dubai2 :

السلام عليكم و رحمة الله و بركاته بخبركم بقصتي حملت بالانابيب و قتها عمري كان 34 و اعتبروه الدكاترة حمل عزيز و عندي سكري حمل كنت اراجع في مستشفى خاص و دكتورتي كانت عراقية جزاها الله خير نصحتني افتح ملف فالحكومي لان احتمال الولادة المبكرة و البيبي بيحتاج حضانه المهم فتحت فالحكومي وراجعت عندهم قرروا لي عملية و وافقت برحابة صدر دخلت المستشفى قبل و لادتي باسبوعين عشان آخذ ابرة الرئة و يراقبون السكر قبل موعدي ب10 ايام جاني الطلق و كانت تتحجر بطني بشكل فظيع و الله كانوا 3 يصوموني من الفجر للمغرب عالمغذيات بس و انا بطبيعتي ع طول مبتسمة لو بموت من الوجع يوم العملية مجوعيني من الصبح و جات الدكتورة الساعة 1الظهر و قعت عالعملية و ظلوا يماطلون وعذرهم يحاولون البيبي يظل اطول وقت عالساعة 6 ودوني عرفة العمليات سمعت الاذان و الدكاترة راحوا يصلون و ظليت انتظرهم و اسولف و يا الممرضات و بعدها بنجوني نصفي و شقوا بطني و ما سمعت صوت هدووووووء و بعد ربع ساعة سمعت صياح ولدي ولدي انولد ازرق اختنق ربي نجاه و الحمدلله حطوه ع صدري و مسكته و رفضت افكه اقولهم هذا مالي مالي لا تاخذونه و انا انفصلت عندي المشيمة و نزفت اذكر الدكتور قالي انتي نزفتي كثير بنسوياج بنج كامل انا كنت ميتة خوف اذكر نظراتهم و هم يسعفوني فالبداية حط الابرة في نص ايدي وسبحان الله الدم كان يفور يطلع وقام حط الابرة و انا صاحية في وريد الرقبة مباشرة و حطولي 4وحدات دم و اشتغل البنج الكامل احساس ما ينوصف حسيت اني في مكان مرتفع وااايد و الناس و اقفة فوق العاطراف يتساقطون مثل ورق الشجر بس بيضا و جا دوري رميت نفسي مثلهم وغبت عن الوعي اهلي تروعوا برع قسم العمليات سمعوا النداءات للدكاترة و بنك الدم ويشوفنهم يتراكضون و يدخلون و هم ساكتين ما يعرفون شو صاير بعد 6ساعات فوقوني داخل غرفة العمليات دكتورتي اسمها فاتن تناديني و الدكاترة كلهم فوق راسي و دموعهم في عيونهم لا يمكن انسى هالمنظر بحياتي كنت حاسة بشي كنت راجعة من مكان بعييد و جسمي منهك و تعبان الهمني و قتها بكلمتيني كنت اردد الحمدلله الحمدلله و اللهم لك الحمد دخلوني الانعاش يومين و سمحوا بالزيارة بس عشان يطمنون اهلي علي و الله كلهم عيونهم وارمة من الصياح ابوي امي اخواني زوجي و اهله سبحان الله كني مت و حييت مرة ثانية ربي لك الحمد كما ينبغي لجلال و جهك و عظيم سلطانك كله مكتوب بس السبب خطأهم و اعترفوا انهم تأخروا فالعمليةولدي دخلوه العناية و ظل 28يوم و عانيت مع ولدي اول سنتين في عيادات الخدج ما بين العيون و المخ الاعصاب الحمدلله ولدي الحين عمره 5سنوات و خاطري في بيبي ثاني هههه امي ما تباني احمل خايفة علي من الموت تقولي يكفيج واحد و الله يبارك لج فيه

السلام عليكم و رحمة الله و بركاته بخبركم بقصتي حملت بالانابيب و قتها عمري كان 34 و اعتبروه...

* تاج الوقار * :

بقول لكم ولادتي في ولدي الأخير طبعا بذكرها لكم عشان البكريات ينتبهون.. حملي الاخير كان متعب لاني ماكنت مستعده له لاصحيا ولا نفسيا وماكنت متوقعه اني بحمل وقتها.. خاصه ان حملي فيه ممداني ارتاح عقب ولادتي باللي قبله.. بينهم سنه الله يحفظهم. جاني الطلق في الليل يوم الجمعه الساعه ٢ ونصف الليل ماحبيت أستعجل نمت وقمت من النوم وقلت بشرب كمون وباكل تمر وامشي عشان اتاكد انه طلق ولاده وفعلا تأكدت انه ولاده ورحت الساعه ٣ ونصف وكان بين بيتي والمستشفى نصف ساعه تقريبا وصلت لهم دخلت الطوارى وقاسوني وصار الرحم مفتوح ماشاء الله ٧سم وقاسوا ضغطي لان معي ارتفاع ضغط بسرعه ودوني كشك الولاده.. ركبوا لي القسطره وجهاز الطلق والطلق حامي جدا مع كذا ماكنت اصارخ كنت ادعي قاسوا الرحم مرتين فقط مره في الطوارئ ومره اول ماصعدوني فوق كشك الولاده. لما شافته قالت لازال ٧سم وشوي الا بديت ادفع واحس بروح الحمام واقول للدكتوره تقول لا تنفسي واطلبها تقيس الرحم رفضت قالت هو موقف على ٧ بديت ابكي بديت ادفع اخر شي قالت انتي تدلعين وبنسوي لك عمليه قلت خلاص طيب طلعت بتجهزني للعمليه جابت لي لبس الراس تبع العمليه وشربتني دوا كنت ادفع كل ماجتني الطلقه واترجاها تكشف على الرحم ترفض تقول جهاز الطلق قدامي الرحم موقف على ٧ قمت ابكي واقول طيب اكشفي شوي بس وترفض قهرتني بعدها طلعت تجيب السرير تبع العمليه وجلست عندي الممرضه قلت لها اكشفي بس ناظري بس كم فتح والله كنت ارفع رجولي وتنزلها تقول ماأنفتح الرحم مدام ارتاحي اخر شي قلت لها طيب بس برفع رجولي ابيها تسمح لي ارفع رجولي وانتي شوفي بس والله كنت ادفع واحسه بيطلع يعني مو اول حمل لي واعرف قلت طيب والله بس حركت رجولي ورفعتها ونزلت راسها الممرضه الا صرخت بيبي كمن وزلق بسرعه وامسكته. قلت شفتي انا اعرف لما اقول لك ادفع وانتوا ماتصدقوني جت الدكتوره بتاخذني للعمليات شافت الممرضه ماسكه البيبي قالت الممرضه خلاص ولدت قالت طيب. يعني لوني تاخرت وقتها ومارفعت رجولي كان ايش صار لي ولولدي لوني بكر وماأعرف للولاده والدفع كان ايش حصل لي وللطفلي. جهاز الطلق كانوا يراقبون الطلق وشدته والرحم انفتح ١٠ مادروا ويشوفوني بديت ادفع بان انه زاد عن ٧ وتقول لي موقف على ٧ كنت ابكي وقتها اترجاها ترجع تكشف وكانت ترفض وتقول موقف على ٧ كان زوجي يسمعني أبكي وانا يعرفني ماعمري صارخت او بكيت بكل ولاداتي السابقه كنت مقهوره من الدكتوره ليش طبعا قلت للزوجي وقال للمدير المستشفى ماقدرت أسكت خاصه فكرت لوني بكر وماأعرف ايش بيكون وقتها موقفي انا وطفلي لكن الحمدلله.. ولدي عمره الآن سنتين ونصف وبخير الحمدلله لكن انتبهوا خصوصا يالبكريات اذا جيتي ورحمك مفتوح شوي ٢ او ٣ او ٤ سم ممكن لكن اذا رحمك مفتوح ٦ او ٧ فاعرفي انه ممكن يسرع يفتح زياده وخاصه ان صار الرحم ٧سم مع الطلق وشدته الرحم يفتح اسرع وتحسين بدفع كل شوي لازم يشيكون في ثواني يفتح ١٠ بدون ينتبهون.. والله يتمم عليكم ويولدكم بسلامه ياغاليات 🌹❤️🌷

بقول لكم ولادتي في ولدي الأخير طبعا بذكرها لكم عشان البكريات ينتبهون.. حملي الاخير كان متعب...