موقفي مع زميلتي في الجامعه

السلام عليكم ورحمة الله
اسعد الله مساكم بنات ابي اقول لكم موقف حصل لي ف الجامعه ،طبعا انا متزوجه وادرس بالجامعه اللي صار انه لما حملت أجلت سنه لاني تعبت مره بالوحم وكذا المهم بعد الولاده رجعت ادرس مع دفعه جديده مااعرفهم ولا اعرف احد منهم صديقاتي صاروا ف المستوى اللي اعلى مني وانا جديده مع بنات الدفعه اللي كانت بعدنا ،اللي حصل كنت احضر المحاضرات مااعرف احد تخلص المحاضره وانتظر اللي بعدها وانا بالقاعه وفي يوم جات وحده وجلست معي وتسولف ودخلت معي بقوه بالسوالف طبعا توها متزوجه وتسولف عن زواجها وزوجها وانا اسمع وعادي قلت شكلها تبي تقضي وقت فضاوتها وخلاص ولما جاء اليوم اللي بعده جاتني ونفس السالفه سوالف وتعالي افطري معي واقعدي وووو ..انا استغربت وكنت متحفظه بالبدايه لانه تعرفون دايما البدايات خداعه ابي اعرف وش هالادميه وغريبه ارتاحت لي بهالسرعه وتعزمني بالبيت وبمول .. المهم انا عادي معها وكانت احيانا تكلمني من جوال زوجها وكنت اتضايق بس ماقلت لها شي ،المهم دخلنا ف بعض شوي سوالف وطلعات وزيارات بطلب منها .. وبيوم من الايام دق علي رقم ثلاث مرات مارديت ارسل لي ردي ابي منك شي قلت مين قال بتعرفين لو رديتي ورديت وانا ساكته وطلع رجال قال الو وانا ساكته مارديت قال كيفك قفلت بوجهه ارسل برساله نصيه تكفين ياعمري ردي انا حبيتك طنشته ومامسحت الرساله نسيت ..ونسيييييييييت من الموضوع بعدها بفتره تقريبا شهر جاتني البنت هذي ف الجامعه واخذت جوالي وتفتش استغربت منها بس سكت استحيت وجوالي كان ف الجامعه كشاف عشان تعرفون الكاميرا ممنوع كنت اخليه بالبيت فاستغربت كشاف ومافيه الا رسايل نصيه وارقام وش تبي به واشوفها تفتش ف الارقام رقم رقم تخيلوا .طبعا انا عندي نسخه من الاسماء ف الكشاف الا زوجي ماكنت مسجله اسمه كنت حافظه رقمه وادق بالرقم بس المهم وهي تدور ولقيت اسم وحده اسمها اريج انا سميتها روجي قالت هذا رقم زوجك قلت لا صديقتي روجي سكتت وفتشت وخلصت وبعدين قالت بروح اصلي الظهر وراحت وانا كنت اكتب محاضره ماركزت معاها الا هي راحت بجوالي وبدات المحاضره اللي بعدها وهي مارجعت وبعد ماانتهت اخذت جوال وحده ودقيت على جوالي وردت قلت ابي جوالي قالت انا تعبت وماامداني اجيب جوالك رحت البيت وهو معاي وباجيبه لك البيت العصر قلت تمام ،وربي اني احسنت الظن يابنات ماتوقعت اي شي المهم رحت البيت توي وصلت الا هي تراسلني واتس طبعا شريحتي معاها والواتس بجوال البيت قالت انا تعبت ورحت المستشفى والحين طلعت وبامرك بالجوال قلت لا خليه لبكره خلاص مو لازم لاني كنت تعبانه وحايسه وتونا واصلين من الدوام انا وزوجي ماني رايقه لجيتها لانها قالت بادخل اتقهوى معك شوي يعني لو هي بتحط الجوال وتروح مو مشكله بس تبي تقلط الاخت وزياده امها معها يعني وحده سخيفه زي ذي تجيك اول العصر وانتي راجعه من دوام وتدري ان زوجك بالبيت وزياده امها معها وتصرفينها ماتتصرف وش تسوين لها بالله
المهم جات وجبت شاهي وكيك وعلى طول قالت لي وين جوالك حق البيت قلت لها موجود قالت جيبيه اشوف نوعه قلت ايفون 5 ماتعرفيه قالت مااعرف استخدامه واجيبه قالت افتحيه اشوفه من داخل فتحته وعطيتها واسولف مع امها مااسات الظن ابد وتروح ع المسجات ولقت الرساله اللي اقول لكم من شهر تقول تكفين ياعمري ردي ....
قالت متى ارسل لك هذا قلت زمااان قالت وش قال قلت ولاشي طبعا انا مستغربه الجراه والوقاحه اللي قالت لي ابي اشوف استخدامه وتروح للرسايل المهم قالت هذا زوجي انا انصدمت خير وش يبي قامت تقول ماعليك ترى هو كذا ياخذ ارقام زميلاتي ويدق عليهم وقد دق على فلانه وفلانه وانا مصدوومه وساكته وامها تقول اعرف انك بنت اصول ولاكان جاريتيه امسحيها بوجهي اساسا هو راعي بنات ووسخ بس قد حبته بنتي وقدهي حامل وقلت لها تحملي ومدري ايش وانا ساكته لاتعليق وش هالحركات وش هالعالم
تخيلوا وتقوم الام وتدق على زوج بنتها وتكلمه سبيكر وتقول له ليش تدق على صديقة بنتي قالت هي دقت علي وراسلتني هي بدات وانا فتحت عيوني ف الاخير قلت لها هذا جوالي قدامك وروحي السجل والرسايل وكل شي وشوفي بعدين خير انا متزوجه ماكان التفت لغير زوجي والله يابنات بغيت اطردهم بس مصدومه وابي اشوف النهايه المهم انكر زوج زميلتي انه كلمني يقول هي بدات قالت زميلتي عادي اخذ جوالك اوريه انه ارسل وانتي مالك اي رد من طرفك قلت لا صوري الشاشه بجوالك وصورتها وراحوا .واروح اعلم زوجي قال لاعاد تستقبليها اقطعيها وش قلة الادب ذي .المهم سكت واداوم بعد هالموقف عادي تخيلوا البنت ماتكلمني ماتناظرني وقالت لشلتها انها كشفتني اغازل زوجها😂والله شلتها محترمات مااتوقع صدقوها يكلموني عادي لان اساسا امها قالت لي تراه يدق ع زميلاتها وقد دق ع فلانه اللي هي من شلة بنتها وقالت اساسا راعي بنات وحركات وسخه وانه وانتم بكرامه لما يجلس ويقوم يكون ثوبه من ورى دم طبعا انا مافهمت ايش علاقة الدم بحركاته نسال الله العافيه
ايوه نسيت اقولكم لما كانت تفتش بجوالي الكشاف وسالتني عن رقم صديقتي اريج تقولي هذا زوجك قلت لا روجي كانت تبي رقم زوجي عشان تكلمه وتراسله ماادري هي تبي تقهرني على اساس اني اراسل زوجها تردها فيني قصدها او جد اعجبها لانها قالت لي شفت زوجك حلو وشعره يجنن
وانا ياغافلين لكم الله😂
المهم الحمدلله افتكيت منها ومن مرضها هي وزوجها ؛بس ماتوقعت فيه ناس تفكيرهم كذا
ايش رايكم بنات ف اللي صار هل انا فهمتها غلط او هي فعلا نيتها زي ماذكرت فوق
اعطوني ارائكم ...