موضوع محيرني.. كيف ترد العرووس على استجوابات الناس!!

السلام عليكم ورحمة الله وبركاته..

خطرت ابالي وايد اسئله.. وقلت أيي واسألكم وأنا متأكده إني بلقى الجواب الشافي ان شالله..

اسمحولي أدري اذيتكم بالأسئله.. بتفتكون مني قريب :( ((دوم أقولها لأخواني))..
بس متخوفه وايد من نقطه وقلت أسبق الأحداث.. واستعد لها..


السالفه الله يسلمكم.. إني مثل ما تعرفون قرب عرسي.. وقاعده أتخيل.. بعد العرس.. يوم يسلمون علينا الأهل والأقارب.. ونجتمع كالعاده.. بيجتمعون الحريم حولي :(.. وبتبدا الأسئله.. اللي بعضها ممكن تكون بريئه وبعضها لا..

مثلاً (شو قالج؟)
(متى نمتوا؟)

وبدون تفصيل انتوا تعرفون الهدف من بعض هالأسئله..

وانا واجهت موقف مشابه بيوم الملجه.. يوم دخل وقعد وياي شوي وطلع,,, اجتمعوا حولي.. أهلي وأهله.. شو قالج وشو قلتي... حلفتج بالله تقولين!!!.... إلخ.. ومن ناس أعزهم.. ومن كثر الحصار قلت جمله بس من اللي قالها لي(ملامحج ما تغيرت من كنتي صغيره).. وللحين ندمانه اني خبرتهم.. مع ان الجمله بسيطه ومافيها شي.. بس أحس هالاأشياء بينا مب شرط تنقال.. حتى الحين يستجوبوني.. شو يقولج يوم يتصل؟... إلخ

المهم.. هذا غير بنات العايله اللي كبرج.. مثل بنات العم والخال.. الكل يبي يستفسر بدافع الفضول مثلاً.. أما الأخوات.. بهدف الإطمئنان يمكن..

المهم شسوي؟؟.. وكيف ترد كل عروس على هالكم من الاستفسارات.. وكيف تخلص نفسها من الحصار.. وشو تسوي لو حلفووها!! وكيف تراويهم من أول سؤال ان هالشي يضايقها عشان يتوقفون..

أكيد كلكم مريتوا بهالمواقف.. كيف تصرفتوا؟ وبشو تنصحوني..