مواقفي الجبـانه جدا قصصي تشيب الراس/ استوفى الرد

انا اجبن انسانه ممكن تتخيلوها وعلى قد ما اتصنع الشجاعه وانجح بالضحك على الناس اني قويه وشجاعه الا ان القناع يسقط بقوه في ابسط موقف يستدعي قوه حقيقيه نابعه من شخصيه شجاعه بحق وحقيقي
ولي مواقف جديده وقديمه ما عمري حاولت اتذكرها الا مرتين بحياتي وبس اتذكرها احس نفسي ماعندي كرامه لدرجه مره ركضت عالمرايا وتفلت على وجهي وسبيت نفسي بأشنع الالفاظ لاتلوموني تراى جبني هو خلقه من الله حاولت وحاولت وحاولت اتغير واصير طبيعيه ماااااااااقدرت كل اللي قدرت عليه شويه تصنع وتمثيل يمشي عالناس فتره وبأصغر موقف يبدأ خوفي وجبني يظهر واطرافي وصوتي يرتجفون بأقوى شي والكل يلاحظ
اذكر وانا بالابتدائيه كانت وحده بنت بمجرد ما انزل الفسحه وامشي مع صديقاتي تجيني (بوسط الساحه) وتضربني بدووون سبب تقولي انتي ماتعجبيني وتضربني لين يدق جرس الفسحه وانا مسلمه نفسي لها تكفخ فيني وصديقاتي يصرخون علي ردي عليها ررررررردي اضربيها وانا اناظرهم وساكته طبعا البنت استحلت الشغله صارت يوميا يوميييييييا بس تشوفني بالفسحه تجيني وهاتك ياضرب ضرب وربي كان وجهي واذوني ويديني وظهري يسخنون زي النار كثر ما تكفخني فيهم والمدرسه كلهاااااااا تتفرج وانا حتى ابسط ردة فعل ما اسوي زي المشلوله حتى ما ادف يدها تخيلوا الاذى النفسي والجسدي بتسألوني ليه هالجبن كله ؟ اقولكم ببساطه مدرررررررررررررررري
ولما صرت بالمتوسط مواقف كثيره باختصرها بموقف وحده بالمدرسه استلمتني لين تخرجت كلما تشوفني تطالعني من فوق لتحت بتقزز وحطتني براسها لاني ماسويت ردة فعل معاها وانا مستحيل اروح اتهاوش معها ماهمني كرامتي للاسف كان كل همي لا احد يلاحظ ولكم ان تتخيلوا البنت مع سكوتي كانت تزيييييييد وتزيييييييييييييد وتزييييييييييييييييد لانها عرفت اني جباااااااااانه تخيلوا بدون سبب حتى اسمي ماتعرفه بس بمجرد ماتشوفني تعوج فمها وتناظرني من فوووووووووووووق لتحت (نظرات طويله جدااااااا جدااااااااااا تطووووول وهي تناظرني نظرات تعذب كاني عبده عندها صرت ) لدرجه احيانا كانت ب تشوفني تحط فطورها وتحط يدها على خدها وتقولي بعيونها جيتي وربي جابك , تدرون من خوفي وش كنت اسوي ؟ انزل عيني للاررررررض لين هي تبعد من المكان هذاك الوقت ارفع عيني تخيلوا؟خلتني مثل السجينه لنظراتها
وويوم دخلت الثانويه بيوم كنت امشي وكانوا البنات يسوون مكياج وتساريح رحت سويت روج خفيف كانت المدرسه كلها مخالفات المهم وانا ماشيه وحده بنت مشت جمبي ورمت كلمه بكل ثقه قالت وش هالروج المعفن ذا؟. مابيني وبينها معرفه وانا كبيره بالثانوي تدرون وش سويت ؟ لفيت يمين ويسار شفت مافي وحده من صديقاتي حمدت ربي وكملت مشي وتركتها ((( خفت واستصعبت اسوي هوشه معها مع العلم انها بنت هاديه مو حقت مششاكل ولامضاربات بنت عاديه مالها صوت)))) ومع ذلك ماقدرت اقولها حرف !
ومره كنت اشتري من المقصف والبنت مارجعتلي الباقي قلتلها ترى باقيلي فلوس طنشت ماردت (لو قالتلي انتظري كان سكت لكن حتى ماعطتني علامه انها سامعتني) ,كررت عليها ترى باقيلي فلوس والبنت حتى ماتناظرني ومطنشه وانا كررت للمره الثالثه صررررخت بوجهي صراخ وربي قلبي وقلب البنات اللي كانوا يشترون طلللللللع من مكانه قالتلي: طيييييييييييييييييييييييييييييييييب اسكتي بأعلى صوت وربي اني شهقت بصوت عالي وعيوني مثل المصروع صارت, جاني رغبه اني اضربها بس مدري وش ماسكني استحي اسوي فضيحه اخاف اسوي هوشه اخاف الفت نظر الناس
وصارلي موقف ما انساه ماحييت (زمــــــــان) كنت موظفه بمكان مختلط وجالسه على مكتبي وفجاه جاتني موظفه من قسم ثاني تبيني اتوسط لوحده زبونه وانا كنت جديده لي اسبوعين فقط بالوظيفه يعني قاعده اتعلم قالتلي دخلي هالزبونه ابتسمت لها قلتلها تراني جديده لي اسبوعين الا تقرب وجهها من وجههي وصررررررررررررررخت بصوت زي الميكروفون قالتلي حتى لو جديده اجل هم حاطينك هنا ليييييييييه ؟؟ وش وظيفتك مقعدينك على هالكرسي؟ قلت لها مدري ناظرتني من فوق لتحت وطلعت والمفاجأه يوم كلمت زميلتي قالتي تراها موظفه زيك زيها ولالها حق تأمـرك بأي امر (يعني مجرد موظفه زيي زيها) وتصير الطامه واحد من الزباين اللي جالس ينتظر دوره قالي قدام صاااااااااااااااااااله مليانه حريم ورجال يا اختي ليه سكتي لهاللي صرخت عليك ؟؟ كيف تسكتين لها ؟ قلتله عادي كبرت عقلي , قال: لا , الاهانه مافيها تكبير عقل هذي اهانتك قدامنا كلنا المفروض قمتي بالجزمه عطيتيها , الا حرمتين ثانيات ينتظرون دورهم (مالهم علاقه بالرجال) قالوا صح كلامه الانسان يابنتي غلط يسكت عن كرامته والله صرت اخربط ولاعرفت ارد وابرر لهم سبب ضعفي وسكوتي
ومره رحت زواج مع حمولتي ام زوجي واخواته المتزوجات وشوي كذا جبت كرسي وابي اجلس الا وحده شابه بعمري تهاوشني تقول هاتي الكرسي هذا بنتي كانت جالسه عليه بنتها طفله عمرها تقريبا 7 سنوات قلتلها (بصوت ضعيييييييييييف زي صوت القطوه) لا معليش هذا كرسيي انا, الا الحريم هاجموا الحرمه وقالولها بطلي كذذذب بنتك ماكانت جالسه عليه, يوم شافت الحريم هاجموها خافت وراحت جابت كرسي ثاني ,ناظرت عمتي لقيت ملامحها كانها زعلانه مني وغضبانه لاني فشلتها بضعفي قدام الحريم طنشت وقلت انا اتوهم,وشوي رجعت ام البنت اللي هاوشتني جابت كرسي وجلست جمبي, وانا نسيتها وربي , شوي انا قلت لحرمه ثانيه بجمبي الجو كأنه حار شوي ؟ اللي جمبي قالت صح والله حر ,الا انصصصصصصصصصصدم باللي هاوشتني ناظرت ناحيتي وقالت بصوت عالي اللي مو عاجبها الجو تقضب الباب وتطلع برا (والمصيبه ناظرت لقيت ام زوجي واخواته يسسسمعون !!!!!) التصرف الصح اني اقوم للحرمه واقولها من كلمك؟؟ من وجهلك كلام ؟ من حاكاك ؟ وبأي حق تطرديني ؟ (هي مو من اهل العرس ولالها جمل ولاناقه) لكني جبااااااااااااااانه جباااااااااااااااااااااااانه جبااااااااااااااااااانه سكت يقالك عشان لااسوي فضيحه وهوشه(اخاف اسوي هواش) لكن ما استفدت وش الفايده ؟ انفضحت ان الناس تدعسني وانا ساكته وصايره سجاد كلا يمشي عليه , يوم انتهت المناسبه ابي اطلع قلت لعمتي مع السلامه ناظرت بعيني بغضـــــــــب هي وبناتها ولا ردوا على سلامي سكتوا قلتلهم اشوفكم على خير قالولي : الله يستر عليكي بس !! وانا اعرفهم من سنين لما يزعلون تنقلب ملامحهم والله كانوا مقهورييييين مره مني تعرفون نظرة اللي فاقد الامل؟ كذا كانو يناظروني وارجوكم واللي يرحم والديكم لاتجيني وحده وتقول تتوهمين
وربي اشوف عمتي ونظراتها لحريم الاولاد كيف صوتهم قوووووووي وواثق ولسانهم ياكل اكل وانا الكل يلطش فيني كأني قطووووووه ! حتى القطوه تخربش انا مافي كل مافيني يهتز صوتي ويديني ثلج وعيوني بالارض وحالتي حاله
مشكلتي اخااف اسوي مشكله اخاف الناس تنتبه لي اخاف الفت نظر الناس ’
هذا غير بالدواير الحكوميه اللي تنافخ واللي ترفع صوتها واللي تقولي انتي ماتفهمين؟ واللي ترمي القلم بوجهي, واللي تعصصصب بوجهي كأني بزر وطبعا بالذات الدواير الحكوميه ابلــع الاهانه ولاحتى احاول ادافع عن نفسي لاني اكون لوحدي ومحد يعرفني وطالما محد يعرفني ف نفسي تهون علي كثييييييييير ,لدرجه وحده من العميلات اللي بتسوي معامله عصبت من موظفه وتصارخ مع الموظفه يوم جات تبي تعدي من وراي دفتني بيدينها الثنتين وانا شفتها ابي اقولها تعالي كيف تمدين يدك؟ بس شي مسك لساني خفت لاتصير فضيحه قدام الناس وتطول لسانها ففضلت ابلعها واسكت
لكن بدأ جبني وخوفي يخذلني ويظهر للملأ وبدأ يفضحني
انا احلم اكون قويه احلم ادافع عن نفسي عن كرامتي عن انسانيتي بس ماااااااااااااااااااا اقدر
ياترى بكره كيف اتصرف لو صار شي يستدعي ادافع عن كرامتي؟
ادري تشوفون حالتي ميؤس منها لكن اللي بتساعددني ما اقول الا الله يدخلها الجنه بدون حساب
ابي اكتب اكثر بس تعبت لان المواقف اكثر من اللي كتبتها بكثييييييييييير بكثير