موضوع عن السجود قريته هنا ذكرني بشي كنت ناسيته

مساء الخير ( انا تعمدت اني مااسلم لان مو الكل يرد السلام ) ماكنت ابيكم تاخذون اثم بسببي


كيفكم بنات ؟؟ ان شاء الله طيبين يااااااارب

اغلبكم يعرف موضوعي مع زوجي الله يسامحه يارب ويحنن قلبه عليه ونرجع لبعض عاجلا غير عاجلا

( ادعووووولي يكفيني ترفعون ايدينكم لي وبس بدون ردود ولكم الاجر باذن الله ) يعني لاتعقبون على هالموضوع اللي هو الدعوات


المهم في اخت لنا هنا بهالقسم نزلت موضوع مرررره روعه الله يجزاها خير ياااارب


http://forum.hawaaworld.com/showthread.php?t=3711446


وذكرني بسالفه لها 5 سنين او يمكن اكثر

بقولكم القصه مره كنت انا وبنتي نايمين عند اهلي وابوها كان مسافر وكانت وقتها مره صغيره يعني اقل من 5 سنين بس مااتذكر كم بالضبط

كانت الحمد لله بصحه وعافيه مافيها اي شي ابد

كانوا اهلي وقتها ناقلين بيت جديد ومافيه بالغرفه الا كم فراش للنوم فقط

نمت انا وبنوتي بس مااتذكر كم كانت الساعه وقتها ؟؟ وانا بعز نومي حسيت ببنتي تهتز بشكل غريب ؟؟

افكرها تحلم سميت عليها ( قريت عليها قبل النوم لانها متعوده انها ماتنام الا لازم اقرا عليها )

شوي الا البنت بسم الله عليها تنتفض بقووووه وشوي بدت تصااارخ ( مثل ماقلت لكم البيت جديد واغلب الغرف مافيها اثاث )

الكل صحي على صوتها وصراخها وتجي امي تسمي عليها وتشيلها وتروح الصاله وابوي يشربها مويه والبنت بسم الله عليها تهز يدينها بقوه وفاتحه فمها وتصرخ وعيونها تقلبت ( طبعا انا لاتسئلون عن حالتي ابكي واصرخ واقول ايش فيها ؟؟ بتمووووت واخوي يمسكني لاني كنت اسحب بنتي من ايدين ابوي وامي ) تصدقون دمعت عيني لما تذكرت

بعدها هديت شوي الحمد لله وامي تهزئني تقول اكيد مسخنه قيسي حرارتها ( قسنا الحراره وكانت زايده شوي مره بس قلت من اللي صار فيها مسكينه زادت حرارتها )

ورجع الكل لغرفته ( وقتها مااتذكر الساعه كم بس كان وقتها قبل الفجر ) وانا اخذت بنتي وسميت عليه وقريت عليها ومسكينه كانت خايفه لانها حست باللي صار لها والحمد لله نامت وكل شي تمام

بس انا جلست على اعصابي مانمت زين كل شوي اصحى اطمن عليها

وتوني غفيت وشوي الا ترجع لبنتي نفس الحاله الاولى بس على اقوى ويدينها مسكرتها وتهزها بقوه وركبتها مثنيه وقريبه من بطنها ورقبتها مرفوعه شوي ومن كثر الصراخ اقسم بالله الكل انهبل وجاء الكل يجري وشالتها نفس الشي امي وتقرا عليها وتسمي عليها وبنتي بسم الله عليها تقلبت عيونها ماصرنا نشوف الا البياض ( انا جاني انهيار وجلست اصارخ بتموووووت بتموووووت بتمووووووت واهلي صاروا يسكتوني ويقولون خلاص خوفتي البنت زياده اذكري الله ) وهالمره اخواني جلسوا يبكون معاي شوي الا هديت ورجعت لحالتها الطبيعيه وكانت مررره تعبانه ومرهقه

انا على طول قلت لاخويه المستشفى بسرعه وديناها لليمامه حسبي الله ونعم الوكيل فيهم

بعد الانتظار بالاسياب قالوا بكل برود تشنج ( كيف تشنج مع صراخ ابي افهم ) التشنج يكون مثل السائل يطلع من الفم مو صراخ ؟؟ طبعا قلت هالكلام للدكتور قال لا هذي اعراض تشنج

قلت على الاقل نوموها عشان تسون لها اشعه ورنين قال لا مايحتاج ؟؟

عطاني ادويه مع انها ماطلع عندها لا التهاب ولا احتقان ؟؟ على اي اساس تعطوني ادويه من راسكم !!!

المهم انقهرت وطلعت صبرت كم يوم كذه وبعدها وديتها مستشفى خاص وكان الدكتور عراقي قال هذي اعراض كهرباء زايده في المخ ( وقتها كنت اول مره اسمع بهالشي ) قال لازم اشعه ورنين مغناطيسي
وطبعا السعر كان عالي ماتذكر كم بس كان بالالوف

دخلت النت وجلست اقرا عن هالموضوع باستمرار وكنت مااقدر ادفع لانه المبلغ خيالي بالنسبه لي ( طلبت ابوها وحكيت له السالفه ولا اهتم يقول انك تبالغين ونفس الشي جدتها ام ابوها قالت نفس الكلام ووصلت لحد انها تقول لاتشوهين سمعة بنتك ؟؟؟ !!! ايش رايكم مو تقهر

قلت انها انا ماشوهت سمعة بنتي ولا رحت قلت لاحد بس اقولك عشان تقنعين ابوها يتصرف او يعطيني الفلوس وانا بتصرف

مرت ايام وانا خايفه على البنت وعلى اعصابي وهي بعد صارت تخاف وصارت تجيها نفس الاعراض بس على خفيف حتى وهي صاحيه بس بدون صراخ

وتعدي بسرعه الحمد لله مو مثل المرتين الاولى

ويوم من الايام قالت امي بنتك يبيلها نوديها عند شيخ وديناها انا وامي وجلس يقول عين وشعرها ليه طويل مو على سنها والبنت ماشاء الله جميله ولا تبالغين في زينتها لان امي قالت له امها دائما تهتم كثير بلبسها ( قصيت شعرها وغيرت طريقة لبسها )

المهم عطانا زيت ومويه وصرنا دائما نعطيها ونقرا عليها بس نفس الشي حالتها ماتغيرت بس اكيد كلام الله سبحانه يفيد مهما كان

ومره من المرات قررت اروح اسويلها الرنين والاشعه بنفس المستشفى اللي رحت له اول ( لاتسئلوني عن المبلغ لان الله العالم وحده كيف دبرته ) اهلي كانوا معارضين بالمره عن الاشعه والرنين يقولون بتعذبينها واحنا متاكدين مافيها الا عين وبس وصرت اروح وحدي وتعرفون اشيلها من مكان لمكان وتعب نفسي وجسدي ( الحمد لله على كل حال )

طبعا تعذبت المسكينه ابر ومواعيد ولازم ماتتحرك ابدا في الرنين والاشاعه ( عندي صور لها تقطع القلب )

بعد فتره طلعت النتيجه قالوا كهرباء زايده بالمخ ويسمونها احيانا ( صرع بعد الشر على الجميع يارب )

انا تفاجئت وحتى اهلي قالوا لا تصدقين اقري على البنت وبس

حتى اهلها وابوها قالوا كلام فاضي ( قلت لهم انا اللي اشوف حالة بنتي والنفضه اللي كانت تجيها بين فتره وفتره مو انتم )


عطاني الدكتور دواء وقال لازم تاخذه بالوقت بالساعه والدقيقه ( مااتذكر كيف كانت طريقته بس الى الحين اتذكر شكله ومكانه في الثلاجه ومارميته الا بعد سنه ) قالي الدكتور احمدي ربك مابلعت لسانها واختنقت وغلط انكم تشربونها مويه وخليك جاهزه لانها بتجيها النوبه قريب لفيها على الجنب اليمين وحطي منشفه او قطعة قماش قي فمها ( كل ماتخيلت المنظر يجيني صداع )

كنت مره متردده ماودي اعطيها على كثر ماسمعت انها تتعود عليه ولا تقدر تبطله طول عمرها وله اعراض سلبيه اخذت التحاليل والاشعه والرنين ورحت عند كم مستشفى وقالوا لي نفس الكلام وبعض المستشفيات قالوا لي عيدي الرنين والاشعه ( بس رفضت للسببين اولها سمعت انها مضره ثانيا مستحيل اقدر ادبر فلوسها مره ثانيه )

ويوم من الايام كنت احكي لوحده قريبه لي عن وضع بنتي وانها محزنتني وكاسره خاطري وقلت لها الموضوع

قالت لي فيه حل عندي وهو اللي بعد الله سبحانه بيشفي بنتك قلت لها الدكتور يقول مالها شفاء بالوقت الحالي ولازم استمر على الادويه قالت جربي ايش بتخسرين ؟؟

قلت طيب ايش هو ؟؟ قالت السجوووود وخاصه السجود على الرمل الناعم

طبعا هزيت راسي وانا مستغربه وقلت ليش لا فعلا ليه مااجرب ؟؟ ايش راح اخسر ؟؟ ( لاتسووون مثلي وتقولون بنجرب ؟؟ خليكم واثقين من قدرة الله عز وجل )

وفعلا بديت اعلم بنتي الصلاة ( بنسخ لكم ردي بموضوع اختنا ملكا لاني تعبت من الكتابه وعورني قلبي لما تذكرت بنتي وحالتها زمان ) الله يحفظها يارب ويحفظ لكم اولادكم يااااااارب ( اولاد بمعنى ذكور واناث )








الله يجزاك خير يارب على هالمعلومات

سبحان الله اي شي في ديننا فيه منافع لنا ولا فيه ضرر

بنتي جاها شحنات كهربائيه زايده بالمخ ( كانت يجيها مثل التشنج مع صراخ وتكرر اكثر من مره ) يمكن من 5 سنين وهذا الشي اثبته كم طبيب وكم مستشفى واشاعات ورنين مغناطيسي وقتها بنتي مسكينه مرررره تعذبت وانا بعد تعبت نفسيا وقتها وحزنت عليها من الابر والتحاليل والاشعه

كثير ناس نصحوني مااعطيها ادويه ابدا لانها بتتعود عليها وقالت لي وحده الله يجزاها خير علاجها السجود وخاصه على الرمل

المهم توكلت على الله ولا عطيتها الدواء مع انه وربي كان موجود عندي واللي خوفني زياده انه مكتوب عليه لعلاج الصرع بعد الشر على الجميع ياااااارب

بديت اعلمها الصلاة مع انها صغيره مررره وقتها

صارت كل ماشافتني اصلي جت وصلت جنبي وتقلد حركاتي وكنت اتعمد اطول بالسجود

واقسم بالله وربي الشاهد عليه انه ليومنا هذا وللحظه هذي اللي اكتب فيها ماعاد جاها شي ولا شكت من شي

ماشاء الله تبارك الله وهذا من فضل ربي سبحانه ومن ثم بفضل السجود








اللي تشوف ردي تدعيلي انه الله يحنن قلب زوجي عليه ويسخره لي

يكفيني ترفعون ايديكم بدون ردود

ولكم الاجر باذن الله