موضوعي للفضفضه واخذ رايكم ...

صباح الخير صبايا ..
انا جديده ع المنتدى .. قريت كم موضوع وتحمست اسجل فيه ..
بقولكم قصتي باختصار .... واكيد الرجل هو البطل فيها ..
تزوجت قبل ثلاث سنين برجل مطلق وعنده 3 اطفال ... انا كنت رافضه الزواج ومو مقتنعه نهائي خصوصا انه بعد شهر من طلاقه تقدم لي .. وشهر فتره قصيره واكيد انه بيندم بعدين ويفكر في طليقته ..
المهم ... تزوجته بعد ضغط من الوالد والوالده .. وبصراحه هو انسان طيب وحنون ومتفهم كثير .. وفارق السن بيني وبينه اربع سنوات ...
بعد فتره من زواجنا كثر كلام الناس حوله .. وانه رجع طليقته من وراي ومن دون مااعرف ... وصلني الكلام ... انصدمت بقوه وجرحني الكلام ... واجهته وانكررر كل شي وقال انه مارجعها ولا شي وانا كنت مثل العميا وقتها صدقته ... وماصدقت كلام الناس نهائي ... يعني كان دائما معي ... ومابين قدامي شي .. لاهو ولا اهله ...
بعد فتره جاني وقالي ابغى اكلمك في موضوع ... قال انا ابغى ارجع طليقتي علشان اطفالها بس ... وعلشان ترتاحين من مسؤوليتهم ... انا وقتها انصعقت بالكلام ... وماطلع مني اي ردت فعل ... بس تنزل دموعي وماوقفت ..
تعبت نفسيا كثيررررر ونحفت وسمرت ... واي احد يشوفني يستغرب من شكلي ومن تغييري للأسوا ..
لان كلام الناس كان صحيح ... رجعها من دون علمي على ذمته .. بزواج جديد ورضاوه ...
جرحني بقوووووه وطعني في ظهري .... والكل كان ينتظر يسمع خبر طلاقي منه ... لكن ماصار الطلاق ... رحت لاهلي فتره وجا عندنا بعدها واعطاني نفس الرضوه اللي اعطاها طليقته .... وانا رضيت ارجع .... لان الحب ذلني بقوووه وماقدرت ابعد عنه او افكر بالطلاق ... مرت السنتين بحلوها ومرها ... ورزقني ربي خلالها بولد مثل القمر ...
مشكلتي مانسيت جرحه لي ... واذا تناسيت يوم اتذكر اليوم الثاني ... تعبت من التفكير ... والهم سكني ... مع ان زوجي ماتغير نهائي تجاهي .. بالعكس تعلق فيني اكثر وزاد تعلقه بعد ما انجبت ابني الاول ....
نصيحتي لاي بنت انها ماتستعجل وتاخذ رجل مطلق او عنده زوجه اذا كانت حساسه وماتحمل وتعرف ان غيرتها نار .... لان انا انسجت في حبه وماقدرت انسحب رغم نار الغيره اللي تحرقني ...
سامحوني ع الاطاله ... وادعو لي براحه البال ..