تعرضت لموقف محزن مبكي الله يجعلكم ماتجربونه ان شاء الله.......
انا يابنات لي ثلاث سنوات متزوجة وما جاني أطفال لكني صبورة والحمد لله وعمر هذي المشكلة ماحزنتني أو أثرت على حياتي لأني مؤمنه بإن كل شي مكتوب ومقدر وماياخذ الإنسان إلا نصيبه.......
لكن في موقف تعرضت له في عيد الأضحى اللي فات خلاني أموت من الحزن ويتفطر قلبي على حالي وماهديت الين بكيت حتى جفت دموعي.....
الموقف كان في صباح يوم العيد تزينت وتجهزت وكأني عروس بيوم زفافها سلمت على زوجي وعايدته وانا ماتسعني الفرحه وبعدين رحنا عند أهل زوجي وسلمنا عليهم وعايدناهم وكان الكل متواجد هناك كل عيالهم المتزوجين بحريمهم وعيالهم والأطفال في أجمل زينتهم......
خرج الرجال علشان يذبحون الضحايا واحنا يالحريم اجتمعنا مع بعض نتقهوى ونسولف وفرحانين كثيييييييييير بالعيد.....
واحنا جالسين وتدخل بنت سلفتي الصغنونه ومعاها ورده وجت وعطتها أمها وباستها ودخل بعدها ولد سلفتي الثانيه ومعاه ورده وأعطاها أمه وباسها وساعتها أنا تحرك قلبي من مكانه وزادت دقاته وسرح عقلي في عالم ثاني وتمنيت ساعتها لو ان عندي طفل يدخل بوردة ويعايدني واحظنه وابوسه والله يابنات اني أنا الوحيده بينهم ماعندي أطفال علشان كذا كان الموقف أكبر من إني استحمله.....
لما شفت الأطفال وهم بأحلى زينة ومعايدتهم لأمهاتهم وفرحة أمهاتهم بهذي اللحظات تمنيت لو اني اختفي من بينهم لأني خلاص باين الحزن في وجهي وعيوني تلمع بالدموع لكني قدرت أكتم عبرتي وأقاوم دمعتي الين رحت شقتي وساعتها بكيت وبكيت وبكيت في يوم كان الناس فيه في قمة الفرحه ومافي أحد يبكي في هاليوم.....
وكل هذا حصل وزوجي مايدري ولا بينت له لأنه حساس ولا حبيت أخرب فرحته في هاليوم......
يارب يارب يارب مايجي عيد الأضحى الجاي الا وطفلي معاي.....
ياقلبي أتعبني الإنتظار خلاص يكفيك تغلي تكفى تعال وزين لنا الأعياد بضحكتك وفرحتك صدقني أنا وأبوك مشتاقييييييييييييييييييييييييييييييييييييين نشوفك يانور عيوننا.....
ومازلت أقول لاتنكسر ياقلبي يوم الفرح قريب قريب ان شاء الله
