موضوع حز بخاطري

السلام عليكم
اهلين في اخواتي وحبيباتي 
الموضوع بسيط بس حز بخاطري 
الموضوع هو بنتي عمرها 3 سنوات
عنيده عصبيه راعية زعاق وصراخ عند الناس 
يعني في بيتي قمة الادب والاخلاق على الايباد ماتسمعين لها حس بس اذا طلعنا ناس عندهم اطفال مدري وش يصير لها تستلج على اي شي تبكي وتصارخ وتبي تتحكم في عيال الناس انت اللعب وانت لاتلعب هذا لايمشي معنا وهذا ابيه يالعب معنا ياماما الاطفال مو على كيفك بس ماتفهم
واذا ماطوعوها تجلس تبكي وتزاعق وتصارخ بصوت واحد احاول اهديها مقدر وتحرجني عند الناس 
خصوصا لما نجتمع عند جدتي تحرجني عند خالاتي وبزارين خالاتي 
الدرجة صارو مايصرون اجي عندهم ولايدقون ولا يسألون زي قبل اما قبل يوم كانت بنتي عمرها بالاشهر كنت وين انا عندهم دايم يدقون ويسألون
وبيني وبينكم انا عاذرتهم انا وهي بنتي اتضايق من تصرفاتها عاد كيف الناس 
بس المشكله الحين فيني صرت اطفش وحدي واتحاشى الناس كله بسبب تصرفات بنتي والله صار شي اساسي عندها كل مانطلع مكان لازم تسوي حفله صراخ وزعاق وصياح ونكد عند الناس 
لازم تطلعني متفشله 
والله الحين مسوين حفله اطفال ولاعزمونا بسبب بنتي يدرون بتنكد عليهم واعيد واكرر انا عاذرتهم الله يلوم اللي يلومهم بس والله مو حل انقطع عن العالم بسببها لازم حل معها تعبت والله من طبعها هذا اللي كل ماله ويتأزم زياده 
احاول بعض الاحيان اوريها صور الحفلات حقت الاطفال واقولها يسون حفله وماينادونا لانك تصارخين وتبكين مايحبونك لانك تبكي اذا رحتي الناس
بس احسها تتأثر شوي واذا راحت مكان فيه اطفال نست السالفه واذا بكت ولا زاعقت امسكها على جنب واقولها ترى ماعاد ينادوننا تجلسين بالبيت الحالك لانك تبكين عند الناس وتزعجينهم 
تطنش ويزيد صراخها وعنادها
وكله كوم واذا الناس بدو يتضايقون ويتكلمون افف وش هذا الازعاج ياماما اسكتي ازعجتينا نكد افففف 
اذا سمعت ذا الكلام مررره اتضايق واتحسر على بنتي 
مافيه حل يا اخوات لانه قبل بنتي كانت تهبل بس تقريبا من تمت سنتين وهي كذا