موقف محرج طحت فيه مع بنت عمي والسبب زوجي

السلام عليكم يالغاليات

يالغاليات ابي استشيركم ... طحت موقف محرج مع بنت عمي ..
امس كنت اكلم بنت عمي وتكون هي بعد من سلفاتي وانا اسولف معها قلت احتمال ازور عماني واذا طلعت منهم رحت لاهلي اتعشى عندهم قالت لي بتروحين اكيد قلت احتمال مو اكيد قالت اذا كنتي منتي رايحة ولا ماراح تطلعون اليوم عطيني خبر عشان نجتمع كلمت زوجي عن زيارة عماني وماعنده مانع اتصلت ابي اعلمها وانا اتصل دخل زوجي علي وقال (لاتقوليلهم حنا بنروح ماني فاضي اوديهم واجيبهم وازعاج بالسيارة) وهو يقولها هي ردت على الجوال وسمعته انا قلت لها بنروح وخليت عمري وانا اكلمها طبيعية وعطيتها خبر وسكرت قلت زوجي تراها سمعت وشكلها زعلت ماتمسك لسانك لين انتهي مكلمتها قال كيفها انا ماني ملزوم اوديهم كل مكان يبونه واجيبهم وعيالهم ماحد يتحملهم دلع وقله ادب وازعاج وزوجها عندها يوديها هو مو كل مرة تركب معنا

ابي حل وش ارد عليها حطني زوجي بموقف محرج معها كيف استسمح منها هل ارسل لها رساله اعتذار ولا اقابلها واستسمح منها وجه بوجه

تكفون الحل الله يجزاكم خير من امس مانمت زين تفكير بالموقف وزوجي اللي هو سببه بسابع نومه مافكر ولاهمه الموضوع