موضوع للنقاش بخصوص نصايحكم في عالم حواء

بسم الله الرحمن الرحيم

اولا الموضوع للنقاش للي عندها معلومات للي عندها شرح للي حابه تفهم وتفهّم
وماهو للسب والشتم والعصبيه ورد عضوه على عضوه وتفزع لها عضوه ثانيه ويروح لب الموضوع
لاني بجد حااااابه استفيد وافيد

نجي للموضوع
انا عن نفسي ادخل قسم حياه اسريه سعيده يوميا اقرا مشاكل بعض الاخوات واقرا الردود والنصايح حتى لو مارديت عليها لكن مااخرج الا وانا دعيت لها لكن لفت نظري بعض النصايح احيانا لما اجلس لحالي وافكر فيها اقول ممكن تكون صح وممكن لا بس الاغلب انها صح
النصيحه اللي عااااالقه في ذهني وبصراحه شديده هالنصيحه ماعرفتها الا من عالم حواء فقط وبدأت اركز عليها وانتبه لها وهي
طنشي الرجال يلحقك ، اهتمي فيه يطنشك
بالفعل حسيتها منطقيه شوي بس احيانا نحتاج لاحد يشرح لنا اكثر يفهمنا اكثر حتى ماننفذ هالوصيه غلط بمعنى انا نصحتك نصيحه لازم تكون واضحه كيف تنفذيها
طيب اذا طنشت الزوجه زوجها او بمعنى ادق اهتمت بنفسها وبدت نفسها عليه وعلى طلباته وماتنازلت عن اي حق من حقوقها مهما كانت الاسباب هنا الرجل يحترمها ويقدرها ويعمل لها الف حساب
طيب ممكن نتعمق شوي فيها يعني كيف ممكن اهتم بنفسي واركز عليها بدون مااهمل بيتي واطفالي
طيب مو ممكن الزوجه تهتم بنفسها وتراعي صحتها وراحتها والزوج يمل في اي لحظه
يجي بباله ان متطلباتها كثيره وكل يوم والثاني تشتري لنفسها وتدلع نفسها على حساب جيبه وحتى لو ماجا بباله ممكن احد ينبهه امه او اخته او حتى زميله بالعمل وينصحوه يتزوج وحده موظفه تساعده بدل هذه اللي ماتخلص طلباتها؟!!
انا هنا مااعيب على النصيحه بقدر ماني حابه انها تتقدم صح مع توضيح يعني ايش ممكن تسوي الزوجه كيف تنفذ نصيحه اهتمي بنفسك وقدميها على الكل يحبك ويدور رضاك
احنا محتاجين هالتوضيح ليه؟ لاننا تربينا تربية الطيبين اللي عندهم تقدمي الرجل على نفسك وعلى اهلك وعلى صحتك وعلى كل احد وتربينا على حاضر وعلى عيني وراسي وتربينا على ان الزوجه السنعه ست البيت الشاطره هي المطلوبه والمرغوبه وكل هذا في هالايام ماعاد يعبي عين الزوج ماهمه حرمه سنعه وتطبخ كل الاطباق العالميه والشرقيه والغربيه ولاعاد تهمه اللي حاضر ياسيدي وامرك ياتاج راسي لا
تلفت نظره وحده تلبس وتكشخ لنفسها مو له وحتى ماتاخذ رأيه ابدا لانها واثقه من نفسها ليه تساله ايش رايك عجبتك؟ لا ماعمره سمع هالسؤال منها
لهالسبب حابه اعرف حتى استفيد وتستفيد غيري كيف تكوني انت اولا واخرا ومن بعدك كل البشر بدون تكبر ولاتعدي ولااهمال
كيف تنفذي نصيحة الاخوات اهتمي بنفسك يلحقك ايش ممكن الوحده تعمل
وطبعا اولا واخرا وانا عارفه المحبه من الله بس كمان مانجلس نتفرج ونقول خلاص المحبه من الله اذا حبني مابيشوف عيوبي واذا ماحبني ماحسوي شي الله كاتب كذا
مااعترض لكن نبذل الاسباب
هل انت مع هالنصيحه؟ فيكم وحده نفذتها واكتشفت انها نصيحه من ذهب ؟ طيب اعطونا تجارب وايش ممكن الوحده تسوي حتى نقول عنها والله هالزوجه مطنشه زوجها ولاحقها
ايش مفهومك لهالتطنيش ؟؟ وهل له وقت محدد والا على طول
موضوعي للنقاش
ورجاء حااااار اللي مو عاجبها موضوعي ممكن تتفضل بدون لاترد مااجبرها واللي عندها اعتراض او كلام ياليت يكون في حدود الادب والاحترام لاننا نتناقش مانتحارب
ودمتم بود