عندي موقفين
موقف مرعب وموقف محرج
موقف محرج كنا مسافرين بالطيارة وكان ولدي اول مرة يسافر معانا وكان خايف من قبل كم يوم والرحلة مدتها ست ساعات وهو يرجف بالطيارة وقرا انه الطيارة الهيلوكبتر ماتتحمل تطير ٦ ساعات متواصلة
سأل المضيف قاله هذي هيلوكبتر المضيف قاله اجل هيلوكبتر روح حبيبي روح
وطول وقته وهو يقولي الطيارة بتطيح فينا الحين بصوت عالي والركاب يطالعون فيني وب زوجي والرحلة اساسا بالليل وفوق بحر 😰😰😰
وابني نازل تشائم وطاقة سلبية واحنا والركاب مو ناقصين والله الا الطيارة بتطيح فينا بالبحر وبياكلنا سمك القرش او منغرق في البحر ومايعرف يسبح وصوته عالي اقسم بالله في واحد قدامنا صار وجهه اصفر صار يتخيل كلام ابني الين واحد عصب علينا عشان ابني قدام الناس
الطيارة مرت بمطبات جوية وابني زاد توسله يقولي شكلها بتبدأ تطيح فينا وكل الركاب تطالع فينا بالاخر قالي بنام خلاص عشان اذا طاحت ما احس بشي 😂😂😂
الموقف الثاني مرعب بس ماكنا بطيارة كنا مسافرين ل سوريا عام ٢٠٠٩ بالسيارة
وزوجي لخبط بالطريق بعد مادخلنا حدود سوريا لخبط بتحويلة بالخط السريع وصار يدخل بشوارع كلها ظلام وانا انتهيت خلاص مافي بشر نهائيا
وقفنا حاجز للمخابرات وهزئنا الضابط وعطانا طريق ثاني ورجع لخبط بالطريق في الاخر وقفتنا قوات خاصة حاصرونا كانو ملثمين ونفس الشي هزئونا بعد ماتأكدو مننا واننا سعوديين مو سوريين لانه الطريق هذا خطير
قالنا الضابط هذا الطريق مجهول في الليل فيه خلايا نايمة تطلع بالليل توقف اي سيارة تشلحه كل حاجة ومستحيل يتركوك عايش كل كم يوم الصباح لازم يحصلون فيه جثة ل واحد يكونو سارقينه وقاتلينه وهم الان ينفذون عملية بهذا الطريق ولما شاف السيارة كانو العناصر بيطلقون النار علينا لانه معاهم امر ب اطلاق النار بشكل مباشر على اي سيارة بس ربك لطف والهم الرجال انه يوقفنا
الضابط ماعرف يرجعنا للطريق خلانا نمسك خط القرى وقرى السوريين مافيها خدمات كلها بيوت صغيرة واهلها يشتغلون بالفلاحة فقط ودخلنا قرية مسيحية قريبة من الشارع ولما دخلناها ووقفنا هجمو علينا شباب لانه وقفنا فجأة ونزلونا من السيارة لما عرفو قصتنا فتحو لنا الكنيسة ودخلونا عليها وجابو لنا اكل وشرب وخلونا ننام طول الليل واحنا نسمع صوت اطلاق نار وصراخ من هذا الشارع وحارس الكنيسة يقول ل زوجي عادي رجال الامن يكونو ب اشتباك مع عصابة مستخبية بالشوارع تشلح الناس ولما طلع الصباح وصلونا للخط لي نروح فيه دمشق وصرنا ب امان

رفع

حصلي نفس موقفك الاول ب الطياره وانا راجعه من ماليزيا لسعودية
مدري وش فيني العالم خايفه وانا نوووووووم افتح عيني اشوف خايفين واصوات وارجع انااام وزوجي مصدوم مني
🥶😂

هههههههه الله يسعدك ذكرتيني مره واحنا راجعين من الجنوب وقفنا في محطه ع اساس نصلي وقت العشا ونزلت وكنت خايفه مو مرتاحه لشكل المسجد ولا دورات المياه اكرمكم الله المهم نزلت وقدني ينزل عبايتي وانا قدني قريب منالحمام الا اسمع صوت عمري في حياتي ماسمعته وكششش جسمي على وعادني ابتأكد أطل فالحمام الا الصوت فيه كأنه في الحمام هذا شيسمونه الافرنجي الحمام العربي ورب البيت واشششرد وارجع لزوجي فااسياره قلت وربي مانزل ولا اصلي هنا لو اموت قال اش فيه قلت شي يرعب واقلد له الصوت قال هذي حيه ( افعى) معروف منتشره في الجنوب واروح يوتيوب ماصدقته واطلع صوتها الينه نفس الصوت الي سمعت وربي هذيك الليله جاني رعب خاصه يوم عرفت انها حية والحمد لله كنت قرأت الأذكار يومها ولا لو ماطلعت صوت ممكني في عداد الموتى ذحين بنات انصحكم لوجه الله اقرأو أذكاركم خاصه لاسافرتو لاتنسونها فهي الأمان بإذن الله ولاتنسوني من دعواتكم بتفريج همي 🌷🌷🌷

مره كنا مسافرين و وقفنا في محطه عشان نصلي
المهم دخلت انا صليت و خلصت يوم طلعت الا بوجهي كلب و يطالع فيني انا بغيت اموت و ارفع عبايتي واحط رجلي و اهج و يلحقني 🥺🥺🥺
و زوجي بالسياره على جواله و مو منتبهه و افتح باب السياره مقفل و ادق الشباك بقوه طيرت قلب زوجي 🤣🤣
و انا اسوي برجلي للكلب هش هش 😫😫