حبيبتي بسمه .... والله تقدرين ولكن بشرط ان تكون عندك اراده من الداخل انك لا ترغبين باحضار شغاله جديده .. واللي يقولون صعب ويازين الشغاله والله اني راحمتهم ...وما ودي ينتظرون لين يتضررون من الشغالات وبعدين ياخذون نفس قرارك ...انا وحده جربت الحالتين وموظفه..واقول الحياه حلوه من غير شغاله بس مع شوية اراده وتصميم وتنظيم واتمنى لك التوفيق ..

كل عام وانتي بخير قبل ما ارد عليك شوفي بسومه انا زيك بس مو موظفه يعني ربت بيت كنت على الشغالات
وحده رايحه والثانيه جايه بس الحين كملت السنه من غير شغاله تعبت من حوستهم ومشاكلهم الى ماتخلص
افقررت استغنى عنهم للابدبس لما يسيل لعابي ابي ارتاح او اخرج اضطر اقول ابي شغاله بس مع منتدي الرائع واخواتي في عالم حواء حمسوني كثير على الشغل في البيت ولذة الشغل فيه
ورفع المعنويات واني اقدر اواصل بفضل الله ثم العزيمه والاراده طبعا
لاتنسي تنظيم الوقت وعن جد اكلمك ا حلا الحريه في البيت هذا اهم حاجه ولا احد يغثك في الر وحه والجايه
انتي توكلي على الله وخلي ارادتك قويه وان شاء الله مايخيب رجائك
صح مره بالطالع مره بالنازل بس الحمدلله الحين احسن والاف ميل تبدا بخطوه
تقبلي مروري بصدر رحب

حبيبتي بأنقلك تجربتي .. انا من يوم كنت في اول متوسط يعني من 22 سنة وانا عند امي من شغالة في شغالة وتزوجت طبعا سرت موظفة وصار نفس الشي من شغالة في شغالة قرفت حياتي وكرهت مطبخي في وجودهم فقررت قبل اكثر من نصف سنة ان اخطو هذه الخطوة وفعلا فعلتها وتخليت عن الخادمة ويااااااااااااااما اجملها من ايام عشتها ببيتي حسيت بالنظافة الحقيقية في مطبخي وشفت تعاون زوجي واطفالي معاي وبعد اربعة اشهر تقريبا عدت لهم لكن لماذا ...؟ لأن امي مريضة اسأل الله لها العافية قولوا آمين وولدي صغير سنة ونصف فكان يتعبها وما عندها خادمة لكن هالمرة غيرت الجنسية وتوها جاية من كم شهر استنى بس يكمل ولدي اربع سنوات وادخله روضة وخلالالالالالالالالالالالالالالاص اودع الخادمات بلا رجعة ان شاء الله والله ان البيت بدونهم روعة الشغل متعب بس حلو بدونهم ... حتى زوجك تحسيه يسير يحس فيك ويتذوق طبخك ويعجب بلمساتك في البيت مو زي لما تكون موجودة صدقيني اذا عندك احدلعيالك الحياة بدونهم روعة روعة روعة وهذي تجربتي انقلها لك بكل صدق بيتي سبع غرف يعني وسط مو كبير والا صغير واغلب الغرف فيه سيراميك انتي حطي لنفسك جدول نظافة وما راح تتعبي كل شيء راح يمر بيسر وسهولة ولا تنسي قبل النوم تسبيحات النشاط سبحان الله 33 والحمد لله 33 والله اكبر 34

بسومة

أنا أشجعك على هالخطوة

جربي واحكمي بعدين

أنا زيك موظفة وعندي أربع بنات >>>> الله يحفظهن

للحين ما استغنيت لكن حايمة كبدي منهن

فيه بنتين في المنتدى عطوني نصائح رااااااااااااائعة

راح ابحث لك عنها واحطها لك ان شاء الله





تبين الحقيقة حياتنا فيها شيء من الخطأ علشان كذا ما نقدر نستغني بسهولة

منها بيوتنا كبار >>>>> ما اتكلم عن نفسي حالياً لأني ببيت اجار

تربيتنا لعيالنا دلع في دلع ما تعودوا يرفعون الكاس من الارض

يوم كنت بسن بنتي الكبيرة ثالث ابتدائي كنت اصحى الصبح مع اختي الي بالمتوسط هي تجهز الشاهي والفطور وانا اصلح الساندوتشات ..... وبناتنا ألحين لو ما تلقى وجبتها في الشنطة زعلت عليك


حتى الولد عندنا مدلع ما له دور في البيت والسبب كونه ولد

لو على الاقل يضف حوسته ويرتب غرفته كثر خيره

هذا غير التكلف في اللبس النوم له لبس والبيت له لبس خلي لبس البيت ضافي وساتر ويناسب النوم بكذا ما تكثر الملابس والغسيل علينا ...

الطبخ صار اشكال والوان

تفنني مرة بالاسبوع علميهم انك تعرفين وباقي الاسبوع عادي

الكلام يطول في هذا الموضوع

هذي وجهة نظري

اتمنى تفيدك

هذا رد اختي ( مولدي عيناك ) عليّ في موضوع الملف الخامس ليوميات الحريم السنعات