موعدي اليوم مع الدكتوره , ومعجزة الرضاء بالقضاء !!

السلام عليكم ورحمة وبركاته
انا يابنات مثل ماتعرفون عندي ارتفاع بهرمون الاف اس اتش وعندس سن يأس مبكر وعملت قبل ايام تحليل مخزون المبيض وطلعت النتيجة 0.04 ولي تسع سنوات زواج وامشي في العاشره وعمري 35.

المهم والجديد في الموضوع اني اليوم كان عندي موعد مع دكتوره ناريمان في مركز ذريه الساعه وحده الظهر. اول ماوصلت هناك عملت اشعه ماشافوا المبايض. ورجعت للاستراحه ورجعوا نادوني عند ممرضه ثانيه وعادت الاشعه وصارت تدخل عصا الاشعه يمين ويسار وتضغط بطني وانا اتوجع لكن مافيه فايده اخيراً شافتها وقالت صغيره مرره بعدين دكتوره كلام.

المهم رجعت الاستراحه وبعدين دخلت على الدكتوره ولاول مره الدكتوره قمة في الاخلاق والتواضع والمعامله الحسنه انا عمري ماشفت دكتوره كيذا المهم شافت اشعتي وسمعت مني وشافت تحليلي مخزون المبيض وقالت ماينفع لك تنشيط ولا شيء قلت لها عن الاجسام المضاده والكرتزون وقالت ماتنفع لحالتك لان حتى لو عندك اجسام مضاده وحتى لو اخذتي كرتزون ماراح يصير عندك بويضات لان مخزون البويضات عندك ماهو قليل ولا ضعيف لا انتي عندك معدوم تماماً …

قلت لها طيب مافيه علاج بالحميه الغذائية او اي شي قالت لا. لكن رحمة ربي وسعت كل شيء. المهم قلت لها عن الخلايا الجذعيه قالت حابه تسافري برى وتجربيها بكيفك لكن ترى هي مجرد ابحاث مالها نتايج حتى اليوم. المهم قلت لها شكراً جزاك الله خير

وأول مره يابنات اطلع ما ابكي والله العظيم طلعت عادي مبتسمه طلعت ماني مهدوده ولا مكسوره رغم اني دايم انهد وانذبح من كلام الدكاتره اليوم طلعت عادي ونفسيتي عاليه. المهم طلعت وقابلت زوجي هو شافني اضحك وسمع صوتي عادي توقع ان عندي اخبار طيبه لانه يعرفني دايم اذا طلعت من الدكتورات وكلامهم ابكي وصوتي مثل الدجاجة المذبوحه. لكن اليوم شافني اضحك توقع ان عندي خبر خير. فرح المسكين وسألني قلت له بالسياره اقولك وركبنا المصعد وهو فرحان الضعيف المهم وصلنا السياره وقلت له كل كلام الدكتوره لكن باسلوب هادي. وحتى زوجي تقبل الموضوع عادي وصرنا نضحك ونسولف واشترينا غدا ورجعنا للبيت وتغدينا ونوووم وتويني صحيت قلبي بارد ومافيه هذيك الحرقه والغصه اللي احس فيها دايم. وانا مستعده لكل الاشياء اللي بتصير يعني لو زوجي يقول بتزوج بقول له بالتوفيق ولو يقول نسافر نسوي العمليه بقول موافقة رغم المعاناة وانها صعبه وياخذون من الحوض بحقنه وبعدين يفتحون فتحات في السرة وفي البطن وصعبه ومؤلمة ومجهولة النتايج كل الاحتمالات تأقلمت معها وحسيت براحه شديده ماحسيت فيها بحياتي قبل !! ياترى هل هذا مايسمى بالرضاء بالقضاء !!! لم اكن يووم اتوقع ان ينزل خبر مثل هذا برد وسلام على قلبي وعلى حياتي … فسبحان الله.