موقف مع زوجة أخويه ايش رايكم؟

كيفكم يا حبيباتي..

ماراح اطول عليكم. انا عايشة في الرياض واهلي في جده وما عندي هنا غير اختي المتزوجة واخويه اللي كمان متزوج.

في جده كمان عندي 3 اخوان متزوجين وعلاقتي مع زوجات أخواني عسل والحمد لله.

زوجة أخويه اللي هنا كنت لها أكثر من اخت وما كنت اطالبها بحاجة. اعزمها اهديها اوقف في صفها ضد أخويه . اهادي بناتها. أنصحها زي اخواتي وأكثر والله.

وبالمقابل عمرها ماقلت ليه اتفضلي عندي من يوم ما تزوجت اخويه ويشهد الله ما اعرف بيتها وين!!ومع ذلك ماعمري شلتها في خاطري .

مرة رحت الملاهي واتفقت معاها يمرون بي لبيتي وجاء اخوي وراحت معاه حتى من غير ما تقول لي مع السلامة مع اني اتفقت مع زوجي انه ما يجي ياخدني !!ولما تاخرت عليه ودقيت على جوالها قالت انا مشيت وبصراحة انا مصدعة وما اقد آخدك معايه!! طيب كان قلتي لي مو تروحي وتتركيني!!

مو هذي السالفة انا بس اديكم امثلة على حركاتها معايه....تتصل فيه وتديني أرقام ناس ما اعرفهم عشان اشوف من اللي يزعجها عشان هي ما تبغى رقمها يطلع عند أحد وانا الهبلا اسوي اللي تقول عليه..

لما تولد ما اخلي على قلبي آخد لها كل حاجة هي والبنت....لما تتعب ادق عليها ...لما تدخل المستشفى ازورها واهاديها وهي عمرها ما عملت حاجة من دي .

هذا غيض من فيض ..والنهاية...

ولدت السنة هادي في بيتي في الرياض وماكان عندي احد من اهلي وتمنيت انها تجي تونسني على الاقل هي من ريحة الحبايب لكن والله ما جات ولا عزتني في بنتي اللي ماتت .

حتى امي كلمتها وقالت روحي لها ترى هي تحبك وتبغاك قالت لها :لالالالالالالالالالالا ما ابغى اروح!

انا خلاص طفح فيه الكيل وقمت اتذكر كل مواقفها واكتشفت اني كنت غبيييييية بمعنى الكلمة ولا البنت واضح انها ما تبغاني بس انا اللي اتلزق فيها.

ماعاد سألت عنها ولا حتى هي وكأن بيني وبينها ثار!

شفتها في اجتماع عائلي وسلمت عليه باطراف اصابعها على بالها اخت زوجها العبيطة اللي حتروح تسألها ايش فيك؟؟ لايكون اخوي مزعلك؟؟ لالالالالالا خلاص ..

هي حست بس لسه شاكة وصادفتها مرة تانية وانا اللي اديتها اطراف أصابعي هذي المرة فهي استغربت ليه ماجيت الاحق فيها!

الاسبوع هدا جوا اهلي للرياض وصادف اني شفتها عندهم واول ما سلمت عليها مدت ليه كيس فيه هدية!!! طبعا انا خلالالاص طلعت من خشمي وحلف يمين ما اخدها.

قالت ليه؟؟ قلت ابدا ..اهم حاجة شوفتكم.

ايش رايكم يا بنات؟؟ انا نويت اتعامل معاها رسمي من اليوم وطالع لآن الطيبة ماعاد تنفع والناس لما يشوفوك طيب معاهم يحسبوك تبغى من وراهم حاجة!

على فكرة انا والله احبها واحب بناتها واخوي هذا كمان ليه معزة عندي لكني لما شفتها تتعاما معايه كذا وانا اعاملها أحلى معاملها كرهتها وكرهت بناتها .لاتلوموني غصب عني صدمتي كانت كبيرة وحاجتي ليها هذاك الوقت كانت شديدة وهي منت عليه حتى بشوفتها.