السلام عليكم ورحمة الله وبركاته
خطر ببالي موضوع فيه تغير عن المواضيع الجديه هوكل وحده تدخل تذكر لنا بعض مواقف طفولتها المضحكه والغريبه بس ماادري هذا الموضوع يناسب هذا القسم لاني احترت وين احطه فيه عموما اكيد فهمتوا طبيعة موضوعي ارجوالتفاعل لو موقف لصديقه او قريبه وشكرا
راح ابدأ انا الموقف الاول لما كنا صغار عمري 7سنوات رحنا لمكه ناخذ عمره ولي مودينا خالي وبنته كبري وولده اكبر منا بسنه دخلنا الحرم ولما جينا نطوف ماندري وش نقول سألنا ولد خالي قال رددو معي وقعد ينشد يامنتخبنا الاخضر وحنا نردد وبعدها ماخلينا انشوده من افلام كرتون الى قلناها لانه هو المسؤل عنا في الحرم
والموقف الثاني نفس الشي لما رحنا للميقات نحرم شروا لنا حرامات ماادري تذكرونها الي لونها اخضر وشوال كأنه مريول وفي القديم كأنه فرض لبس الاخضر المهم لبسونا الحرام انا وبنت خالي وصرنا مثل الخيار ولبسنا جلال على روسنا ولما دخلنا الحرم جت حرمه واعطت بنت خالي خمسه ريال تحسبنا نشحذ لان اشكالنا تحفه
الموقف الاخير وهو شفت الموت بعيوني تعرفون المصعد الكهربائي كان في القديم وانتي نازله يمر عليك مره باب ومره جدار المهم كنا نازلين من الشقه ودخلنا المصعد وقلت انا ابصير عند الباب علشان انزل انا الاولى وكنت لابسه فستان ومرت الابواب من ضمنها جدار كان فيه سيم ومسك في ثوبي صرت انا اطلع فوق واخواتي يشوفوني ويصايحون ويجرون ثوبي لما انشق ونزلنا وبعدها قعدت اصيح ومن بعدها صار عندي عقده من المصعد مااركب الى معي احد تدرون تخيلت شكلي مثل المسطره زي افلام كرتون لو اني داخله في هذه الابواب
اتمنى اني رسمت البسمه على قلوبكم واي خطأ مني سامحوني
والله عاد انا وش احكي وش اخلي كنت اجمع فلوس الفسحه اللي يعطيني ابوي وشوف الغباء وين اخبيها اطلع فوق الثلاجه واخبيها تحت اللمبه ولما طلعت ابي اخذها علشان اوري اخواني واقهرهم طحت من فوق الثلاجه ومن الجنون ابكي واطارد فلوسي اجمعها علشان ماياخذوها اخواني