كنا نسمع من اخوانا المصريين من المعلمين والطلاب اللي درسنا معهم عن حي في مصر اعتقد والله اعلم يدعى حي "الباطنيه" او قريب من هذا الأسم .. عموما هذا الحي اشتهر بكثرة المخالفات من مخدرات ومسكرات ودعاره وقامت الحكومة المصرية في ذلك الوقت بأقتحام الحي بقوات امنيه واقتحمت البيوت وانتشرت في كل انحاء الحي حتى تم تطهيره ومسحه واجتثاث المشكله من اساسها.
في الريـاض هناك حي مشابه لحي الباطنيه ويقع في جنوب الرياض اسمه "الغالّه" ومسماه الجديد "الفيصليه" وبرج الفيصليه منه براء
.. سكانه جميعهم اجانب من ذوي البشرة السوداء الداكنة "افارقه" ولا يتحدثون العربية واي شخص غريب يدخل هالحي تلاحقه نظرات الشك والريبه.
هذا الحي سمعنا عنه قصص كثيره بعضها كنت اتوقع انها خياليه ولكن يوم زرت كولومبيا الرياض اكتشفت ان اللي سمعته ولا شئ مقارنه باللي شفته على ارض الواقع .. مع انه حي قديم الا انه يختلف عن الأحياء القديمه في الرياض مثل الصالحيه والعود والجرادية والشميسي وهي احياء قديمه متصله مع بعض سكنوها اهلنا قبل خمسين واربعين سنه ... الغاله معزول تماما عن بقية احياء الرياض الجديده والقديمه يقع بعد مخرج 18 للقادمين من الدائري الشرقي والدائري الشرقي الجديد.
من زمان وانا اسمع عنه وان الممنوعات تباع علناً ومن يدخلها في الليل يعتبر منتحر والأجهزه الأمنيه ماتقدر تدخل هالحي الا بقوه امنيه كبيره .. كنت اتمنى اني اشوفه وادخله ولكن كانت هالجمله تمنعني دايما "الغاله الداخل اليها مفقود والخارج منها مولود"
.. يوم الاثنين الماضي عقدت العزم على زيارة الغالّه والتجول بين اروقتها والتحدث مع ساكنيها << اي هيّن .. حاولت اخذ معي واحد من اخوياي يكتشف معي او بيني وبينكم اقولها ابي احد "يجسرني"
للأسف الكل رفض وحذروني اروح خاصة في الليل لذلك اخترت وقتاً لزيارة ذاك الحي تكون فيه اشعة الشمس بأقوى حالاتها ..
الساعه 11:30 ظهـــــرا مع ان بيتي بعيد في مخرج 9 وذا الوقت ازحم وقت بالرياض والحي اللي ناوي عليه "بقريح وبزنّه" ولكن اخترت هالوقت عشان اغمق كحلي فيهم اشوفه ..
مثل ماقلت الحي بعد مخرج 18 للقادمين من الدائري الشرقي وطبعا فيه الكبري الجديد اللي توهم خالصين منه بالدائري الجنوبي ادخلوا قبل هالكبري يمين والوجه من الوجه ابيض
بعد مادخلت قبل الكبري مشيت في طريق طويل تقريبا ثلاثه كيلو والوضع جدا طبيعي الى ان انتهى هذا الطريق وبدأ وقت الجد وشعرت حقيقة بأني اخذت تأشيره الى اديس بابا ..
وجوه غريبه وألسنة تنطق بكلمات غير مفهومه .. نزلت من السياره ومشيت كم متر ولكن نظرات الشك والريبه اللي تلاحقني من الصغار قبل الكبار اجبرتني على العوده للسياره حتى تكون خط الدفاع الأول عني عند حصول اي اعتداء محتمل.
بيوت بعضها طيني وبعضها فلل قديمه بألوان غريبه (زهري واخضر واحمر على بيج وابيض) .. شوارع وازقة ضيقة وبعضها وسيع .. الغريب ان الجميع نساء ورجال في الشارع مع ان الحراره طاقه الخمسين ..
ومن المواقف اللي حصلت لي ..
قدام عيني وبين العالم طفل يمكن عمره حول 10 سنوات يبول وانتم بكرامه وهو يمشي والناس من حوله اللي ماشيه واللي جالسه عادي ولا كأنه شئ صاير .. ومن قواة عينه وهو يبول قاعد يناظرني بنص عين ولسان حاله يقول الكل يشوفني حلاله الا انت ياغريب الوجه واللسان.
ولاحظت ان ..
الحريم يجلسون بالشارع اللي قاعده واللي منسدحه وحاطه راسها على عتبة الباب لكن اللي ماخش مزاجي الحريم اللي كانو يرضعون بزرانهم قدام الرايح والجاي
وفي حدا الشوارع طلعت يمين واناظر وراي الا اشوف امة محمد متجمعه بس على وش الله اعلم حاولت اغامر واروح اشوف وش صاير لكن من خاف سلم ..
اطفالهم .. اللي فوق البرادات واللي تحت يشرب ماء واللي وراها يلعب بالكهرب .. واللي حافين يلعبون مليحق فوق الجدران ..
بقالاتهم قصه ثانيه .. بقالات لا عليها لوحه ولا شئ حتى شكلها من البقالات اللي في السبعينات الهجريه اللي يدخلها ينزل تحت مترين ,, بس نفسي اعرف من اللي بايع عمره يدخل هالحاره بسياره محمله كل شئ ويوزع على البقالات وياخذ فلوس ؟؟؟؟
اخيراً .. بسبب بقالة حاولت اشوف وش داخلها وانا ماشي بالسياره الا عيني تطيح بعين شاب لا يتجاوز الـ 24 ربيعا يوم تعديته اسمعه يناديني بصوت عالي ويأشر علي اعتقد يحسبني من المباحث او احد يراقبه قلت بس رحنا وطي هالحين لو يجمع علي هالخوال راح اكون في عداد الموتى لا شك ,, طلعت من الحاره بسرعه وانا معرق وانتفض والقلب من قوة ماهو يدق شوي ولا يطلع من مكانه .. الحمدلله طلعت بالسلامه هذا من فضل ربي ..
كل هذا ياجماعه شفته في ثلاث شوارع فقط وتعتبر رئيسيه الله العالم وش اللي صاير داخل .. بأختصار هالحي كأنك في كولومبيا كل شئ متاح وكل مجرم يبي يتخفى عن الدولة يجي هالبؤره .. عندهم عادات وتقاليد غريبه مايمكن احد يشوفها بأي مكان بالرياض على الاقل علنا وقدام الله وخلقه.
المعلمين والمعلمات في هالحي يتعرضون دايما لمضايقات واعتداءات ,, وفيه معلمات يرفضون يروحون هناك بسبب الرعب والبلطجه اللي يشوفونها.
والله ما ابالغ اذا قلت هالحي خارج سيطرة الدولة ,, الأمن اساسه انك تأمن على نفسك ومالك وعرضك .. للأسف في الغالّه ما تأمن لا على نفسك ولا على مالك ولا على عرضك ..
وين الدولة ؟ وين المسؤولين عن هالحي اللي جميع سكانه بلا هويه
ياجماعه سكان هالحي تقريبا 20 الف حسب ماقالته جريدة الرياض 99% ماعندهم هويه ولا اثباتات ولا اقامات ,, هذا اكبر خطر والمسؤولين نايمين حتى تصير كارثه ويصحون
ليش نستغرب من كثرة الجرايم اللي تسجل ضد مجهول وبينا اكثر من عشرين الف نسمه بدون هويه هذولي بالله كيف نجيبهم لا قتل او سرق ؟ الدولة واجهزتها كلها ماتعرف عن هالمجرم شئ لا اسم ولا ميلاد ولا بصمه ولا جنسيه شئ طبيعي يسجلونها ضد مجهول.
اتذكر والله العالم عام 1422م كنت صغير لكن اسمع ان رجال الهيئة وفقهم الله داهموا بيت مخصص لبيع الخمر هناك .. من بكره بالليل اقتحموا مركز الهيئه وسكروا الكهرباء عنه وضربوا الموجودين بالسواطير .. بعدها من الامير سلمان صدر امر ينفضون الحي نفض وهذا شئ يشكر عليه ولكن هذا مو حل ..
الحل هو تفريق هالجماعات عن بعضها لأن حسب ماسمعت انهم من قبايل متقاربه وتسفير اغلبهم الى بلدانهم ويسمحون الحي مسح وجزء ياخذون اساميهم وبصماتهم وتكون لهم اقامات مثل خلق الله لكن للأسف الدعوه صايره فوضى وانا متأكد راح يجي يوم من الأيام يصير في هالأحياء مثل ماصار في احياء المهاجرين الافارقه في باريس الا اذا تدارك المسؤولين وعلى رأسهم الامير سلمان الأمر وصححوا وضع هالحي قبل ما تتاقم الامور اكثر لأن تأثيره بدأ على الرياض كلها.
اسف على الأطالة ...
ـ" سبحانك اللهم وبحمدك ، أشهد أن لا إله إلا أنت أستغفرك وأتوب إليك "ـ
تحياتي لكم
منقول للاهميه الموضوع:mad:
فيه شبيه له بجده اسمه غليل
الداخل مفقود والخارج مولود فعلا
كلهم افارقه وبدون اقامات وخمور ومخدارات تباع عيني عينك
كان الوالد الله يطول عمره قبل يتقاعد يقول الشرطه مره بغو يدخلونه
وهجمو عليهم افارقه وطعنو العسكر بسكاكين وكسرو سيارت الشرطه
وبعدين قالو ينحط فرقه كامله تقتحم المكان وماعاد اقتحموهااو انهم ماقدرو الله العالم
المهم يقولون وقت الاذان محلاتهم ودكاكينهم ماتتقفل
وعندهم يوم الخميس والجمعه حفلات وسط الشارع حريم ورجال يرقصون
ويسكرون وكل شي
واللي يغلط بس ويدخل يترصدون له انهم يعرفون الوجه الغريب على مكانهم
طبعا من عندهم يجون الشحاذين اللي بالشوارع ومن عندهم يجون بياعين الخمور والمخدرات
اقصد اغلبهم بؤرة فساد
الله يسترنا فعلا
مدري متى يرحلونهم كلهم متخلفين