موقف ازعجني أو اعتبروها فضفضة

هي مو مشكلة لكن لأخذ المشورة واذا كنت مخطئة وجهوني ..
انا تعبانة نفسياً وما انام الليل من التفكير والهم ، والله مو بيدي يا بنات ، انا ربي مارزقني نعمة الذرية ونفسي اجرب الحمل والأطفال ، زوجي يكسر خاطري كل ما تأخرت الدورة علي جاب لي تحليل حمل أو يقعد يتأمل يقول اكيد حامل ، وتعرفون الشيء هذا يرهقني نفسيا حتى صرت اتنرفز اذا قال شكلك حامل ، مو بيدي لكن ما احب يفتح لي جرح وباب للتفكير ، ما أحب يتأمل بشيء ويطلع عكسه .. اتمنى تدعوا لي من قلبكم يعلم الله ان قلبي يتقطع خاصة اذا سمعت انه في وحده حامل او انها جابت لها طفل ، والله انحرم من النوم وافكار توديني وتجيبني ..
المهم اني بكتب لكم موقف صار لي ..
ام زوجي وبنتها يغثوني كل ماجيتهم زياره يسألوني هاه ماحملتي وليه ماتعالجين ترى العمر يمشي وولدنا تراه كبير مو صغير ومتضايق يبي عيال مع ان زوجي بحياته ماشكى لي وجعه عن تأخر الحمل لأني اعرف انو مايبي يجرحني ..
ويسألني بعد عن بعض قريباتي اللي ربي مارزقهن بالحمل مثلي ، يعني يسألني عن كل شارده ووارده بعائلتي وخصوصا عن الحمل والطلاق والزواج وتعرفون اسئلة الحريم الفضولية ..
وانا اجاوبهن بجواب مختصر مُبهم يعني ما اعطيهن العلم ..
وانا اتضايق من هالأسئلة وارجع لبيتي متنكدة وضايق خلقي وألوم نفسي اقول ياليتني مارحت وياليتني قعدت في بيتي افضل لي ، ويبدأ يرجع لي التفكير والهم والأرق ذبحني والله ..
كل ما انسى هالموضوع واطلع أونس نفسي مع الناس يزيدون همي بزياده .. يعني مافي مفر ..
واخاف زوجي يطلقني او يتزوج علي ساعتها بموت من قهري ..
والله من التفكير صابني مرض السكر والله المستعان ..
الموقف هو :
امس بالصدفة عرفت ان بنت اخت زوجي حامل بشهرها التاسع .. لأني رحت لبيت اخت زوجي عشان غرض معين وبنتها استقبلتني وماشاء الله حامل وبطنها كبير ماشاء الله وعرفت انها حامل وهي على وشك ولادة ..
طبعا انا اللي مزعلني شيء واحد .. انه أمها شغالة لي اسئلة عن الحمل وعن اهلي وعن كل شيء يخص عايلتي وانا فقط اسألها اخبار بنتك وعيالها تقول الحمدلله وتسكت ..
ولا فكرت تخبرني انها حامل اطلاقا ..
طبعا بتقولون لي وليش تعلمك مو لازم ..
انا اعرف انه مو لازم ومو من طبعي تتبع أخبار الناس ولا عمري تدخلت بشؤون غيري واساسا انا ما احب احشر نفسي بشيء ما يخصني ..
لكن حزّت بنفسي ان ام زوجي وبنتها على كثر حشريتهن بحياتي وبعايلتي ماجابن لي طاري حملها لو بالغلط مع انهن احيانا اسألهن عن هالفلانة وكيف احوالها ومن زمان عنها مايجاوبن بشيء وحريصات على تكتم الموضوع ..
ساعات اعذرهن اقول يمكن يخافن اني اضرها بعين خصوصا اني محرومة من هالشيء وساعات اقول يمكن مايبون يجرحوني واتشفق عالحمل اكثر ..
بس على كثر اسئلتهن لي المفروض يقولن انها حامل عادي !!
هي ولادتها هاليومين الله يقومها بالسلامة وزوجي يبغاني ازورها واجيب لها هدية وانا مش رايحه اطلاقا ..
أولا لأنهم ماخبروني مُقابل حشريتهن بالأسئلة ..
وثانيا انه هالفلانة لها بيت وماعمرها عزمتني نهائيا لبيتها مع انها دايم تعزم سلفاتي وبالمقابل انا عزمتها مرتين لبيتي ..
ممكن يكون موضوعي تافه جدا لكن والله من الهم وضيقة الصدر كتبته واعتبروها فضفضة ..