موقف امام المتوسطه

هذا ياطويلات العمر كنت رايحه للمتوسطه اخر يوم بالاختبارات،اوصل ملف بنتي للمدرسه اكمل تسجيله
وقفت بالسياره انا وزوجي ،واشوف البنات اللي واقفه واللي جالسه هي وصديقتها وتسولف ،واللي تمشى والوضع عادي،طبعاً بنات المتوسط لهن حركات غريبه عجيبه ،مابين براءه واستهبال خاصه بلبس العبايه والغطوه تلقينها ترفع الطبقه الاولى بالغطوه عشان تشوف سيارتها ولا ترفع العباه فوق ويبان نص المريول هذا غير اصواتهن ونداهن لبعض وضحكهن ..ولا كأن بالشارع احد غيرهن
المهم قبل انزل وانا اشوف وحده تركض وماسكه عصا بيدها وتريد تضرب صديقتها(للعلم البنت جسمها صغير مره تعطيها عمر11 سنه)المشكله متغطيه وتستهبل مع زميلاتها والسيارات كثيره ،اللي ينتظر بنته او اخته
نزلت ولا القاها واقفه عند الباب وتضرب الباب بالعصا تريد المستخدمه تفتحه،والمستخدمه رافضه
انا ناديت ع المستخدمه اريد تفتح قالت مااقدر شوفي البنات ماغير طالعات داخلات وجنني.قلت معي ملف قالت دخليه من تحت الباب😳انا هنا رحمتها قلت يالله وادخله واوصيها عليه😂😂😂
المهم التفت للبنت لقيتها بجنبي تنتظر الباب ينفتح عشان تدخل وتكمل استهبالها داخل
مسكتها قلت انتي اش اسمك حبيبتي؟قالت ليه
قلت والله انا شفتك تركضين بالشارع وتنقزين قدام الرجال قلت يمكن فيك شي..مهو معقوله بنت بالمتوسط ولابسه عبايه وتسوي هالحركات
ولعلمك زوجي قال هاتي اسمها اريد ابلغ ابوها واقوله بنت معها عصايه وتركض بالشارع
قالت مو بس انا شوفي كل البنات يلعبن
قلت انا ماعلي من البنات،انا علي منك ماشفت غيرك تسوي كذا؟وانتي بنت عاقله فاهمه عيب تصدر منك هالحركات
قالت خلص انا اسفه ،وهي تاخذ العصا وترميها بالشارع
انا شكرتها وطلعت وركبت بالسياره
عاد بصراحه انا خفت وانا اتكلم معها من انها تقل ادبها معي وتحرجني قدام الناس.لكن ربي سترر