الناصحة 2 @alnash_2_1

محررة برونزية

موقف خلاني اصدق بعض اللي يتشكون حبيت اكتبه لكم وبالذات اللي عندهم شغالات باردات

السلام عليكم

طبعا نلاحظ كثير ناس يتشكون ونقول ايه مايحمدون ربهم على النعمه ولاازكي نفسي قد اكون منهم ...

اختي جتها شغاله ماشاء الله حاره بالشغل وتسوي اللي تبينه بلحظات تصدقون انها تتشكى منها وتقول اللي بارده بشغلها احسن !!!!!
وكم مره امي تقول لها يابنتي احمدي ربك من يلقى وهي تقول يمه من شدة حرارتها تبي تخلص الشغل وبس ومايهمها شي وماتراعي البيت كل بيتي تكسر من تحت يدينها وكانت طفشانننننننننه منها

المهم ما اهتمينا ... وسبحان الله جت اختي سفره للخارج مع زوجها لمدة شهر ونصف وتركت الشغاله عند امي وانا كذلك جتني ظروف وخلال مدة سفر اختي جلست عند امي اسبوع وشفت بعيني تخيلوا يابنات سريعه بتغسيل الصحون:angry: لكن اسمعي التصبيخ والتكسير
بعض قدور امي غطاها زجاجي فيه اللي تشطب واللي طاحت مساكته والمشكله اذا انكسر عادي تكنسه ولا تقول شي ولا تتعذر بالطقاق اللي يطقكم ولاكنها سوت شي لكن خل تشوف عيالي كسروا شي او شغالتي مسكت شي صاروخ على امي تحرررش

بالنسبه للكنس تدخل المستودع وانواع القربعه وتشيل المكنسه الكهرب تمشي لين المكان اللي بتكنسه ودووووب تحط المكنسه وتنبها امي ولا عندها بأحد وانفك كفر المكنسه من كثر الخبط وهي لها سنوات عند امي كأنها جديده... ولو تقولين لها غسلي الحوش ووطلع الماء مافيه تقولها امي خلاص خليه بكرا عشان تجي المويه مافيه الا بتغسل الحوش لو الماء ضعيف ويخلص على البيت عادي وامي مقهوره منها صحون زينه وبيالات تكسروا ولا قدرت تهاوشها تعرفون قلوب الامهات الله يخليهم تقول اخاف اقولها شي تضرب عن الشغل والا تطلع من البيت وفشيله من اختك وزوجها ماودي يجون يلقون مشكله ....والاعظم من كذا تصررف ولا تشاور تفزع فزعات قاتله تقول امي اسمع صوت الطاحونه لكن كأنه بزر يلعب فيها تشغلها وتسكرها وتشغلها وتسكرها ماهمها لو خربت ولاهي مستوعبه انه كهرب ممكن يمسكها والله يابنات عفنا السناعه اللي كذا ولا الغسيل ماتصبر عليه تحط الثياب وفوقها الصابون وتشغل الغساله وهي مابعد عبت ماء !!! وخلاص الغسله عندها خمس دايق وخلاص بتخلص كم مره تدخل ومعها كوم غسيل والله يابنات ماتكمل نص ساعه الا هو على المنشر لكن شوفوا الملابس البيض نظافتها :09:لانها ماتصبر عليها وتكثر غسلها والاعظم مسرفه تكب كب بالصابون والشامبوا :icon33: والله ماعليها ....
يوم جت اختي علمتها امي بكل شي قالت شفتوا والله ماعندي طاحونه او عصاره او جهاز لمسته الا وخرب وصحوني سوت لهم تصفيه لدرجة اني جبت كراتين وخبيت فيها الاشياء اللي احبها واخاف عليها وتوعدت فيها ماتمد يدها على طاحونه ... تقول حتى سراميك بيتي تكسر منها ذا جت تنظف تشيل الكنب ودووب ترميه رمي تنزعجون تزعلون نايمين قايمين بالطقاق اهم شي تخلص شغلها تقول نبهتها وهاوشت تنتبه شوي لكن ابو طبع مايخلي طبعه فتره بسيطه وترجع مافيه فايده وماقدرت اقاشرها بالخصم اخاف على العيال منها ( احنا اللي نخاف منهم صرنا ))
لا والنفسيه مثل جونا فجاءة تضحك بهستيريه وفجاءة مكتئبه تجيب لك الهم واذا مريضه ماتكلمنا كأنهه زعلانه ولاترد علينا تقولون حنا اللي منزلين عليها الدوره

تصدقون والله تحللنا من اختي وامي قالت لها يابنتي سامحيني بعد لان امي كم مره تخانقها تقول الناس مايصدقونك لا شافوا شغلها وسنعها .... واختي فرحانه تقول جت من ربي كلمت اهلها وجلست تصيح تقول ابروح تقول زوجي رفض لكن انا اقنعته قلت يا ابن الحلال اذا ماروحناها بتشين النفس ويكفي البيت اندمر خلها تروح بس وبتروحها بعد رمضان بمشيئة الله

ولو اقولكم على شغالة اختي اللي قبلها كانت بارده لكن سبحان الله والله وهي تغسل الصحون تمسك الصحن وكأنها ماسكه تحفه تنظفها من الحرص وتقول الاشياء اللي تضررت منها لاتكاد تذكر هذا من غير انها اقتصاديه وتوفر سبحان اللي خلق وفرق ..

مثل ماقلت لكم احيانا الوحده تشكى وننط بحلقها ونحسسها بأنها تبالغ او تبعد العين لكن مع شغالة اختي مافيه عين الا الله يعينهم عليها

والله يسخر لنا ولكم وانا بمشيئة الله راح اكلم مكتب الجاليات واكلم واحد من جنسيتها بما انها مسلمه لها حق علينا واعلمه عن كل شي عشان ينصحها ونكسب فيها اجر سواء اهتدت والا لا نبرئ ذمتنا وبنفس الوقت تعرف عيوبها بشكل علني واننا كلنا لاحظنا وتكلمنا فيها حتى لاندخل بالغيبه وهذا اكثر شي حرصني

فلذلك وش رايكم اللي شغالتها بارده مو احسن من السناعه اللي تخلف دمارههههههههه

يلزم عليك تسجيل الدخول أولًا لكتابة تعليق.

تسجيل دخول

كول بس تكره السكول • 14 سنة

هههههههههه الصراحه لا بارده ولا حاره لووول

والصراحه اكثر .. بدون شغاله احسن لوول

يسلمو

dalya119 • 14 سنة

قد جاتني وحدها مثلها لاتكون هي
سيرلانكيه
ولا طبعهم واحد الله يعينكم

شرقاويه توب • 14 سنة

نشفتي ريقي الله يعينهم

استغفر الله

صلى الله عليه وسلم

لا حول ولا قوه الابالله

سبحان الله وبحمده سبحان ربي العظيم

الوردة الجارحة • 14 سنة

مرررة جتني وحدة كدا عمرها 20 وصرت ادا أبغى أنام أو أكلم بالتلفون أقفل عليها
الغرفة بالمفتاح لمين أصحى لأنها ما تخليني أنام .. تدربي برميل الغاز على السيراميك
وحتى مشخالة المغسلة حقت المطبخ ما تكبها بالسطل بالهداوة تصبخها صبخ
وهي حديد لمين تتعجن..

بس تدرين أيش علاجها؟؟؟
خليها تطلع حرتها بالعجين ....تعجن وتخبز معجنات وبيتزا...
وتلف ورق عنب وتلف سمبوسة .....منها تمتصين طاقتها ومنها تستفيدين منها وتتسلى
وتصير توخر عن وجهك ما تصلبخ فوق راسك...

لو تبين تغيرينها بالكلام والله ما ينفع تسمع من هنا
وتطلعه من هنا...
فيها طاقة ما تدري وين توديها,
أنتي وظفي هالطاقة!!!

وادعي لي.

*انا واختي* • 14 سنة

لا حول ولا قوه الابالله