مواقف عن الجفاف الي يعانون منه بعض المتزوجات في حياتهم وانتم احكموا

-



-




-




-



-
















والله ياأنا فاقدة لياقتي بالرد وكتابة المواضيع .. تهقون فيني عين؟
< < هذولا الحريم هالحين كل ماجاها تعب ولا حست بضيقة خلق قالت عين ؟؟
كن مافيه سبب ثاني الا العين!!
عمى تحصني بالاذكار وتوكلي على ربتس < < كنتس شطحتي عن الموضوع ياخاله





المهم

انا راح اسدح لكم كم مواقف عن الجفاف الي يعانون منه بعض المتزوجات في حياتهم منقوله من عالم النت وانتم احكموا.........

1/ وحده من الحريم ملت من الروتين اليومي في حياتها وحبت انها تسوي مفاجئه لزوجها
بسهره رومنسيه ...المهم قامت واطلبت الكيكه من الدبلوماسي والعصيرات
وخلت الاضاءه بالمجلس هاديه وولعت الشموع ونومت عيالها وتزينت عشان تهيئ الجو لهم .....
.المهم جاء الزوج من الاستراحه وريحته تفاوح دخاخين واستقبلته ودخلته للمجلس وقصت له من الكيكه
وصبت له من العصير...المهم يوم بلع وخلص قالها الحين وراك مجلستنا بالظلام حشى كأننا بقبر.
.تقول هي انها بلعتها وسكتت منب مخربه السهره...قام وكمل ذا الماصل وقالها الحين وراك طالبه حجم كبير
من الكيكه كان طلبتي حجم صغير وشوله الاسراف يالله روحي قومي البزارين ياكلون منها عشان ماتكب..
.عاد هي حامت كبدها منه وطفسته وزعلت عليه......
.تدرون المفروض انها تحط له خبز وفول ويخب عليه هذا مهب وجه تدليع(جعله الضربه ذا البخيل)



2/هذي وحده من البنات توها متزوجه وحابه تسوي حركه لزوجها .
..قامت وتزينت وتجهزت من مجاميعه وحطت الاضاءه هاديه وشغلت الدخان الصناعي
وانتظرته لحد ماشرف...المهم يوم دخل ويشوف الدنيا شبه مظلمه والدخاخين
حاجبه الرؤيه قام يركض للصاله وجلس يناديها
وهي ساكته ماترد عليه تتغلى عليه(على بالها حركه ماتدري مسيكينه انها بتروح في خبر كان)
عاد هو طار للمطبخ وجاب جيك ماء وكبه عليها يحسبها انه مغمى عليها من الدخان
عشان كذا ماترد عليه(جاء بيكحلها عماها)....بالله وش تتخيلون موقفها؟؟؟...
المفروض انها صبيت على راسه موية نار.....


3/ هذي وحده من البنات تزوجت وراحت للخارج مع زوجها بعثه للدراسه له ولها..
.المهم شافت ذا الحمران العطران ورمنسيتهم قالت خل اسوي مثلهم .
.وخاصة انهم كلهم يدرسون وكل واحد فيهم وقت دراسته تختلف عن الثاني
فما فيه وقت للجلسه الهاديه.. فقامت يوم من الايام قبل ماتروح للمعهد قالت
خل افتح نفسه شوي لما يرجع تعبان ويبغى ينام شوي
ونثرت على السرير ورود والعطورات الفواحه تفوح في الغرفه ومن ذا الحركات.
..قالت إذا رجع وشاف الحركات هذي اكيد بيستانس شوي...المهم يوم رجعت من المعهد
شافت زوجها نايم في الصاله عاد هي استغربت وراه تارك السرير ما امبطح عليه...ويوم صحى
وسألته قال الله يصلحك ناثره لي عشب على السرير وشلون انام عليه(الله يقلعه مايميز بين الورود والعشب).
...بالله مو المفروض تنثر على السرير تين شوكي عشان يتأدب ذا الباصق......






4/هذي وحده تعشق شئ اسمه رومنسيه و كانت دائما تعزم زوجها في مطعم راقي على حسابها
يعني تغير من جو البيت وروتينه ..وكانوا دائما يسون ذا الحركه وهو وجهه مغسول بمرق كل ماطلعوا
يطلب كل مالذ وطاب على حسابها ..عاد هي جتها ام العبيد وقالت انا اوريه عشان يتأدب
ويعزمني بدال ما انا أعزمه...قامت وعزمته زي كل مره ويوم خلصوا ماكلين
قالت له اكرمك الله ياابو فلان على العشى...عاد هو شرق بالعصير من الروعه
, قال لها وشلون يعني؟؟؟قالت له الله يسلمك الفاتوره
دفعتها من جيبك اخذت المبلغ من بوكك قبل مانطلع....
.تقول عقبها طاح وجهه تأدب وصار يطلعها كل سنه مره(تعب نفسه صراحه)......


شوفوا عاد ترا فيه رجال عندنا رومنسيين بس نسبتهم( 0001,%) شفتوا لاتظلمونهم ..
...(على فكره ذا النسبه من عندي يعني اخرط عليكم)

اذكر وحده من صديقاتي قمه بالرومنسيه وعلى وقت زواجها اتفقت
انا والشله انه كل وحده تهديها مع الهديه الرئسيه مجموعة شموع...طبعا البنت صار عندها محل متكامل من الشموع وتقدر تنافس ستي بلازا ...
ويوم من الايام كلمتها اسلم عليها قالت لي من ضمن السواليف انا توني
جايه من ستي بلازا (طبعا اول مانخرط عنه الاسواق)قلت لها وش عندك رايحه له
؟قالت انا رايحه اشتري شموع لأن زوجي يعشق الجو الرومنسي وحركات الدلع..
.قلت لها طيب الشموع الي اهديناك اياها وين راحت(كأني منيت بهديتي والا)..
.قالت لي ياحليلك خلصت من اول شهر زواج...تبون الصراحه انا وسوس لي ابليس
قلت مو معقول رجال سعودي ورمنسي ويحب الشموع اكيد انه يبغى
يوفر بفاتورة الكهرب ويولع بدالها شموع...(ماينعرف لك)

البنت رومانسيه وحلوه وتكتب شعر المصيبه زوجها مايستاهل شي منه ..
تقول .. مره كتبت له شعر بكرت وحطيته بجيب الثوب على أساس يقراه
وهو رايح الشغل تقول انتظرت يومين ماعلّق ع الكرت ..
بعد 4 أيام سألته قال شفته يوم لقيته شعر قلت إذا فضيت بعدين أقراه >>> ارحمنا يابيل غيتس

ولا شوفوا هالضعيّفه وش تقول ..
كنا مسافرين برا وقاعدين نتمشى بمكان رايق وهادي ومافي احد غيرنا
> > قام يتلفت بعدين قال ترى مافيه الا انا وانتي
> > انا تحمست قلت اكيد بينتهز الفرصه عشان ياخذ راحته معاي ولا يقوللي كلمه حلوه ولا اي شي!
> > قال
> > لو قتلتك هنا والله محد بيدري عني !!!!


ولا وحده جايبين ملعب صابوني واختي مستبزرة
عمرها وتتزحلق مع البزران ومادرينا الا طاحت على راسها و داخت بنص الملعب ،
وكود نجرجرها ونسعفها لين صحصحت ، وطبعا لما رجعت البيت قالت لزوجها وش صار لها
- وهي متشققه- على امل انه يتنافض عليها ويقول لها من هالحتسي
(( بسم الله عليك ، لو صار لك شي وش بسوي بدونتس
<-- ينعن ام تفكيرها المريض مدري وش كانت تحس فيه يوم انها تحتري هالكلام))
،، بس انه صعقها برده (( ممتاز ! مستبزرتن روحتس تلعبين مع بزران )) << اتخيلها بلعت العافية


طبعا السبب الرئيسي بالجفاف عندنا هو تنشئتا في المجتمع الخليجي
تربي الرجل على انه يكتم مشاعره ولايعرف يعبر عنها وفي نظره انه الرومنسيه
خرابيط فاضيه مالها اي اهميه في الحياه الزوجيه وانه إذا عبر عنها
راح تقلل من رجولته وتخليه ضعيف..
.وإذا قالوا لهم حريمهم شوفوا التلفزيون وتعلموا منهم ردوا بكل سخريه وقالوا هذا تمثيل بتمثيل مافيه زي كذا على الواقع

رغم الرومنسيه هي البلسم الشافي لقلب المرأه والدليل الصادق
على عمق المشاعر بينهم وايضا تقلل
من البرود العاطفي بين الزوجين وتخلي الحياه متجدده وحيويه بين فتره والثانيه وتكسر روتين الملل بينهم.......
طيب وش يضرك يالزوج لما تعبير عن الرومنسيتك بالي تقدر عليه فمثلا ..
. ممكن بالكلمه الحلوه او بالهديه البسيطه او بالجلسه الهادئه الخ...(وين الي يطبق)

اوووه عاد اي وحده حصلت لها قصه مشابهه تثبت جفاف رجالنا الرومنسي تسدحها هنا لاهنتو