السلام عليكم ورحمة الله
عندي كلام من أسبوعين يقرقع براسي والأخت شابورة الله يجزاها خير بعدما كتبت عن تجربتها احس انها أعطتني دافع إني اكتب اللي براسي وصراحة حطيته بهالقسم لأن اكثر بنات القسم يحتاجونه
المؤمن مبتلى وكل بيت لازم يكون فيه مشكلة مو لازم كل دقيقة لكن لاحظي أي وحدة قلتي عنها انها تملك السعادة لو تجين تدورين تلقين فيه شي منغص عليها حياتها ممكن عندها مشاكل صحية ممكن عندها مشاكل نفسية ما فيه احد يملك السعادة السعادة نسبية وهذا لحكمة من الله وهي اختبار لإيماننا وممكن محبة الله لنا حتى نقابله يوم القيامة و ما عندنا ذنوب اللهم أمحو عنا الذنوب والخطايا
وأكثر من أبتلي في هذي الدنيا الأنبياء هذا مو كلامي قال الرسول صلى الله عليه وسلم (ما يصيب المؤمن من هم ولا نصب ولا حزن إلا كفر الله به من خطاياه)
حتى العظماء ما عرفناهم إلا بالفتن اللي صارت لهم كيف عرفنا شجرة الدر؟ كيف عرفنا اسيا امرأة فرعون؟ كيف عرفنا ال ياسر؟
لاحظي إذا كانو اهل الزوج طيبين تكون المشاكل تجي من الزوج وإذا كان الزوج طيب تكون المشاكل من أهل الزوج
انا ما أقول تشاءموا لا تتشاءمون لكن ودي أهون على كل وحدة مصيبتها لا تقول الوحدة ليش فلانه مبسوطة وانا لا ما تدرين عنها يمكن فيه مشكله عندها لو هالمشكلة عندك كان ما تحملتي مثلها وكان قلتي لا حالي أول أحسن منها
والله ارحم بعباده منا لانفسنا
احيانا تصير لي مشاكل واقول مايهم مشكلتي ذي اخف من المشكلة اللي صارت لفلانه وأحس انها خفت علي واحياناً يلعب الشيطان براسي وبعدها اعرف الفرق يوم صبرت كان حالي أحسن من يوم تغلب علي الشيطان وقهرني
احيانا فيه ناس ما تحكي عن مشاكلها وتصبر عليها وتصير الناس تحسدهم على السعادة اللي باينه عليهم وهم فاقدينها
يا بنات انا ما قريت كتاب لا تحزن غير صفحة وحدة واعجبتني وملخصها إن الإسلام ما يحثنا على الحزن بالعكس امرنا بالاحتساب عند المصائب ليش لانك لما تحتسبين الامر عند الله تحسين الأمر هاااان عليك لأنك بتلاقين بداله بشرى من الله وما احلى البشرى من العباد فكيف البشرى من رب العباد قال تعالى (وبشر الصابرين) كفاية هالكلمة تعطينا دافع لصبر وتخلينا نتخيل الجنان والانهار والقصور واكثر من كذا مالاعين رأت ولا أذن سمعت ولا خطر على قلب بشر وبعدها تحسين بابتسامة تشرق من شفايفك والله الدنيا ما تسوى شي عند نعيم الله والرسول على كثر الفتن و الابتلاءات اللي أصيب بها لكن كان مبتسم اللهم صلي وسلم عليه
انا صارت لي مشاكل جلست ابكي عليها سنتين وش استفدت؟؟؟
اقول لكم:
تجاعيد تحت العين من كثر البكاء
سواد حول العين
بهتان بالوجه كأني مومياء
والله ما راحت التجاعيد وصار صافي وجهي إلا بعد ما صرت احاول انسى همومي واشغل نفسي بأي شي عن هالدنيا لأن اللي يدور عالدنيا تهرب منه واللي يبعد عنها تسعى له
يا بنات ما احلى انك تشكين حالك لله لأن الله هو اللي خلقك وخلق الكون وعلى كذا هو اللي يقدر يشيل همك وهذي عبادة تتضرعين لله بالدعاء وتطلبين منه الرحمه وانه يزيح عنك الهم والحزن والله انك راح ترتاحين ويهدا بالك شوي
لكن إذا شكيتي همك لأحد ماراح ينفعونك لأنهم ما يقدرون ينفعون انفسهم حتى ينفعونك
يا بنات انصحكم تدخلون بأكادمية المجد الإسلامية مو عشان الشهادة لكن حطي في بالك انك حتى لو رسبتي انك اهم شي استفدتي من الكلام اللي قرأتيه الحمد لله بعدما التحقت بالاكادمية احس انه تحسن حالي وفهمت اشياء صح درسناها بس تهنا عنها لاننا درسنا وقتها لأجل الشهاده وليس للفائدة
ولا تنسون (إن بعد العسر يسرا) ولاتنسون ان الله لا يبتلي بالعسر مرتين
ودي اقول كلام اكثر بس احس اني طولت عليكم وانتم تعرفون هالكلام بس حبيت اواسي كل وحدة وسامحوني وإذا عندكم ملاحظات افيدوني
الوناسة @alonas
عضوة فعالة
يلزم عليك تسجيل الدخول أولًا لكتابة تعليق.
أم ميثة
•
مشكورة اختي على طرحك للموضوع ومثل ماقلت في كل بيت مايخلى من مشاكل او شيء منغص حياته اما باسباب صحية اومادية او اي شيء آخر وخصوصاً هالأيام ماتسألين عن احد الا قال لك انه عنده كذا او كذا وهذا ابتلاء من رب العالمين لازم الواحد مايعترض على امر الله ويحمده في العسر واليسر
الصفحة الأخيرة
ورب البيت صدقتي بكل كلمة خطتها يداك
بارك الله فيك ونفعك بما تعلمتيه