موقف صار في فرح

بسم الله الرحمن الرحيم
بما اننا في اجازه والافراح والمناسبات كل يوم ماشاء الله رب يزيد ويبارك
نبغى نذكر المواقف اللي صارت معانا في الافراح سواءموقف محرج او حركه صارت من اهل الفرح استغربتيها يعني ابتكروا زفه جديده او حركه غريبه
وراح ابدأ انا
اول موقف صار كان في فرح بنت جيراننا كان من بين المعازيم وحده تقرب الظاهر للعريس ولابسه فستان ماسك ابيض ساده مافيه اي لون ثاني وكل شويه اشوفها ماتجلس ماشاء الله مره ترقص مره تسلم ع المعازيم مره الاقيها واقفه مع مجموعة بنات وعلى الساعه 12 تقريبا توزعت العصيرات ومااعرف ايش صار لها وانكب عصير الفراوله على فستانها وهي جالسه يعني من تحت الحزام الى رجلها كله احمر وراحت الحمام تغسله وتوزعت المويه مع العصير على كل الفستان انعدم زياده ومن بعدها جلست ولاعاد قامت مسكينه من مكانها
موقف ثاني صار لي انا حضرت ملكه وانا لابسه كعب وطول الوقت وانا جالسه واول ماجو صحباتي ونسولف وقمت باروح الحمام اول خطوه وانكسر كعب الجزمه اليمين وصرت امشي كأني حياة الفهد في مسلسل حرم سليمان ابو الريش اطلع وانزل لان الكعب الثاني سليم وطويل مره واخرتها رجعت مكاني ولاعاد تحركت الا على البيت وقلت لصحبتي مره ثانيه اذا حضرت فرح باحط احتياطاتي العاديه روج وبودره ومشط وعطر وجزمه
موقف صار لزفه في فرح كانو عاملين زفه للاطفال قدام العريس والعروسه اول وحده ماسكه سله فيها ورد ينرمي على المعازيم وتاني شي بنتين ماسكين كمان سلات وثالث شي بنتين ماسكين مباخر المشكله كلهم مرتبين وماشين مع الزفه الا اول وحده طفشت ماتبغى ترمي ورد ولاتبغى تكمل يمكن عمرها ثلاث سنوات وخربت عليهم الزفه كل شويه تنزل وامها ترجعها شويه توقف وتلتفت وراها تدور امها وامها تدفها تقولها امشي للكوشه وماتبغى طولو الزفه بس عشان يزبطوا البنت انها تمشي مافيه امل واخرتها جلست تبكي وامها سحبتها


اخر فرح حضرته سوو زفه لصورتين كبييره للعريس كانو ماسكينها خدامتين من خدامات القاعه وحده يمين ووحده يسار صور لها برواز وزفوها باسم العريس وفي النهايه طلعت شكولاتات بس مطبوع عليها صوره العريس فكرتها حلوه وجديده


المايك لكم