موظفة وفلوسي ترووح مصروف لبيته!تع

السلام عليكم
بدخل بالموضوع ع طول؛
انا وزوجي موظفين الحمد لله وتقريبا نستلم نفس الراتب. المشكلة ان زوجي من النوع اللي مايجلس في جيبه ريال. يعني من نص الشهر مفلس. وطبعا مين اللي ينقذه؟ أنا. صار راتبي مو لي، صار لأغراض السوبر ماركت و أغراض ناقصة للبيت ولو أبغى لو ضروريات ناقصة البيت أحلم يقدر يجيبها. من غير ملابس أولادي ووالله وصل فيا الحال اني حتى مكيف لو خرب انا اللي أشتري غيره او غسالة. يعني بإختصار زوجي بيفلسني وبيخليني زيه فلوسي تروح يمين وشمال. ووالله كان معايا مبلغ ممتاز من وظيفة سابقة ولما توظفت حكومي جات مع رواتبي ماشاء الله مبلغ حلو قلت بدلع نفسي فيه. لكن للأسف رااااح ع بيته تكميل أثاث ناقص وأجهزة للبيت وتلفزيون وغرفة نوم. لان هو مايقدر ولو بيجيب استنى شهوور عشان يكتمل معاه مبلغ شي واحد. لان زي ماقلت لكم هو من النوع ينزل الراتب ينصرف كامل مكمل وماعنده رصيد بالبنك للاحتياط او للازمات وينتظر الراتب اللي بعده وهكذا. وكل شوي يحلف لي بعوضك وارجع لك فلوسك، لكن اذا غرض بألفين مايقدر يشتريهم يروح يرجع لي عشرة آلاف ريال صرفتها ع بيته في شهرين؟
تقولون لي ليش مايشتريهم هو، أقولكم ان راتبه موزع ع ايجار وفواتير ولو بيشتري مثلا تلفزيون بألف ولا ألفين كذا ينضرب راتبه وينضغط بالمصاريف وغالبا يصفر حسابه بسرعة.
الزبدة بنات انا مضايقني هذا الشي، لكن ايش أسوي؟ هل تصرفي صحيح؟ المشكلة مقدر اقول لا، لان والله ثلاجتي فاضية ولو مارحت اشتريت بفلوسي اعبيها، بتقعد فاضية للراتب اللي بعده.
الموظفات سؤالي لكم مامقدار مساهمتك في مصاريف البيت؟! انا أتكلم عن المساهمة في مصاريف البيت ايش حدودك فيها؟ لاتجي وحدة تقول غبية وفلوسك وبيتجوز عليك ويجمع فلوسه، هذا مو موضوعي.
وللعلم زوجي جدا طيب ماشاء الله ومايقصر لو معاه .