مواضيع عالم حواء

١-اختي ناشبة لي وخانقتيني ابي افتك منها، وتمر السنين وتتزوج وتعيل ونفس الموال اختي خانقتني وخانقة عيالي وتضغط علينا، طيب متى الحلقة الاخيرة مب عندك بيت اقعدي فيه
٢-بنات ساعدوني مقهورة من اخت زوجي كل ما رحت لهم تقط علي وعلى عيالي كلام، طيب متى الحلقة الاخيرة ليه ما تقعدين في بيتك
٣-زوجي يشاور اهله في كل شي ويسمعهم وانا ما ياخذ رايي في شي
٤-زوجي قاط مسؤولية العيال علي انا الي ادرس وانا الي الي اربي وكل شي وهو ولا همه، انزين ليه ما عودتيه من اول نفاس لك يقعد يساعد الولد متى الحلقة الاخيرة؟
٥-طقت كبدي من البيت كل شي ممنوع ابوي واخواني صاكين علينا، وتمر السنين وتتزوج وهنا الكارثة بنات ساعدوني زوجي حارمني من كل شي يا زين بيت اهلي كنت ملكة هناك خدم وحشم وكل شي وفي بيت زوجي انا ولا شي
٦-ابي اتطلق من زوجي كرهته كره العمى وتمر السنين وتطلق وبعد كم سنة اليوم شفت طلقي في السوبر ماركت مع زوجته وعياله الجدد انقهرت منه لما كنت على ذمته ما وداني ولا ودا عياله والحين صاير سواق لمرته وعياله احس بالغيرة تحاه مرته الجديدة مع اني تطلقت منه من سنين ساعدوني شسوي
٧-عيالي زعجوني كله يتهاوشون مع بعض ما كنهم خوان كنهم اعداء طفشت منهم ما اقدر اتحمل وتمر السنين الي يتزوج والي يبتعث والي يتوظف برا المنطقة وتجي تقول ساعدوني حاسة بالوحدة عيالي كلهم بعيد عني تصدقون ما كني ربيت ولا كني تعبت ما يجون الا من فترة لفترة، انزين مب انت ما تقدرين تتحملينهم خلاص هدوا لك البيت وطلعوا متى الحلقة الاخيرة متى توقف التضجر والتذمر
٨-امي وابوي منفصلين وانا ساكنة عند خالي اي شي يصير على طول انا الغلطانة ابي افتك من هالعيشة الزفت ومن هالتحكم، تمر السنين وتتزوج، تصدقون يا بنات خالي تركني ولا فزع لي لما صارت مشكلة بيني وبين زوجي وقال حلوا اموركم وحدكم شسوي ساعدوني
ننتظر الحلقة الاخيرة من هالمسلسلات