موقف مرعب حصلي ,, اللي تخاف لا تدخل

بسم الله الرحمن الرحيم

السلام عليكم ورحمة الله وبركاته




كيفكم حبوباتي

عندي لكم موقف حصلي أمس و الله لحد الأن مو مستوعبته

موقفي مرعب و مخيف فاللي تخاف لا تقرأه


قولو بسم الله الرحمن الرحيم :pbsmile:

هذا أمس يا طويلات العمر كنت تعبانه عندي أنفلونزا و حرارتي مرتفعه

أغلب اليوم كنت نايمه بسريري ولما نامو عيالي في الليل تقريباً الساعه 10 صحيت من سريري

ورحت للصاله طبعاً الصاله عندي بالبيت مربعه و صغيره 4 في 5 وفي جهه من الصاله باب

غرفة الجلوس اللي نحوس يومياً فيها أنا لم صحيت كان علي حراره جيت للصاله فتحت التلفزيون

و نمت بالأرض :icon810:

من غير شعور نمت على الأرض قدام باب غرفة الجلوس طبعاً الباب كان مسكر تركت الكنب

و نمت فوق السجاده وكان المكان ضيق رأسي و فوقي جسمي محشور بين الكنب و الطاوله اللي

بالوسط و باقي جسمي قدام الباب إن شاء الله فهمتو علي :nerd:



المهم لا قلت بسم الله ولا قريت أذكار ولا شيء وطيور الجنه تلعلع

و حلمت حلم ينزع القلب من مكانه بحياتي ما كنت أصدق بقصص الجن اللي تحصل مع الناس

أنا أحب قصصهم و أتابع أفلام الرعب كثير بس ما كد صدقت الخرفات هذي

أعرف أنهم حق و موجودين معانا لكن أنها توصل للخرفات اللي نسمعها بالقصص ما أصدق

و بالعربي ما أخاف منهم أطلاقاً


حلمي يا طويلات العمر جاني قطوين بالمنام واحد أسود مثل الليل و كبير و شكله يقرف و الثاني

بني و كمان كبير كنت بالحلم نايمه جو جنبي و صارو يتلصقون فيني ووالله العظيم يا أخوات

كنت أحس بأنفاس القط الأسود كانت دافيه بالحلم هاوشت على القطين وطردتهم عني و رجعت أنام

اللي و يجي القط الأسود يخدشني و يتمسك ببجامتي كانت مخمل ثقيله فما حسيت بمخالبه مره

و عضني بس ما قدر يوصل لجسمي و جت القطه البنيه و ضربتني بيدها و الله كانت ضربه قويه

و أوجعتني و قالت لي يالله قومي عن الطريق :buck:



أنا قمت وكلي عرق كأني متروشه و رحت فوق الكنب و تخدرت بمكاني زوجي لسى ما نام

جاء يشوف علي حراره أو لا لقاني أغلي راح جاب لي مسكن و عطاني إياه و كنت أقص عليه

الحلم و يضحك على يقول تهذين من الحراره و أنتي نايمه كنتي تهاوشين و تتكلمين و تهذين

بس ما فهمت أيش تقولين :blink:


بعد ساعه تقريباً راحت الحراره قمت و كنت أحس بشيء يحرقني بظهري و رجولي لما شلت البجامه

كانت الصدمه يا أخوات كلي خدوش

و الله ما أكذب عليكم ظهري و رجولي و يدي كلها مخدشه و نفس المكان اللي ضربتني منه القطه

البنيه بالحلم صار فيه كدمه لونها عنابي على أزرق مره تخوف :unhappy:




الخلاصه من ذا الموقف دائماً كنت أسمع أجدادنا يقولون لا تنامون ولا تجلسون بالبيبان لأنها

درب الشياطين و كنت أضحك عليهم بس الحين لا والله ما أضحك إلا يا خبالتي الزايده يوم أني

ما صدقتهم ونمت في الباب

و الأهم من هذا التسميه وقراءة الأذكار و الورد قبل النوم و تشغيل القرآن بالبيت

أختكم في الله شغلت طيور الجنه و نامت عليها




إن شاء الله محد يسوي سواتي و لا يمر بموقف زي كذا لأنه من جد كرهني باب الغرفه و المكان

اللي نمت فيه كله و الله يحفظني و إياكم من كل مكروه



:heart: