موضوع عن القهوة وطريقة تحضيرهااااااااااااا

أولاً


لنحذر ولنحذر الجميع من تلك التي تباع في السواق وتحت مسميات مختلفه


منها ... خلطة القصيم ... خلطة حايل ... خلطة ام ناصر وام فالح وام قرون وهالومجراااا


هذه خلطات تجاريه الهدف منها الربح المادي لااقل ولا اكثر


وبعضها يخلط معها مواد لها ضرر كبير على الجسد


نصيحه لنتركها فما منها الا الضرر


بل استغرب كيف يصرح لها رسمياً





ثانياً


شغل اول لاتعداه أبد لافي طريقة تصليح القهوه ولا في خلطتها المعروفه


واليك طريقتي والأنواع التي افضلها وهي ولله الحمد ما اذكر احد عذربها


عليك بقهوة الخير باشنفر الهرري


لاتعداها كما اقل اخي عساس فهي الأفضل على الأطلاق واليك صورة كيسها الرسمي






للمزيد عنها راجع الرابط التالي


تعال شوف أطيب قهوة عربية << بن الخير .. باشنفر >> ( رصد بالصور ) ... راعي الهــدد ‏


هذا بخصوص نوع القهوه


اما مايوضع معها فالى الخطوة التاليه






ثالثاً


مايوضع مع القهوه التالي


الهيل .. الزعفران .. ريح زنجبيل مطحون ريح ريح فقط ... العويدي لمن يرغب


وجميل ان تضع لضيوفك دلتين


وحده عويدي ووحده بدون عويدي


أفضل هيل هو هيل ريحانه الهندي الأصلي وانتبه من المقلد


ففي السوق انواع مقلده منه


وهذه الهيل محبوك في زجاجة ابوحمد






الزعفران عليك بالطيب وخل الي يباع بعلب بجرامات فهو كله مغشوش


خذ كلام ابوحمد اذا تبي الزعفران الطيب علمتك


اما الردي فترآه كل الي بالسوق يباع بعلب مغلفه بجرامات فترآه كذب ودجل


عصب لحم مشرح شرائح صغيره ومصبوغ بألوان صناعيه


اشتر الزعفران الأصلي الطبيعي الي اذا شميته شق راسك من حلاوته وطيبه


شريت الكيلو بـ 3000 ثلاثة الآف ريال قبل الغلا


الآن سأشتري آخر لكون الذي عندي شبه نفد وسعرته وجدت الكيلو بــ 6000 ستة آلاف ريال


هذه صورة من آخر ماتبقى من الزعفران حصرته في فنجال الصين الشهير


















اهم شي طريقة حفظ القهوه وطريقة حفظ الهيل وطريقة حفظ كل البهار


كيف تحفظها ووشلون


بختصار عليك بعلب الزجاج محكمة الأغلاق وغيرها لاتدور


زي ماتشوف بالصور














المقدمة


شف كل ناس او نقدر نقول كل قبيلة او اهل منطقة لهم طريقة في اعداد القهوه العربية
ولو تتبعت الأمر لوجدت ان القهوه من اليمن خفيفه مره مره واحيان يصلحون بقشر القهوه فقط
اطلع شوي تغمق شوي الين تجي الأفلاج الخرج الحوطه الرياض حمستهم وسط اطلع شوي القصيم
حايل تغمق شوي تكون غامقه اطلع شوي تاصل عرعر تبوك سوريا اغمق الى ان تصل تركيا
مايشربونها الا سوداء مظلمه وهي القهوة التركية



الي ابي اتوصل له ان كل ناس لهم طريقتهم باعداد القهوه ولهم ميولهم ورغباتهم فافضل من يعلمك بالطريقه الزينه
هي من يسكن في محيطك وانا لااعلم وش ديرتك ولا وين ممكن اساعدك لكن يالغالي اليك طريقتي
وهي المفضله لدي وامخمخ عليها والي يسير علي يمخمخ بعد معي
ويروووق ههههه




الطريقه


بختصار ونخوك
انتبه من شغل هالتالين الي يصلح كل شي ببريق واحد
البريق هذا يفوح فيه الماء ويقند القهوه فيه يعني يصلح ويبهر القهوه فيه بعد هذا غلط
وهذا اسمح لي اقول له انه ماهو راعي كيف وخرموطي رقم 1



طريقة اعداد القهوه الصحيحة


تحتاج الى عدد 2 بريق و 1 دله قهوة


اولاً
تفوح الماء حتى يصل الى درجة الغليان ( يقلب يعني )
ثم تجيب البريق الثاني وتحط مقدار القهوة فيه وغالبا كل لتر ونصف من الماء يوضع معه فنجال قهوه مطحونه فنجال ماهو مليان مره
المهم تحط القهوة المطحونه في البريق ثم تصب عليه من الماء الفايح ووقت وانت تصب الماء على القهوة حرك البريق حركه والماء يصب
من شان لايلبق شي من القهوة بقاع البريق فتنوشه الضو الحارة فيطلع ريح حراق بسيط المهم اذا صبيت مقدار الماء على القهوة ارفع عليها النار مره
الين تبدا تقلب ثم خلاص اقصر عليها الين ونخوك تصير القهوه تقلب قلب خفيف وخلها وصك الغطاء انتبه تتركه مفتوح خلها مكتومه ريحها فيها
وخلها الين ( تقطع ) يعني تستوي او يضبط طعمها وغالبا من 10 دقايق الى 15 دقيقه تكون قطعت القهوة خلاص بعد هذا جب الدلة
وحط فيها مقدار الهيل وانا ما اعرف وش حجم دلتك كان علمتك كم تحط هيل بس ونخوك فيه ناس يحبون كثر الهيل وناس لا خفيف
بس اهم شي يكون بها هيل ولو على الأقل نصف ملعقة ملعقة الأكل لاينقص عنها مهما كانت الضروف
لأن القهوة الي مابها هيل مابها خير وقد قال الشاعر
الدلة الي ماتبهر من الهيل ..... مثل العجوز الي خبيثن نسمها



المهم حط مقدار الهيل بالدلة وحط معها شوي زعفران وشوي مسمار حسب الرغبه وهذه تكميلية ونخوك على مزاجك وخرمتك
وفيه ناس بعد يحطون شنه وناس يحطون شوي زنجبيل ولكن الصحيح والله اعلم ان القهوة بس قهوة وهيل وزعفران
واحيان مسمار خص اذا راسك صاكك او يعورك فحط مسمار (عويدي)



اذا حطيت البهار المذكور اعلاه بالدلة وطفيت النار عن القهوة نزل القهوه ولا تصبها بالدلة الحين لا ونخوك خلها شوي بالأرض لاتحركها الين تركد
وش معنى تركد يعني ينزل حثال القهوه وحبيباتها تحت وتصفا تصير صافيه يعني خلها ربع دقيقه تقريبا كذا ثم زلها بالدلة صبها بالدله
ولاتملا الدله لا بقى ربع الدله ثم شب النار وفوح الدلة بالبهار الي فيها اذا قلبت قلبه وحده نزل الدله ونخوك وفللها من القهوه الي بالبريق
الين تمتلي قهوه ثم حط ليفتك في ثم الدلة بعض الناس يسميها ليفه وبعظهم يسميها لثامه كل منطقة ولهم اسم
والليفة هي الليف الي بجذع النخله ووضيفته يشخل لك القهوه ماينزل حب الهيل بالفنجال
وعند العرب ان صبتك للضيف الفنجال بدون ليفه انه من عدم الأكرام
حيث انك ستضطر ضيفك انه ينشب بحب الهيل في فمه
او يلفظه قدام الرجال وهذه احراج له
وعدم اكرام فاحرص
على الليفه تكون بثم الدله
او مثعاب الدله



ثم ونخوك قلط القهوه للرجال والله الله ونخوك بالطيب من القهوه والطيب من الزعفران والطيب من الهيل
ولو غلي ثمنه فهذا الكرم وهذا العلم الي ينومسك وينومس ضيفانك


هذا مالدي وانا معك اسأل عن ماتريد


الزعفران الآن هذه الأيام كيلوه بـ 16 الف ريال
الهيل الهندي ريحانه كيلوه بـ 120 ريال
القهوه 5 كيلو بـ 110 ريال



طبعا الموضوع منقول
صراحه انصدمت من سعر الزعفران
معقوله اللي ناخذه مغشوش وعصب لحم
مصبوغ ..................