مواصفات الحنه الجيده ومن اين تشتريها اذا كنت بالكويت؟؟؟

مرحبا فيج وحياج الله

شوفي .. بالنسبه لي حواج منطقتنا وايد حنته حلوه 100% وتعجبني حيل وهي حنه يمنية ولونها أخضر وايد حلوه من ريحتها ومن لونها تعرفين انها اصلية ..والرجل الحواج ايضا ثقه ونزيه من خلال تعاملي معاه

راسليني بالخاص واقولج عن المنطقه والمكان بالضبط

اما بالنسبه للون تبينه يطلع احمر - عن تجربه اللي بقوله لج

في بادية كبيره وعلي حسب الكميه اللي تبينها حطي الاتي :
حناء + كفشة صغيره دم الغزال + شويه زيت اي نوع علشان شعرج ما يطلع ناشف مقدار كفشه او كفشتين + (للتغذيه الشعر اذا حبيتي بيضه + كفشه سدر + كفشه محلب مطحون)
الماي اللي تبين تفوحينه ضيفي عليه الاتي
شويه من العصفر (عشبه تشبه في شكلها ولونها برتقالي الزعفران)
قطعتين من قشور الرمان
كفشتين شاي اوراق
فوة
بصله صغيره مقطعه ثلاث قطع
لومي اسود حبه وحدة
كركدية


لما يفوح الماي خليه خمس او عشر دقايق ... وعقب بالمشخال اخذي الماي شوي شوي صبيه علي خطه الحناء وقعدي حوسي الحنا عدل ولا تخلينها وايد ثقيله ولا تخلينها سائلة واخر شي قبل ما تحطينها علي شعرج ضيفي خل او عصير ليمونه


حطيها ست ساعات وفوق

لما تغسلين شعرج .. غسليه بالماي عادي وحطي شويه حمام زيت دهني او بلسم علشان تطلع الحنا من شعرج
وعقب دهني شعرج علي خفيف واطرافه وثاني يوم غسلي شعرج

صدقيني والله وبالله العظيم اني اسويها كل خميس حق اختي وامي .. امي شعرها اسود فاحم تصدقين انه فتح لونه وخله لونها احمر بس مو احمر وايد اما بنت اختي خله لون شعرها احمر مثل امي لانها هم شعرها اسود فاحم اللي امها اعيزت فيها كله تحنيها ما يحمر شعرها بس بهالخلطه بان اللون الحمر .......... اما اختي شعرها بني غامج جدا صار لون شعرها يميل للون البرتقالي بس غاامج مو فاتح - وايضا كنت انا اللي احط الحنه علي شعرهم والله وبالله العظيم انه الحنه تصبع بيدي كاني حاطه حنه ومره حطيت الاسبوع الثاني وكانت الحنه ما راحت ليما الحين وصارت الحنه علي ايدي اغمج من قبل .. وايضا كذا مره يطيح علي اصبع ريولي الحنه وانا احط لاهلي تصدقين يصبغ لي صبعي


علي فكره .. انا ما انقع الحنه من اسويها علي طول احطها علي الشعر وما انتظر عليها الا فتره تبرد شوي واحطها علي شعري دافي





كنت قبل احط الحنه وشعري يصبغ عليه - وعلشان يصبغ حطي دم الغزال

وعند الحواج كل هالمواد




واللي كتبته من تجربه شخصيه وحبيت افيدج

والسلام ختام

:26: حبيبتي ماكو احلا من حناء وسدر ام نوره في الدبوس اللي بالفروانيه تبيعه بمحلها اسمه القناع الاسود تبيع فيه ملافع وعبايات وخلطات للبيت بصراحه ثقه هالمحل جربيه جااااااااااااااااو

صراحه بس لا تضحكي حنه الحريم اللي بسوق الحريم جربتها خطيييييره بس اليمني منها لونها اخضرصافي جربيها وقوليلي

شمس بدر0000الله يعطيك الف عافيه بعد عمري انت 0مشكوره على هالوصفه بجربها انشالله وبادعيلك انشالله تسلميلي يا رب :24:

اختي الغاليه كويتيه كوووول0000القناع الاسود في دبوس الفروانيه00000يعني اخذ منها وانا مغمضه؟ما راح تقص علي؟ خلاص راح اروح انشالله 0000تسلمي يالغاليه:24:

حبيبه عائشه0000ما ادري احس ان سوق الحريم في اشياء وايد زينه بس يبيلك وحده ثقه 0000ما تقص عليك لاني صار عندي عقده من كثر ما انقص علي 000عموما بشوف انشالله اذا رحت هناك000تسلمي يا عسل:24: