السلام عليكم

اختكم كلمت صالون مانا سنتر وسالما سنتر طبعا بجده

صالون قالت لي اللي تسويه وحده بس وتسوي قبل تست على الشعر واسعارهم تبتدي من 1800 فما فوق ويسونه في جلسه وحده مدتها من خمس الى سبع ساعات بالكثييير

والصالون الثاني قالت كلهم يعرفون يسوونه وهم اول صالون بجده سووه وتسويه على ثلاث مراحل ومن دون تست اول مرحله قرابه الخمس او الست ساعات واليوم اللي عقبه تسويه مده ساعه او نص ساعه واليوم الثالث نص ساعه او ربع على حسب قلت لها ليش ثلاث مراحل قالت عشان هو لازم ما يجيه مويه او يخرب من النوم عشان كذا نعدل اللي خرب وقالت لي عندهم خصم قبل 20 رمضان ولا حجز ولا شي واسعارهم تقريبا نفس اسعار الصالون الاول بس انا ما ارتحت لهم لانهم كلهم يسوونه ومحتاره جدا

ما ادري ويش رايكم خواتي اسويه عند الاول ولا الثاني

السلام عليكم

عملت اليوكو قبل يومين
وللأسف توني أطلع على المواضيع في المنتدى الي تتكلم عن اليوكو

لكن يسعدني أقول لكم تجربتي

اختي سوّت اليوكو ا قبل أقل من سنة بمشغل قاردينيا على طريق العروبة بالرياض
والي تعمله هي ندى صاحبة المشغل ويساعدونها الفلبينيات
لازم تحجزي لك موعد ثم تروحي لهم وتأكديه عن طريق دفع العربون ( ألف ريال ) وبعدين يتحدد باقي المبلغ
من قبل صاحبة المشغل لما تجين تعملين اليوكو, لكن أقل سعر 1800 هذي الي قصّتها مثل الولد
المهم اختي كانت تصبغ شعرها كثير وتعمل هاي لايت , ولمّا راحت تعمل اليوكو كان باقي فيه آثار صبغة بسيطة لأنها جلست فترة ما تعمل بشعرها شئ , نصحتها صاحبة المشغل أنها ما تسويه , لكن اختي أصرّت
ولمّا عملت اليوكو أذكرها في البداية كانت فرحانة وعاجبها وفيه لمعة بعد مدة خرب شوي , للسبب السابق , وكذلك لأنها لم تعتني فيه .
والآن بعد مرور سنة قبل اسبوع حجزت لها موعد في قاردينيا لأنه عاجبها شغلهم وكانت تاركة شعرها فترة ماتصبغه علشان تعمل اليوكو
وشجّعتني أعمله أيضا وفعلا حجزت موعد وعملناه ,

وقت الجلسة :
تستمر المدة ست ساعات تقريبا وقد تنقص عن ذلك ,

بعد نهاية جلسة اليوكو :
أول ماانتهيت جالي إحباط شديد
لأن شعري بطبيعته ملوي نفسه ولمّا عملته صاير سايح ومن تحت واقف شوي , وأنا ماأحب الشعر السايح مرة
و قالت لي لا بد تتكريه 48 ساعة ماتربطينه أو تحطينه ورا أذانك وماتجيه موية ( لمّا أتوضأ أمسح بالقدر المُجزئ للوضوء ) ,و قالت بكره راح يكون شكله أسيح من كذا وبعد بكره راح يضيق صدرك أكثر ويلصق عليك , والي صار أن شعري من بكره صار أثقل شوي ولا ساح مثل اليوم الي قبله , ماأدري إيش السبب , لكن ربّما لطبيعة شعري

, بعد انتهائ مدة الـ 48 ساعة :
غسلته بالشامبو والماسك الخاص ( راح أكتب لكم أسمائهم ) , ولمّا غسلته بالشامبو بجد كان ودي أصيح لأني أحس الشعرة ناشفة ولاصق الشعر على بعضه , ولمّا حطيت الماسك صار أخف , نشفته وحطيت عليه زيت زيتون وصار أخف بعد
وانتبهوا الله يعافيكم كلامي السابق ماهو نهائي , بمعنى أن نتيجة اليوكو الطبيعية ماهو شرط تبين من أول الأيام
لأني لاحظت أن بعض الأخوات أول ماعملوه كان روعة وبعدين ساء وضعه

العناية بالشعر بعد اليوكو :
لا بد , وضروري جدًا تداومي على عمل حمام زيت كل اسبوع
بالنسبة لي أخذت من المشغل بوصفة من صاحبته شامبو من لوريال ا :
bain oleo relax
كيراستاس / حمام للشعر

وكريم من لوريال :
oleo relax
كيراستاس / ماسك للشعر
هذا مثل البلسم تضعينه على شعرك بعد الشامبو
وتتركينه عشر أو خمس عشرة دقيقة ثم تغسلينه بالماء مضبوط

بالنسبة للماسك اختي من زمان وهي تستخدمه وعاجبها, ومرة كانت مسافرة نسيت هي سفرة باريس أو كندا
دخلت على محل تجميل كبير فيه صالونات كوافير , ويبيعون مستلزمات الشعر
طلبت منهم أفضل كريم للشعر , أعطوها هذا الكريم .

* عند رغبتك في عمل صبغة بعد اليوكو ممكن تعملينها لكن بعد مدة ماتقل عن اسبوعين , وماتكون صبغة فاتحة كالبيج والثلجي ؛ لأنها تحرق الشعر , ولا تعملي هاي لايت ؛ لأنه ضار جدا حتى للشعر الطبيعي .

استقامة أطراف الشعر بعد اليوكو :
* لاحظت البعض يشتكون من كون الشعر مثل الإبر من تحت , وقد حصل لشعري مثل ذلك , مع أنه في طبيعته متوسط النعومة , وملفلف نفسه بطريقة جميلة , كلفلفة اللفافات .
لكن بعد مرحلة الغسل والماسك والزيت رجعت أطرافه طبيعية وملفلفة نفسها كالسابق لكن بشكل أخف كثير , لذا كون الشعر فيه إبر من تحت قد يرجع لطبيعة الشعر , ومن الأخوات من ذكرن أن الشعرذو القصة المدرجة يحصل معاه ذلك , وأقول ربما , وهناك من ذكر أنه مع الوقت والعناية يتحسن وأقول ممكن جدا فالعناية جدا مهمة بعد اليوكو .

* تساقط الشعر بعد اليوكو :
ذكر البعض أن تساقط الشعر يعود لأداء الكوافيرة , وأقول ممكن جدا لأنه من المهم تكون الي تعمله شاطرة ومعتمدة ,
وكذلك أضيف أنه من الأسباب عدم العناية بالشعر , فالعناية جدا مهمة للشعر الطبيعي , فكيف بغيره .
وما لحظته من خلال كتابات الأخوات الي عملوا اليوكو أنهم مااعتنوا بشعرهم , وهذا ماحصل لاختي كان في البداية شعرها حلو وبعدين خرب , والسبب الرئيس عدم عنايتها فيه .
فإذا أنت كنت عاملة اليوكو عند مشغل معتمد وكنت مداومة على العناية فيه , ومع ذلك ظل شعرك في أطرافه مستقيم , أو أصبح يتساقط , حينها ممكن تقولي ممكن الأمر يعود لصاحبة المشغل . حبيت أنوه ؛ لأن اتهام الآخرين دون سبب واضح إجحاف بحقهم .

نعومة الشعر بعد اليوكو :
تختلف نعومة الشعر بعد اليوكو , وهو في نظري إذا كانت الكوافيرة ماهرة فيرجع لطبيعة شعرك
فإذا كان شعرك ملوي نفسه ولم تختفي تلك اللويات تماما فتوقعي أن سبب ذلك طبيعة شعرك.

قبل الختام :

من خلال قرائتي مواضيع المنتدى السابقة وسؤالي عن اليوكو خرجت بالنقاط التالية :

* عليك بعمل اليوكو عند المكان المعتمد ثم أيضًا تسألين وتتأكدين عن مهارتهم .

* قبل عملك اليوكو لا بد مايكون شعرك مصبوغ ولا فيه حنا , والأفضل أنك تطلبين من الي راح تعمل لك اليوكو تفحصه لك هل يناسبه أو لا .

* واليوكو في الأصل يقوم على تغذية الشعر بالبروتين والكولاجين بنسبة80% تقريبا و20 %واد كيميائية
طبعا تختلف هالنسبة من محل لمحل كل حسب أمانته , لكن هذه هي النسبة الطبيعية والمعقولة .

اممممممم , ماادري إذا فيه شئ ثاني أقوله

تقريبا هذا كل شئ , وسلامتكم ..

أختي وِثاب...

المعلومات ألي قلتيها مرة زينه...

بس أبي أعرف! بعد اليوكو الشعر يصير مسشور يعني؟ وله بس نازل؟؟

أهلين
محرقية وبس
بالنسبة لشعري ماهو سايح مرة مثل شعر الفلبينيات مثلا
لا , فيه لفلفة وتجعيدة حلوة ,

اختي محرقية وبس مثل ماقلت في ردي على نعومة الشعر بعد اليوكو

نعومة الشعر بعد اليوكو :
تختلف نعومة الشعر بعد اليوكو , وهو في نظري إذا كانت الكوافيرة ماهرة فيرجع لطبيعة شعرك
فإذا كان شعرك ملوي نفسه ولم تختفي تلك اللويات تماما فتوقعي أن سبب ذلك طبيعة شعرك.

أنا شعرتي ماهي خفيفة متوسطة الثقل
غير كذا شعري طبيعته ملفلف نفسه حتى الكوافيرات الي أعمل شعري عندهم
يقولون ميزة شعرك أنه ملفلف نفسه , والي خلاني أعمل اليوكو أن شعري كثير ماشاء الله وزيادة على كذا بطبيعته ملفلف ووجهي مايتحمّل , فحبيت يكون أهجد .
لذا لمّا بقيت فيه تجعّدات مااستغربت , هذا هو حد شعري وكونه صار بهاالشكل زين منه
يعني وحدة شعرها ملفلف روحه مثلي وتعمل يوكو نتيجتها مو مثل وحدة لفلفة شعرها بسيطة وتعمله

أضرب لكم مثال : وحدة سمينة وعملت رجيم نتيجتها مو مثل نتيجة وحدة ثانية أكثر سمنة وعملت نفس الرجيم
هذي ممكن يخف وزنها سبعة كيلو والثانية أقل ؛ طبيعي جدا يكون فيه تفاوت , وذلك على حسب طبيعة الجسم
ومدى تقبله وتفاعله وتجاوبه
نفس الشئ وحدة عاملة اليوكو بأصوله ووحدة ثانية عاملته بنفس طريقة الأولى , راح تكون نتايجهم تختلف .

فهمتي علي اختي , والعضوات جميعا , هذي النقطة مهمة جدا ,

وبعدين ياالعزيزات الشعر مو مهم يكون ناعم وسايح , بل المهم يكون ملائم لطبيعة وجهك وشكله مرتب حتى ولو كان مجعّد , سابقا كانوا قريباتي يحسدوني على شعري حتى الي شعورهم ناعمة ؛ لأنه ملفلف نفسه
وبعدين الشعر المجعّد والي ماهو سايح مرة تقدرين تعملين فيه تسريحة , الشعر المجعّد يعطي الشكل فخامة
بينما أعرف كثير من قريباتي شعورهم سايحة , وراحمتهم لأنه مايقدرون يعملون فيه تسريحة ولا حركة , والقصّات مايبين شكلها على شعورهم , بينما الي شعرها ثقيل وما هو سايح مرة بإمكانها لمّا تبغى تروح مناسبة تعمل له حركات , وبسهولة يكون مثل ماتبي , والقصة تبين عليه .

وعموما شعري اليوم أنا غسلته وحطيت عليه زيت مابعد جرّبت أتركه بعد الاستحمام وأشوف نتيجته الطبيعية إذ مالي عاملة اليوكو ثلاث أيام وإذا صار تغير في شعري راح أقول لكم بإذن الله

............

مشكورة حبيبتي وانشاء الله بننتظر نتايجك.....