوعي هذا بكذا منتدى حتى يستفيد منه أكبر قدر ممكن من الأخوان والأخوات وأسفة جداً على الإطلالة


:icon35: