مساء النور والسرور
شخباركم

نوف الحربي
حرام عليك لا تجيبين لي طاري البطانيه والنوم الصبح والله عذاب
احيانا من كثر البرد تتجمد يديني
عاد انا وش اسوي احط يديني على وجيه البنات ادفيها وهم يموتون ضحك ماشاء الله وجيهم دافيه <<<<<<<<<< مفتريه
يا حليلهم ينبسطون على بالهم العبهم
اما عن تعميم الثنوي والله ماعندي خبر لاني ابتدائي والله يوفق بنتك يارب وتشوفينها دكتوره اد الدونيا

رحا
كيف عمر ان شاء الله صار احسن
قشري له جزره وخليه يعضض فيها بينبسط كثير وبتساعد اللثه على خروج الاسنان وسونه اعطيها جزره تصير كأن فيه حرب بينها وبين الجزره تهجم عليها بيدينها الثنتين وهات يا عظعظه ولا تعتقها لين تطيح منها

همسة غلا
يا هلا والله شخبارك يالغاليه الله يعينك ان شاء الله ويارب يرزقك شغاله بنت حلال ويحنن قلبها على بناتك

عيون مودي
الله يرزقنا جميعا بالبيت الملك ويرزقك انتي بعد بالشغاله الطيبه ولا تتركي الدعاء لان فعلا الشغاله الطيبه الحنونه الامينه تعتبر كنز هالايام نادرا تلقيه

سحايب صيف تسلمين يالغاليه الله يسمع منك ياقلبي ويخليلك امورتك,,
والله اني آخذه اجازه من العمل علشان بنتي رند
توها خمس شهور وما يطاوعني قلبي اخليها

يا حبيلكم والله وحشتووووووووووووني


انا بخير بس منغثة من الدراسة دعواتكم ..

توفي حبيبي طلع له سن ماشاء الله بس الحين تعبااااااااااان جدا من التطعيم والتسنين والبرد ..

تطوراته صار يزحف ويحوس علي وياخذ دروسي ويبي يقطعها وعنييييييييييييد اللي يبيه لازم ياخذه والا هاتك يا بكا ..

جهازي كان خارج الخدمة لمدة 3 اسابيع عقلت عن النت فيها خخخخخخخخخخ

احبكم في الله

سلام لكم جميعا مشكورين على الدعوات
نوف انا الحين بمدينة اسمها ليلى بس هادية هدوء المقابر وانا احب الازعاج والزحمة :)
عيون مودي هاه كيف الخبر ناوية الاسبوع الجاي اروح لها اغير جو شوي ان شاء الله الجو حلو ويصلح للطلعات
فرحة قلبه كيف ننساكي وكيف الدراسة معك الله يوفقك وتتخرجين ((في اي سنة انتي ؟؟))

هموسه كيف البنوتات ؟؟


وش رايكم كل وحده تجاوب على هالاسئله حلو الواحد يعرف اللي يحاكيهم ولو معلومات بسيطه

كم عمرك ؟(( عادي بدون احراج :) ))
عدد الاطفال عندك ؟
تاريخ ولادة اخر طفل؟
مكان ولادته ؟
اخر تطورات طفلك ؟
نصيحة سمعتيها حول الاطفال ؟


ابدأ بنفسي
كم عمرك ؟
العمر 26
عدد الاطفال عندك ؟
1 الله يحفظه جا بعد اربع سنوات
تاريخ ولادة اخر طفل؟
الجمعه 7 ابريل 2006
مكان ولادته ؟
الرياض مستشفى دله
اخر تطورات طفلك ؟
يادوب يقلب ويفحط بالمشاية وصاير يفتح الادراج

اما النصايح ياكثرها
منها انك لازم تكلمين طفلك وكأنه كبير حتى ينطق بسرعه

مساء الخير
منورين كلكم

شويكار انا بجاوب على اسئلتك

كم عمرك ؟
وش هالاحراج عاد هذا السؤال خليه على جنب اذا لقيت ناس اكبر مني رجعت وعلمتكم :)

عدد الاطفال
3 بنات الله يخليهم ويحفظهم واشوفهم عرايس
الكبيره 6 سنوات
الوسطى 3 سنوات
الصغيره وسونه 7 شهور و6 ايام

تاريخ ولادة آخر طفل
وسن كانت ولادتها في 14 /3 /1427 في مستشفى ابها الخاص
طبعا هالتاريخ عزيز على قلبي لانه بعد تاريخ ذكرى زواجي

آخر تطورات طفلك ؟
ماعندنا تطورات لا اسنان ولا انقلاب ولا شي بس بالمشايه ياسلام على انواع التخريب مثل ما قالت ام التوفي تحوس الدنيا علي اذا جيت احضر وتاكل الدفاتر والاوراق

نصيحه سمعتيها حول الاطفال ؟
هي بصراحه نصائح كثيره راح اكتب اللي اذكره
1ـ يمنع اعطاء الطفل العسل اذا كان عمره اقل من سنتين لان فيه نوع من البكتيريا الطفل ما يتحملها
2ـ يمنع الباس الطفل شراريب وقت النوم لانه يحبس الدوره الدمويه وممكن هيلا هوب افضل هذي النصيحه من عند زميلاتي اسمعهم دايم يقولونه
3ـ اذا اعطيت الطفل اكل معين وغريب عليه انتظر بعدها تقريبا 6 ساعات والاحظ هل هو متحسس من هالاكل او لا
4ـ واخيرا وصفه قريتها قبل فتره هنا في المنتدى لاحدى الاخوات الله يجزاها خير مااذكر اسمها وهي فعلا فادت مع بناتي ومع عيال زميلاتي
الوصفه هي للكحه عند الاطفال وهي يخلط شوي زيت زيتون+ شوي فكس+قطرات من الليمون
ويدهن بها باطن القدم من تحت بس ويلبس بعدها شراب (مو توك تقولين الشراريب ممنوعه)
المهم شي يغطي الرجل وقت النوم في الليل الوصفه تكون قبل النوم