موقف اهلي ازعجني ... شنو رأيكم

ما احلل النقل للإنستقرام .. لا اسامحك ياللي تنقلي موضوعي هذا لاي حساب اخر ..




زوجي دوامه بعيد وان راح يجي ثاني يوم ، وكنت وقتها يوديني عند اهلي انام ،،
وشقتي قريبة جدا لبيت أهله كلها خطوتين ..
في بيت اهله للي تعرف قصتي فيه امه وابوه وهم كبار بالسن اعمارهم بالسبعينات الله يحفظهم وعندهم شغالتهم وعيالهم وبناتهم كلهم متزوجين وفي بيوت مستقلة بعيدين عنهم ماعدا زوجي قريب منهم ..
سافرت شغالتهم وماعندهم احد يخدمهم ، عندهم بنت وحدة متزوجة تجي احيانا تخدمهم وتطبخ لهم ماتقصر الله يسعدها ..
بس احيانا ماتقدر تجي زوجها يمنعها ..
فأنا اقترحت على زوجي انه اذا داوم يوديني لأهله اخدم امه وابوه يعني اطبخ وانظف البيت واستقبل الضيوف وهكذا ..
واهلي اروح لهم يوم الجمعة فقط ..
وفعلا صرت اروح لهم اكثر من مره بالاسبوع وبصراحة بيتهم نظيف لكن يحتاجون طبخ وقهوة وتمر يعني تعرفون اكل كبار السن ، وخالتي ام زوجي طيبة جدا وتفرح اذا جيتها وكذلك ابو زوجي ..
طبعا اخوان زوجي كلهم متزوجين وعددهم كبير ماشاء الله فوق 8 وكلهم عندهم اولاد ماعدا انا .. الله يرزقني من واسع فضله ..
مشكلتي اهلي يا بنات .. من عرفوا اني ما اجيهم اذا داوم زوجي واروح اخدم اهله يزعلون ويتصلون علي ويقولون انتي خبلة ليش تخدميهم وبكرة يركبوا فوق راسك ويستغلونك ووووو ، حتى يقولون لي لا يكون زوجك غاصبك تروحين لهم ..
مع ان والله انا اقترحت على زوجي اروح لهم ويعلم الله ما ابي إلا الأجر .. وعشان ما افكر كثير بالحمل والعلاج ابغى نفسيتي تكون حلوة ومنها اتسلى مع ام زوجي ..
بس ماعرف ليش اهلي كذا منزعجين مع اني اجيهم اسبوعيا وما اقطعهم ، التعب علي انا مو عليهم وانا مرتاحة كذا ..
وبالعكس من يستقدمون شغالة اهل زوجي راح ارجع لروتيني السابق بأني اجي اهلي وانام عندهم كل ماداوم زوجي ..
هي كلها فترة مؤقتة روحتي لاهله ، صرت اذا داوم زوجي ما اقول لاهلي ولا اخبرهم بشيء عشان ماتصير مشاكل ...
صرت اخاف منهم وكأني مسويه جريمة ..
انا اعرف اهلي الله يحفظهم مايبون اتعب وغيري جالس ، لان البعض من سلايفي مايجن ولا يخدمن وان زاروا بيت اهل زوجي يقعدون ضيوف شرف وامي تبغاني مثلهن ..
انا طبعي احب اشتغل واساعد واستحي اذا شفت ام زوجي يالله تقوم من مكانها تروح للمطبخ والله انقهر ..
حالياً اخاف امي تخلي ابوي يتصل على زوجي يقول له بنتي مو شغالة لاهلك .. وتبدا مشاكلي مع زوجي وانا ماصدقت ان اموري تيسرت مع زوجي ..
ادعوا لي احمل يا بنات بالله عليكم